80
Kaem nanga sanguk se aking barasu sanamanakko wosenga
(Asaph wur imi batogam)
1 O Israel nanga Bitua Kari, ni anananga niara ikiko!
Ni ana Joseph ko gue nanga gira kari.
Ni ka daiga kuwim te kualala daigem se engel bibiya ka laturman,
se nika sokel wetang sapar,
2 se Ephraim se Benjamin se Manasseh ko kariimet arigimonko.
Nika sokel aora garagar wore te tai nanga sangaru toko!
3 O Kaem, gemang nangaru ale nanga sangaru toko;
nanga sangaru se girakala ningo bagaman uwuta aking baganakko.
4 O Yawe, Kaem Sokel Garagar, awuk?
Ni ana nika kariimet nanga aira wosenga ko yam buta gemang maga lagarukko e?
5 Ni namononge mu inang ko iwita nangarem se nokasan,
ale namononge yu mu bagun biya wore te iwita kuring aratam se nangarem se nokasan.
6 Ni ana balu maguwura ko mel bo iwita nanga beterem,
se sor saki nangimik duap te mu nanga balu maguwusan.
7 O Kaem Sokel Garagar, gemang nangaru ale nanga sangaru toko;
nanga sangaru se girakala ningo bagaman uwuta aking baganakko.
8 Girakala ni Egypt sor te tam waen bo taem ale karogo tairem;
ni sor saki nunga karem parusuwurem ale ali mu te tam waen mu aguwem.*Israel mu tam waen iwita: Genesis 49:22; Isaiah 5:1-7; Matthew 20:1-16.
9 Ni ko kuwim nungem burangerem ale
aguwem, se yager ali tam ale palengam ali sor ira saparam.
10 Ko tamarum mu duruk bibiya nunga ira kaluwuram,
se kower suen biya mu tam aora sida mu nunga ira saparam.
11 Se ko kower palengam namawaram Gagi Biya Mediterranean tam,
ale namawaram Yu Biya Euphrates tam tala.
12 Bare awuk se ni kar waen ningam
lautam wore parusuwurem, se kariimet
lage mu karo se mu ko nunguning gisan a?
13 Se buruk diwang ira parusuwusan se
inangnang, madar, ugigi se anapeya suen la aratasan ale no gilingisan.
14 O Kaem Sokel Garagar, ni duruk wonong te baga se,
loager se tai kaparuk se tam waen mu aking ko ari iki ale bitaruko!
15 Ni keta kiting te tam mu aguwem,
ale bituem se tam ningo ko aragam. Buta se tair ale bitaruko!
16 Kager kari memek kauman
batutumuman ale tama beteman se kaniram;
se ni tair ale gemang memek te nunga maguwurko!
17 Bare ana kariimet ni keta nika ma balem,
ale keta nunga bituem se gue pagam,
wore tai nanga sangaru ale nanga bitaruko.
18 Uwuta mu asele ana udagi te me ka betenakko.
Marak iru nangaru se ana pempem nip patawu se laganakko.
19 O Yawe, Kaem Sokel Garagar, gemang nangaru ale nanga sangaru toko;
nanga sangaru se girakala ningo bagaman uwuta aking baganakko.
<- PSALMS 79PSALMS 81 ->
- a Israel mu tam waen iwita: Genesis 49:22; Isaiah 5:1-7; Matthew 20:1-16.