140
Kaem ko saonga se ko bitua ningo ko guranek
(David ko wur)
1 O Yawe, ni kari memek alo nuguting te aga bataguru toko!
Aga bitaru se kager ko kari memek me aga bita maguwumonko!
2 Nuna pempem nongomang ningi ikia
memek betemonko iki gurugu lagasan.
Ale ngual ngual kager patawusan.
3 Nunga nungamili nuguring mu mot memek ko wore toroman,
mot urer ko kuating memek iwita mu nunga nungamili kopa te aniso.
4 O Yawe, aga sinar to se kari memek alo
me aga momon maguwumonko;
aga bitaru se kager daong ko kari alo aga
sapamon se dagulekko balman mu uwuta me betemonko.
5 Nunumi patawura ko kari alo mu ani aga ilumonko dagarok bo kira beteman;
nuna dagarok ko mayang lage ani te namarikko mu te kira karogo nama tai beteman.
6 O Yawe, ani ni ko ko balsam, ni aninga Kaem masam.
Aga sangaruko niara kete betesam ewere degewa gurugu ale ikiko.
7 O Yawe, ni keta suanta ni Kaem, ni aga Bataguru Tata aora;
ni kager ko tom ningi mu aninga karem yawara.
8 Ni memek bitawara alo mu nunga ikia memek mu me motam la arikko;
nunga ikia memek kaloman wore nunguning kaparuk se nunumi patawumon bore ko, maguwurko.
9 Kager kari memek alo aga laturman
agarak bagasan mu, motam la nungarkiwer se me aga kiamonko;
bare ikup ani angimik te betemonko
balman mu giris palaguk ale nongota nunga maguwurokko.
10 Tama kaok kaniwara wore nungumik
kuali waru ale tama ningi nunga waruko;
mutim du biya mu ningi nunga waru se
kapamon ale udagi me pila basumonko!
11 Kawel kari memek alo umu ali imi te kuring bo me ta nungaruko;
kager daong ko kari memek alo mu ikup memek nunga irok se memek tamonko.
12 O Yawe, ani ko ikisam ni kariimet
nungumik mel mena mu nunga bitarsam,
ale kituwura guat alo mu munan ningo diram la nongote betesam.
13 Nunguningta, kariimet ningo dirkiriyam mu nika nip biya amilmil tui se