72
Kaem king ikia ningo se saonga tuokko ngatang
(Solomon ko wur)
1 O Kaem, nika kiwem ningo diram wore king kasuru se,
nu te kariimet nunga ikup ko ninguru iki se nungokko.
Ni mu ikup guyak ninguru nunga ko Kaem, se ni king sangaruko.
2 Se nu munan ningo diram mu te nika kariimet nunga gi se,
aking kariimet nungumik mel mena mu ninguru tala nunga bituokko.
3 Se nika munan ningo diram se bagara
ningo bitar se duruk bibiya se ali lilim la awote kaparukko,
se kariimet te ningo bagamonko.
4 Se king mu kariimet nungumik mel mena mu nubiring ko sanamaruk ale,
kariimet nungumik wonong kawam mena mu nunga gi nu bowa nunga tugumok,
ale awiriya kariimet kituwura uwuta mu nunga bita maguwuwasan,
mu nu koma ko nunga maguwurokko.
5 Se worem sige pempem nikim kapawasan iwita,
kariimet ni ko ko nguanga se bowa ningi nip patawu se lagamonko.*Juda alo verse imi Greek den te kelemak batagorman se aniso se ko bala mu iwita: Buta se nu worem pempem kani lagoso se sige pempem kani lagoso uwutatala baga se lagarukko.
6 Tuwik ningo daguloso ale ningam yu
tuso se inang yawarakala aragoso iwitatala,
king umu uwutata baga se lagarukko.
7 Tom nu king bagoso mu te mu kiwem
ningo diram mu pempem la anirukko;
sige nikinang kapa lagoso iwitatala,
bagara ningo mu pempem la anirukko.
8 Noko kuting mu maiya biya, gagi dun sang te se nama gagi dun sang te;
se ko bitua ningo mu yu Euphrates te se nama ali lilim ko komasang te.
9 Se sor garagarayam te bagara ko
kariimet suen la nu bowa ningi bagamonko;
kager kari nu ilak memek mu ko suwik
duap ningi dagulomon ale kupkup namonko.
10 Se sor Tarshish†Sor Tarshish mu aitak balsan Spain masan. ko king se tual
gotektek sang ko mu manga mel ningo ningo karogo tai tumonko.
Sor Sheba se sor Seba ko king mu
mel ningo ningo karogo tai tumonko.
11 Se king suen la nu koma te nubugura
kulukurmon se kariimet sor suen la mu nu bowa ningi la bagamonko.
12 Mu awuk, kariimet nungumik mel mena
mu nu arumon, mu nu nunga nuguring iluwokko;
se kariimet mel ko tukunangawasan bare
nungumik saonga mena, mu nu kota nunga sangukko.
13 Kariimet nungumik nosokel mena, se mel mena bagasan,
mu gomang motam nungarukko;
se kariimet nungumik mel mena bagasan,
mu nunga giok ale nunga sangukko.
14 Se kariimet saki nunga mosan
maguwusan, mu nu nunga giok ale nunga sanguk ale ninguru nunga kuerukko.
15 King mu pempem la baga lagarukkowo!
Sor Sheba ko gold mu nu tumonko!
Se kariimet nu ko ko Kaem aru ngatangarmon, ale balmon,
“Kaem ko marak sokel pempem kumik kuali kapa lagarukko,” ma balmonko.
16 Ali lilim la na inang sor magaruk,
ale duruk luan mu inang muguri rice iwita mu karogo terong maukko;
se ko tam muguri yaman nuam mu
Lebanon ko tam muguri iwita nunguning kapamonko;
se ko kariimet wonong bibiya ningi mu
gue paguk ale sor suen biya te sirsir pauk maso iwita sor ira sapamonko.
17 Se kariimet noko nup biya mu ko nungamili me ta saparukko,
se noko kiwem ningo mu worem kani lagoso iwita, kani se lagarukko.
Nu te ali sor suen la marak ningo tamon,
ale noko nup patawu se lagamonko.
18 Yawe, Israel ko Kaem, ko nup biya patawunakko!
Yam nu kota kiwem bibiya beteso se arataso.
19 Pempem noko nup biya patawunakko!
Noko nup biya nikim garagar mu ali sor suen la ari ikimonko!
Nunguningta! Nunguningkiri!