73
Kari bo Kaem ko munan ko kuamin yena laga udagi ko sinararam
(Asaph wur imi batogam)
1 Kaem mu Israel arungu yawarakala beteso;
nu awiriya nongomang motam ningo
diram mu ningo nuam nongote beteso.
2 Bare ani mu, sanami turutuwuwakasam;
ani mu ali palenguk se dagulu namarikko iwita.
3 Ko duap mu, ani nunumi patawura ko
kariimet mu nungarkikasam ale nunga angamang magakaso,
mu awuk, nuna memek bita se wore
nunga daiga bagara mu am yawarakala.
4 Nuna ikup mena, ningo la bagasan;
ale nungumik kuera ikes mena se sokel ago la bagasan.
5 Nuna kariimet sang ikup giwasan iwita, me ikup giwasan, mena.
Nuna sokel ago se ningo la bagasan.
6 Buta se nusupuling lagara ko munan
mu kulolo balayam iwita nodogotak tugusan;
ale kariimet sang nunga bita maguwura ko kiwem mu guang ningo iwita katasan.
7 Nunga bagara ningo mu ko nomotam welang taiso;
se nunumi te patawumonko ikia duap duap nunga moso.
8 Nuna kariimet saki nunga gusirsan ale den memek nungumik ko balsan;
nuna nunumi kalel biya betesan ale
kariimet saki bala nguangara nungarsan.
9 Nuna duruk wonong te bagakoyam nunumi betesan;
ale nunga munak mu ali lilim bitarukoyam munakasan.
10 Se kariimet karo nungarsan;
mu nuna anapeya ko balsan mu am nungarsan.
11 Kariimet imitang balsan, “Kaem awuk ta ko ikiokko?” masan.
Ale “Kaem Kalel Biya mu ko sinar aruk agi?” masan.
12 Kariimet memek mu nunga kiwem mu uwutata;
nuna ikup mena, pempem yawarakala baga se
melmasak duap duap gemasan.
13 Se awuk, ani aimi ko sinar taem ale
ningo diram la baga lagasam imi ko ningo apoko?
Ani memek bo me bita arigem imi ko ningo bo me arigekko agila?
14 Tom suen biya turomola nama bainga ningi ani ikup gi lagasam;
ale pempem turomola bu to lagasam.
15 Bare ani uwuta balik, mu ani nika kariimet nunga bo iwita mena.
16 Ani ikia mel suen la imi ninguru ko ikiekko ikia aga moa lagakaso,
bare ikup biya nunguning.
17 Bare tom ani nika temple ningi kasu nagu asele aga ikia sinararam,
se kariimet memek tom udagi te
memek nungumik te aratukko mu ani ko sinarerem.
18 Nunguningta, ni sor palepalengam mu
ningi nunga awur se palungurmon ale dagulomon eng am memek tamonkowo!
19 Nuna tairatela memek biya arigimonko;
memek bibiya nunga sarumu warukko.
20 O Kari Biya, tom ni barasu sanamir, mu nuna tairate mena namamonko;
se nuna mu kari ipingira memek iluso
ale turomola kuamili sapa namoso iwitatala, ni nunga kamili saparukko.
21 Tom ani iki maguwukasam
se angamang motam dagulukaso,
22 mu ani buruk kausik ko ngualara sipira iwita aimi bitakasam,
ale ani ni ko ko ninguru me sinarakasam.
23 Bare ani pempem la ni kerak pingi bagasam;
se ni ani agiting te aga ilusam.
24 Nika ikia sinar mu te aga bitarsam;
ale tom udagi te mu ni ka sor nikim mu ningi aga aru toko.
25 Ni keta suanta ni aninga angamang motam,
se ani anape karogo duruk wonong te
se ali imi te ko kuerikko? Mena!
26 Aninga ikia se angimik mu sokel kaparuk agi wore, Kaem,
ni keta suanta aninga sail se aga ikia nunguning ko duap, tom suen biya ko.
27 Nunguningta, arikaya nika betesan ale
nika ko awar biya bagasan mu mena namamonko;
awiriya ni diram la me karo kisisan, mu ni nunga maguwurko.
28 Bare aninga amilmil mu ani ni kimik duap te bagasam.
Yawe, ni keta suanta aninga Kaem, se aninga yumura kuwim;