34
Ana Kaem ko nguanga se pempem bowa ningi baganakko
(David Abimelech ilak baga se kota kari ngualara ko numi beteram se kaoram. David naguram asele wur imi batogam)*1 Samuel 21:10-22:1.
1 Ani Yawe ko pempem balu se lagarikko;
ko nup patawura mu ani agiring te butata anirukko.
2 Aninga adera angimik mu noko balu patawurukko;
kariimet ikup giwasan mu ikimon ale amilmilamonko.
3 Nina ani agarak bolala la ko nup nikim garagar wore patawunakko;
ana noko nup biya se noko sail ko amilmilanakko!
4 Ani Yawe kote niarem se nu ikiam
ale aninga nguangara angimik ningi mu menawu saparam.
5 Kariimet nu kote la loaga lagasan mu nungumik guyak aso;
nuna dolara mu me nunga ira kaluwurokko.
6 Ani ikup biya ningi kaperem ale nu aurem se nu ani agiring ikiam,
ale aga ikup suen la te aga saongam.
7 Ikialko. Yawe ko engel mu kariimet noko nguangasan umu
nunga laturso ale nunga sangaru taso.
8 Yawe kau to arik ale asele ko ningo nuam mu arikko;
kariimet noko ningi yumusan mu amilmilamonko.
9 Nina noko kariimet alo, noko nguangaralko,
mu awuk, kariimet nu ko nguangasan, mu mel bo ko me tukunangamonko.
10 Lion mu tom saki na ko kuesan ale nungumik sail menaso;
bare kariimet Yawe kote loaga lagasan mu mel ningo bo ko me tukunangamonko.
11 Aninga kuriang alo, tairalko, tairal ale agiring ikialko;
ani ninga kausek se Yawe ko nguanga se
pempem la bowa ningi bagaralko.
12 Nenenga ningi awiriya marak baga se lagarukko kueso,
ale ko gomang tom ningo ningo taiwoso mu arigokko agi mu,
13 kuring kuamili te den memek bo me
baluk, ale kore sumulak te den kawel me ta balukko.
14 Nina kiwem memek nibiring tual ale kiwem ningo la beteralko;
bagara welang se lila mu nengemang tual ale ko nisipiling diruwuralko.
15 Yawe ko motam mu kariimet diram mu nungarkiwoso,
ale nunga aira ko dogowa gurugu lagoso;
16 bare kariimet memek betesan, mu nu buring gurugu nungarso,
ale nunga menawuso se udagi kariimet bo me ta nunga ikiso.
17 Kariimet ningo diram mu niasan se Yawe nuguring iluso;
nu nunga ikup suen la te nunga sangaru taso.
18 Ale kariimet nongomang motam batagam mu nongorak pingi baga se,
kariimet nunumi ikisan mel bo betemonko
me terong mu sangam nungarso.
19 Kariimet ningo diram mu ikup suen biya arigimonko,
bare Yawe ikup suen la mu te nunga sangukko.
20 Nu nunga nungumik sokel suen la ko
sinar tauk se bo ta me maga namarukko.
21 Memek betera ko kariimet alo mu memek arigimonko;
nuna kariimet ningo diram mu nunga
bita maguwuman mu ko koma memek tamonko.
22 Bare Yawe ko ura kariimet mu nunga sangaru taukko;
awiriya noko ningi yumusan mu bo me ta memek tamonko.
<- PSALMS 33PSALMS 35 ->
*^ 1 Samuel 21:10-22:1.