75
Kaem kota suanta nu Tutera Kari
(Asaph wur imi batogam)
1 O Kaem, ana amilmil kisisan!
Nunguningta ana amilmil kisisan,
mu awuk, ni ana nangarak pingi bagasam.
Kariimet nika kiwem duap duap beterem mu ko balsan.
2 Ni balsam, “Ani agata kariimet te nunga tuterikko tom mu ko ikiwasam;
ani munan diram te kariimet nunga tutesam.
3 Ali lilim la mu yam yukuok se kariimet suen la yam uririkimonko,
bare ali ko nukuri mu ani ilukuawusam se aora biya aniso.
4 Ani nusupuling lagara ko kariimet mu
nunga manorsam, ‘Nina ninimi me patawuralko!’
Ale kariimet memek mu nunga
manorsam, ‘Nina ninip biya mu te sanamaral ale ninimi me te patawu se lagaralko!
5 Nina ninip biya sumu me te sanamaral
ale aninga angama te me kalel biya namaralko;
nina ninimi patawura ko dogotak te me munakaralko!’ ”
6 Kari bo ta koma worem bausa te agi koma worem kapara te,
agi koma aguwaya mu te tairuk ale
numi patawu se kariimet nunga tuterukko me balukko, mena.
7 Kaem kota kariimet nunga tuteso,
ale memek bitawara mu ilak kapawa se,
ningo bitawara mu nunga patawuso.
8 Yawe bagun bo kuting te iluwoso,
bagun mu ningi mu waen aora ngisuk karogo wore ningi aniso;
nu yu mu waruk se kaparuk se
ali sor lilim la ko kariimet memek bitawara mu no laga, no sapamon se nuamur bo me pelerukko.*Bagun ko den: Revelation 14:10; 16:19.
9 Bare ani mu agiring me ta kalikko;
ani Jacob ko Kaem ko balu, wur ilu se, nup butata patawu se lagarikko.
10 Mu awuk, nu iwita balso, “Ani kariimet memek bitawara mu nosokel menawurikko;
bare kariimet kiwem ningo bitawara mu
ani sokel eng bo karogo nungarikko.”
<- PSALMS 74PSALMS 76 ->
- a Bagun ko den: Revelation 14:10; 16:19.