Taiya dle so 8

Opata mikadepe dle so dla alli

1-3 Sol edla halemama opa Stiben ewala mate kelemha꞉ha꞉ so watle siyele yu atlemhalaiyo. Epame alotle mikadepe dle so opa opita puame Stiben motoye ta꞉la dla hamatipame sikemte a꞉liyo.

Stiben yumili alila oloma edla Yelusalem dla ha꞉ha꞉lalo mikadepe dle soye opata siyalasiyalademama wotiyalle hapilowe kotiyamaiyo. Epalati Solta aya hapuloma dla hehetamsela꞉mama mikadepe dle so opa mate wola꞉ mate hohopo tame amtuwale aya dla ka꞉ka꞉timdiyo. Epamhallati mikadepe dle so hapulomata Yelusalem tle potamalemama mo opi hapuloma dla Yudiya mo dulu dla epame Samaliya mo dulu dla potamalaiyo. Amasiyama Taiya dle so hapuloma tlo Yelusalem dla pomeliyo.

Pilipita Samaliya dla God yu atlale

4 Epalati mikadepe dle sota Yelusalem tle potame mo yimlala meyelope meyelope dle dla God yu atlamsiyamaiyo. 5 Epedeme Pilipita Samaliya mo dla tame woyapame Keliso kokoye opa watle atlamaiyo. 6 Epame Pilipita God yu atlepame ulugiyemale koko mate halomsela꞉lati natipame opata ya꞉ yu woloma haiyo. 7 Dulu edla Pilipita bataliya yimlala opa dulu dla ha꞉ha꞉leye alikili a꞉ma dodolomsallati yia꞉tapo yu teta꞉le mate alikili a꞉ma u-ulapo tamalaiyo. Epame ya꞉tapo akoloyeyalemale so mape ka꞉ka꞉diyo. 8 Epalati mo dulu edla opa hapuloma dla siyele patota elaiyo.

9-11 Amasiyama Samaliya mo dulu edla osolo walle oplami Saimon halaiyo. Epapeleye alila hapuloma dulu dla ya꞉ osolo mate ulugiyemale koko halomhalemama opa watle yiyelle halopimhalemdiyo. Epammama ya꞉ solotamdiyo, ya꞉skamu ya꞉ tlo ka꞉dena demama di dla hamhetlowedeme. Epalati opa hapuloma patoto mate epo yimlala yimka꞉sikili mate ya꞉ta ulugiyemale koko halomale natipame ya꞉ yu dla heodepo salladepo siyamama Saimon watle epo atlemdiyo, “Oplami iye godpo. Ya꞉ hiye Itiyamale Pato,” demdiyo.

12 Amasiyama Pilipita God yu atlemama God ya꞉ mo koko mate Yesu Keliso koko mate atlamsela꞉iyo. Epalati opa mate wola꞉ mate ya꞉ yu dla mikadepe dlati ya꞉tapo yia꞉ye yú dla ka꞉ka꞉timsela꞉iyo. 13 Epame osolo walle oplami Saimon i mape Pilipi yu dla mikadepe depame yú tulupo Pilipi mate sela꞉iyo. Epo sela꞉mama Pilipita ulugiyemale koko halomsela꞉lati natipame ya꞉ sikemte yiyelemsela꞉iyo.

14 Amasiyama Yelusalem dla Taiya dle so ha꞉ha꞉leta Samaliya sota God yu dalepo mikadepe dle kokoye dalepame Pita mate Yon mate Samaliya dla taiya diyo. 15-17 Epapele dulu dla Samaliya dla mikadepe dle so Yesu hi tle yú tutula꞉po ha꞉ha꞉leye Hela꞉dle Soko ala yia꞉ dla potullalo halaiyo. Epalati Pita mate Yon mate Samaliya dla puame ha꞉ha꞉mama mikadepe dle so dla dota hohopo inoma sumalati Hela꞉dle Sokota yia꞉ dla malaiyo.

18 Epapalati Saimonta koko i natipame Taiya dle so watle mani hamimama epo atlaiyo, 19 “Na꞉ ma solotama, na꞉ dota opa hohopo inoma sumalati Hela꞉dle Sokota yia꞉ dla mala demhallepo depame. Epedeme wua꞉ta itiyamale hamsiyamaye na꞉ ma hamiya,” diyo.

20 Amasiyama Pitata ya꞉ watle epo atlaiyo, “Wa꞉ mate epo wa꞉ mani mate Dlapa mo dla telepe. Adipalati, wa꞉ta malamaleta Godta isikimi namkale dle tle Hela꞉dle Soko hapimhalaye mani mate hali dlepo. 21 Epedeme wa꞉ dia꞉ mate God oko yimkata halowe po-ala꞉na. Adipalati, God mila꞉pi tle wa꞉ koko pta batalimana. 22 Epedeme wa꞉ watapo wa꞉ta batalipo malampolaleye memelepame God dla inoma sumane. Epalati pona꞉malamana, ya꞉tapo wa꞉ta batalipo malamaleye howahapo hiyostlowe sepena,” diyo. 23 Epame Pita ma ya꞉ watle epo atlaiyo, “Na꞉ natima, wa꞉ dupa dulu dla ya꞉mkale elle pato ala me-elema. Epame batalimale kokota wa꞉ye dokopala depame wa꞉ye semsela꞉po,” diyo.

