Link to home pageLanguagesLink to all Bible versions on this site
19
Babylon magaram se ko amilmil biya duruk wonong te kapakaso
1 Asele ani akingtala ade gurugem ale kariimet motam biya bo duruk wonong te sokel ago iwita ai bala iwita ikiem:
“Aleluya! Anananga Kaem mu nu kota nup biya se sokel ago!
Sangaru ta ko kotam mu nu kota!
2 Mu awuk, noko tutera ko munan mu nunguning la se diram la.
Nu lage luan imet biya ko saman katagot
ko munan te ali lilim la maguwu silatiwaram mu koma memek tuam.
Nu ko ura kariimet alo nunga nungumik
gue imet umu kuting te aniram mu ko koma memek tuam.”
3 Ale akingtala ai balukasan:
“Aleluya! Imet umu kani malilawoso umu
ko bur mu uwutata pempem barasu se lagarukko.”
4 Se supuling 24, se mel mel nunup ago 4 mu nubugura kulukurman ale, Kaem ko daiga kuwim te dagiwakaso umu perr tui se aikasan,
“Amen, Aleluya!” makasan.

5 Se kuring bo noko daiga kuwim mu te balukaso:

“O nina noko ura kariimet alo, biya te,
gotek te, nu bowa ningi la bagasan mu, nanga Kaem nup biya tualko!”

6 Asele ani nirung bo tala, kariimet motam biya ai balu kam agi, yu sokel ago nagura ko nirung agi, pure sokel ago paga ko nirung iwita ai balukasan se ikiem:

“Aleluya! Mu awuk, anananga Kari Biya
Kaem Sokel Garagar, nu mel suen la bitaruwoso!
7 Bore te se ana amilmilanak, naneman
nungeruk se nup biya tunakko!
Mu awuk, Sipsip Anumang imet taukko tom kaparam,
se ko imet luan ilu beteman mu numi nungam burangaram.[a]
8 Nu guang ningo nikim ago mu tuman se naguram.”
Guang ningo umu kariimet laili ningo diram la betesan umu nunga balso.

9 Se engel umu aninga maonam, “Den imi bataguruko,” mam. “Awiriya Sipsip Anumang imet taukko umu ko amilmil inang te tairukko aira tam mu amilmilarukko!”[b] Ale den umu kunasaram ale mam, “Den imi Kaem ko den nunguning.”

10 Se ani engel umu doleng duap ningi abugura kulukem ale perr tuekko negawerem, bare nu aninga maonam, “Suwuta me bitarko!” mam. “Ani ura kari nika turantala, se nanga singsang Jesus ko den apuwasan uwutatala. Bare Kaem kota diram nup biya perr tuiko! Mu awuk, prophet den bala ko marak nunguningkiri mu Jesus ko dugu duap apura ko munan.”

Kakirip horse siraram awote daigam
11 Se ani duruk wonong kuring kaigam se ikialko, ani horse bo siraram mu arigem. Se ko kotam awote dagiwakaso mu ko nup mu Diram la betera ko kari, se Kari Nunguning. Nu munan ningo diram la te iki se kager beteso. 12 Noko motam mu tama kuamili ningi barasukam. Se ko supuling awote mu crown suen biya. Se nup bo nu kumik te batagorman mu, kariimet bo ta ko nunguning me ikiso, bare nu kota mu ko ikiso. 13 Se nu guang maiya bo gue magaram mu naguram. Se noko nup mu Kaem ko Den.[c] 14 Se duruk wonong ko kager kari guang siraram nikim ago mu nagu muruwuman ale, horse siraram la mu awote dagi muruwuman ale kowom karokasan. 15 Baenat kore wuli tamatama, ali sor sor te nunga batutumurokko, mu kuring ningi aratam. Nu kota king ko tam iluwok ale kariimet te nunga bituokko.[d] Ale nu kota waen nunguning muguri ita parusuwurokko, ale munan umu te Kaem Sokel Garagar ko gomang magara ko munan woyam kapawoso mu bitiruk se aratukko. 16 Se noko guang kualuwong luan te mu nup imi batagorman se aniso:
Kari bibiya suen la nunga KARI BIYA
se King alo suen la nunga KING

17 Se ani engel bo worem te sanamiwaram se arigem. Nu inangnang kualala bingawaman umu sokel ago nunga auram ale mam, “Tairalko! Kaem ko inang biya nungam ewere ko tai ilu biguwuralko! 18 Tai ilu biguwural ale king arika nunga nungumik nunguning, kager kari supuling se kari sokel ago alo nunga nungumik nunguning, se horse mel se nunga kari te kagersan umu nunga nungumik nunguning, se kariimet suen la, bibiya ta gotektek ta, nunup ago se nunup mena ta, ura dungan alo se ura dungan mena alo mu, suen la umu nunga nungumik nalko.”[e]

19 Asele ani mel diwang memek mu se, ali lilim ko king alo se nunga kager kari ago ilu biguwuman ale, Kakirip horse siraram mu awote daigam umu se ko kager kari nongorak kagermonko ilu biguwuman mu nungarkem. 20 Bare mel diwang memek umu se prophet kawel nu koma tokaso ale miracle bitakaso umu nunga ilu talipaman. Noko miracle umu te kariimet mel diwang memek umu ko mak taman ale ko kuar perr tuikasan umu nunga kulurukaso. Se nuna ilagala la nunga iluman ale, marak bagaman se, tama sulphur ago, kowar tamatama, yu iwita laiwoso, mu ningi nunga warman.[f] 21 Se nunga saki mu, Kakirip horse siraram awote daigam mu kuring te baenat aratam mu nunga batutumuram se kua sapaman. Se inangnang suen la mu nunga nungumik nunguning umu te nunumi kari ko beteman.

<- REVELATION 18REVELATION 20 ->