65
Na inang se mel ningo ningo ali karogo terong mam wore ko amilmil wur
(David ko wur)
1 O Kaem, ana Zion namanak ale nip patawunakko;
ale nanga ikia kerak kaloman mu bita sapanakko.
2 Ni ana nanga guranek koma nangarsam,
se ana kariimet suen la nikate taisan.
3 Anananga munan memek umu ko ikup ninguru nanga maguwuso,
bare ni anananga memek mu siwu warsam.
4 Kariimet ni nunga balsam nika masam,
ale nongorak ka kuwim laili te taisam, mu amilmilamonko!
Ana nika munan yawara yawara nika
temple laili ningi aniso mu karogo ninguru amilmilasan.
5 O Kaem, anananga Sangaru Ta Kari,
ni kiwem duap duap te nagiring ilusam ale nanga bataguru tasam.
Ali lilim ko kariimet se gagi batoga te ta
wore nikate la nunga loagara ikia betesan.
6 Nika sokel aora mu te duruk bibiya mu nunga nungem,
ale mu te nika sokel biya mu wetang saperem.
7 Ni gagi tamun ko kuring nirung kapawaram mu manem se kutek mam;
ale kariimet nunga kager ko munak nirung mu uwutatala menawurem.
8 Kariimet awar bibiya bagasan mu
nika kiwem bibiya imi arigisan ale biririkasan;
kariimet worem bausa te se worem kapara te mu wur ilusan ale amilmilasan.
9 Ni ali imi lilim la ko sinar tasam ale yu tusam se ali welang gemaso;
nika yu suen la mu nungumik maraka namara bo mena;
se nika kariimet na inang karogo terong ma sapasan.
Nika gemang uwutata aniram se ni te uwutata beterem.
10 Ni tuwik te ningam yu tusam se ali mu yu karogo,
buta se yu mu ali bugulik tuso se na inang terong la barasoso.
11 Nika ningo mu nangarsam se na inang sor magoso;
se kariimet nunga inang te gia ko kitak se korokem mu mel suen la kuring aratu saposo.
12 Sor palunga wosesel biya mu te sirsir ningo barasoso;
se duruk luan amilmil kelagoso.
13 Sor sirsir karogo mu sipsip sor magaram ale suen biya;
se duruk duap ningi sor wolong mu inang muguri karogo terong mam;