25
Kaem ko kiti guruga se ko saonga ko guranek
(David ko wur)
1 O Yawe, aninga Kaem,
ani nikate la ira sanamasam.
2 Aninga angamang motam nikate la bita lagasam;
ni aninga sangaru se aga kager kari me
agarak kapamon ale dolara aisimonko.
3 Awiriya noko ikia nikate la bita lagoso, mu me ta dolurukko;
bare kariimet awiriya kawel munan te lagasan mu dolomonko.
4 O Yawe, nika munan ningo aga kasuru
ale nika lage ningo aga kasuruko.
5 Nika den nunguning te aga kiti gurugu
ale ikia sinar aisko, mu awuk, ni aninga Kaem se aga Saonga Kari;
ani kowarkalal maiya nika ko amotam bita lagasam.
6 Nika gemang lila se nika kua nangara,
girakala la bita lagasam, mu ko kamili me saparukko.
7 O Yawe, aninga kulak te munan memek
beterem, ale asupuling lagara ko kiwem beterem, mu ko kamin me tugumko;
nika ningo, se nika kua nangara ko munan mu te ago ko iki ale aga sangaruko.
8 Yawe mu ningo se diram la;
se nu kariimet memek bitawara mu, nu
noko munan nunga kasurso se nuna karo tusan.
9 Nunumi karogo kapara ko kariimet mu,
nu nunga kiti guruguso ale munan diram mu nunga kasurso se karo tusan.
10 Kariimet noko den balam mu karo tusan mu,
noko munan mu yawarakala se diram la nongote bita lagoso.
11 O Yawe, nika nip biya mu ko ningo ko,
aninga memek duap duap suen la mu siwu aisuko.
12 Kariimet awiriya Yawe bowa ningi la
bagasan, mu nu lage ningo nunga kausok se nuna karo tumonko.
13 Nuna daiga bagara ningo arigimonko,
se nunga kuriang gue ali imi te terong baga lagamonko.
14 Se nuna munan umu te Yawe nunga balso noko tiran ningo maso,
ale noko den nongorak kaolam mu nunga kasurso.
15 Aninga amotam mu Yawe kote la loaga lagasam,
mu awuk, nu kota aninga sanguk se dagarok memek mu kiarikko.
16 O aga Biya, gemang aisu ale kema gurugu aisuko,
mu awuk, ani angimik saonga bo mena se angimik sokel menaram.
17 Aninga angamang motam ko ikup mu lagaram,
se ikup mu te aga sangaru se angimik guyak arukko.
18 Aga angamang yaman se angamang ikup agarak gi ale aga memek suen la siwu waruko.
19 Arikko! Aninga kager kari mu suen biya nunguningkiri!
Nuna nunga ikia te ani ago ko nongomang ninguru tala magoso!
20 Se ni aga sangaru to ale aga bitaru se dolara me aisimonko,
mu awuk, ni aninga yumura kuwim.
21 Munan ningo se munan diram mu te aga sangaru, se ani te sokel ago sanamarikko,
mu awuk, ani nikate la amotam bita lagasam.