Ekesedes 33

1 Godta ma Moses watle epo atlaiyo, “Wa꞉ta Isip mo tle elempuwa opa mate mo i saliyome na꞉ta꞉ mo-powataliya wua꞉ watle hamili duwa mo dla tane. Adipalati, na꞉tapo A꞉iblaham mate epo Aisek mate epo Yokob mate dla yu itiyapo himmama mo eye yia꞉ mamadulo watle hamili duwapo. [a] 2-5 Mo eye pta ka꞉pi, dlowe alisisiye pta wokasemana. Wua꞉ta tlati na꞉tapo na꞉ banakaka oplamiye wua꞉ mate tane dlowepo, ya꞉tapo wua꞉ mate halemama Keinan so mate epo Amoli so mate epo Hitai so mate epo Pelisi so mate epo Hibai so mate epo Yebusi so mateye alikili a꞉ma posallepe. Amasiyama Isalael soye na꞉ yu dolumolowe dla pta dupa kokalalimale sopo. Epapedeme na꞉ta yia꞉ mate potlowa. Adipalati, na꞉tapo yia꞉ta duka dla tamalemama dupa kokalalimale koko natipame yia꞉ potimalala. Epapedeme watapo yia꞉ta yia꞉skamu yia꞉ moto dla goldta mimita꞉pele alisisi mate dinapele kokoye medla uptimelepe. Epalati na꞉tapo yia꞉ dla halowe kokoye alotle atlowepo,” diyo.

Epalati opatapo Godta atlale yu i dalepame sikemte dupa kolle mate a꞉lemyemama yia꞉tapo goldta mimita꞉pele alisisi didiyepo ha꞉ha꞉leye medla uptimyaiyo. 6 Epapele koko tle Isalael sotapo Sainai tamali kikiwi isili dla gold alisisi matle didiyepo siyamoloweye mosukulu medla memeliyo.

God mate yukamalalo kimna꞉ya

7 Isalael sota kimtimale alikili tle Mosestapo kimna꞉ya hale hapame semama God mate yukamalalo kimna꞉ya demdiyo. Opatapo God tle yu dallowe solotamama kimna꞉ya edla tamdiyo. 8 Amasiyama Mosestapo God mate yukamalalo kimna꞉ya edla tlati opatapo yia꞉ kimna꞉ya tle sillipame kokoloma tle omha꞉ha꞉lati Mosesta kimna꞉ya dulu dla tumdiyo. 9 Mosestapo kimna꞉ya dulu dla mo-tulati wuala deiyamaletapo kokoloma tala dla malame bodepo halemdiyo. Epalati Godtapo Moses mate yukamhalemdiyo. 10 Epalati opata wualata mo-malla natipame yia꞉ kimna꞉ya kokoloma tala dla ha꞉ha꞉mama God dla heoheodemdiyo. 11 Godtapo Moses mate yukamhalemama oplamita ya꞉mkale mate mila꞉pi hatlo atumapo yukamhalemdiye, epammhalemdiyo. Mosestapo God mate yukamhallepo gudepame ilame tlati asiyama ya꞉ gadlalo kipiliyemala Nun yami Yosuwa tlope God mate yukamalalo kimna꞉yaye posaliyome tasemdiyo.

Mosestapo Godta ya꞉ gadlepo depo solotamale

12 Mosestapo God watle epo atlaiyo, “Wa꞉ta na꞉ watle atlemama opa iwoloye elemtane demhalapo. Amasiyama wa꞉ ala na꞉ gadepo tlowe oplamiye ponati-isema. Epame wa꞉tapo na꞉ natipo siyemama na꞉ye wa꞉mkale ikadepe demdepo. 13 Amasiyama wa꞉ta ikadepe na꞉ dla siyemhalema dlepiye, na꞉ watle wa꞉ta malamale kokoye imane. Epalati asiyama na꞉tapo wa꞉ yu dla salladepo sela꞉lati wa꞉ta natipame siyemhala kokota me-ellepe. Epele dulu dla wa꞉ malamane, opa iwoloye wa꞉ta sesalemale sopo,” diyo.

14 Epalati Godta Moses watle epo atlaiyo, “Hawa, na꞉ta wa꞉ gademama wa꞉ mate tlowepo,” diyo.

15 Epalati Mosesta epo atlaiyo, “Wa꞉ta ikadepe dia꞉ mate potlalo wekeli dlepiye, dia꞉ye wa꞉ta sale mo edla taiya demiya. 16 Amasiyama wa꞉ta dia꞉ mate telepiye, eta mo opi sotapo wa꞉ta ikadepe dia꞉ dla siyemhalemama dia꞉ mate hala kokoye malamelepe. Epame yia꞉tapo dia꞉ye ikadepe wa꞉ta sesalemale so opa mleni dlepe,” diyo.

17 Epalati Godta Moses watle epo atlaiyo, “Na꞉tapo wa꞉ta solotamale koko halowepo. Adipalati, wa꞉ye namkale ikadepepo. Epedeme na꞉ wa꞉ dla siyema,” diyo.

18 Epalati Mosesta God watle epo atlaiyo, “Na꞉ wa꞉ta hela꞉dle mila꞉pi ikadepe natilowe solotama,” diyo.

19 Epalati Godtapo Moses watle epo atlaiyo, “Na꞉ye Godpo. Epedeme na꞉tapo na꞉ta꞉ sesalemale so dla polowamale koko mate epo bokotiyapo malamale koko mate nati-imdepo. Epapedeme na꞉tapo wa꞉ watle na꞉ta hela꞉dle nati-imama na꞉ hi ma atlowepo. [b] 20 Amasiyama wa꞉ na꞉ mila꞉pi ikadepe tlo ponatilowa. Adipalati, na꞉ mila꞉pi ikadepe natilalo oplamiye polope,” diyo. 21 Epame matle epo atlaiyo, “Na꞉ mateka꞉pi dla teiko halaye wa꞉ edla hetame halane. 22 Epalati na꞉ta hela꞉dle mate wa꞉ hala dla pumama na꞉ do mate wa꞉ye kukomama teiko dulu dla hemele hatiyomellowepo. 23 Epame na꞉ta wa꞉ye ma-tla꞉mtamama wa꞉ta isikimi na꞉ ko tlo natilipo depame wa꞉ye ma haliyamale dla pamollowepo. Adipalati, opata na꞉ mila꞉pi ikadepeye natilowe pta aiyalma.”

<- Ekesedes 32 Ekesedes 34 ->