24 Epalati Saimonta wota꞉mama ma Pita wolo watle epo atlaiyo, “Na꞉ solotama, wua꞉ta dapiyamteta na꞉ yilo Lod dla inoma sumelepo depame. Adipalati, wua꞉ta atlamale kokota na꞉ dla powoyamalalo wekelepo depo,” diyo.

25 Epo alotle Pita mate Yon mate Yesu kokoye opa dla atlapame matle Yelusalem dla tamama Samaliya mo yimlala opi dla opa watle God yu atlamtaiyo.

Pilipita Itiyopiya oplami yú dla ka꞉stale

26 Alila haleta God ya꞉ banakaka oplamita matle Pilipi watle epo atlaiyo, “Wa꞉ sila꞉time Yelusalem tle Gasa dla tlalo api dla tane. Api eye haowo tiyama dalupa dulu dla elapo,” diyo. 27-28 Epalati Pilipita sila꞉time taiyo. Ya꞉ api duka dla tamhalemama natilati Itiyopiya mo dla hallalo pato oplami hale aliya koa tle tamhalla natiyo. Oplami iye Itiyopiya dokopala a꞉ya Kandake mani omhalemdiyo. Epeleye ya꞉ Yu so God dla mikadepe depo Yelusalem dla inoma sumala taleta ma api duka dla pumhalaiyo. Ya꞉ api duka dla ya꞉ aliya koa tle pumhalemama God tle yu hapame molo atlalo oplami Aisayata ilimale buka sesa꞉mpolaiyo. 29 Epalati Hela꞉dle Sokota Pilipi watle epo atlaiyo, “Wa꞉ tame oplami ya꞉ mateka꞉pi dla halane,” diyo.

30 Epapalati Pilipita oplami mateka꞉pi dla kukulumtamama dallati oplamita Aisaya buka tle sesa꞉mpolla daliyo. Epalati Pilipita ya꞉ watle epo atlaiyo, “Wa꞉ wa꞉ta sesa꞉mpola yu ya꞉ dulu kokoye wa꞉ malamata꞉?” diyo.

31 Amasiyama oplamita ya꞉ watle epo atlaiyo, “Hao, ya꞉ dulu koko pona꞉malamana. Adipalati, oplami haleta yu i ya꞉ dulu kokoye na꞉ po-imasemde,” diyo. Ya꞉ epo atlepame ma Pilipiye ya꞉ mate matame polane diyo.

32 Epedeme ya꞉ta sesa꞉mpolale yuye ipo,

“Ya꞉ye aliya halo some yumuluwedeme semtauwapo.

Ya꞉ye sipi aliya dlalo kestlati woloma yu dimi hayeme elemdiye, epapele some eluwapo.

Epammama ya꞉ yu hale po-atlana.

33 Opata ya꞉ye yimka꞉mala demama

koko pa꞉le ya꞉ dla poka꞉ka꞉dle kokoye halomyeuwapo.

Epo ya꞉ye ya꞉ elo dla hallowe pohatitimana.

Epame ta꞉lamo hema ya꞉ta hallowe pasakaloye mosukulu kestauwapo.”

34 Epalati ya꞉ta Pilipi watle epo atlaiyo, “Na꞉ atlane, God tle yu hapame molo atlalo oplami iye ana koko atlema꞉? Ya꞉skamu ya꞉ koko atlema꞉, o oplami hale koko atlema꞉?” diyo. 35 Epalati asiyama Pilipita yu i dulu kokoye ya꞉ watle imama ka꞉dle yu Yesu Keliso kokoye ya꞉ watle atlaiyo.

36 Yia꞉ta madipata tamalemama aloma yemala dla tame woyamaiyo. Epalati Itiyopiya oplamita Pilipi watle epo atlaiyo, “Wa꞉ natine, aloma yemala ipiye. Epedeme na꞉ta yú tulluweye apata na꞉ api himomelema꞉?” diyo.

[ 37 Pilipita asiyama epo atlaiyo, “Wa꞉ dupa dulu dla mikadepe dle ellepiye, eta wa꞉ yú tulluwe ka꞉dena,” diyo.

Epalati asiyama Pilipi watle epo atlaiyo, “Yao, na꞉ Yesu Kelisoye God Yamipo demama mikadepe dema,” diyo.]

38 Epalati Itiyopiya oplamita ya꞉ koa hamsela꞉lalo oplami watle “koaye medla hedene,” diyo. Epame yia꞉ta madipatata tulume aloma dla ha꞉ha꞉mama Pilipita Itiyopiya oplamiye yú dla ka꞉staiyo. 39-40 Epame yia꞉tapo aloma tle matale oloma edla Lod ya꞉ Hela꞉dle Sokota Pilipiye hamame mo hale pateka꞉mu Asotus dla tame pameliyo. Epalati Itiyopiya oplamita ma ya꞉ ponatiyo. Epame ya꞉tapo tamama siyele mate ya꞉ mo dla taiyo.

Amasiyama Pilipita Asotus mo dla woyapame God yu atlepo matle Kasaliya mo dla tamama mo yimlala hapuloma dla God yu atlamtaiyo.

<- Taiya dle so 7 Taiya dle so 9 ->