101
King David kariimet munan ningo te la nunga bituokko ikia kaolam
(David ko wur)
1 O Yawe, ani nika kua nangara ko munan
se ka bitua ningo diram mu ko, wur ilu se ka nip patawurikko.
2 Ani aimi ko sinar taik ale munan diram te la bagarikko angamang aniso,
se tair ale aga sangaruko.
Aninga ura luan ningi munan diram la aratuk se arigekko;
3 munan memek mu amotam te aratuk se me arigekko.
Ani kariimet nubiring ni kisisan mu nunga
betera kaora mu mesam, ale me ningi bagarikko.
4 Kariimet kawel kuruwim mu arungu me dugu karikko;
ani kilek memek suen la abiring tuekko.
5 Se awiriya saki alo nubiring ko den
memek balso, mu ani kuring kalikko;
se awiriya numi patawura supuling lagara ko kilek mu te geragoso,
mu ani yam amotam la me ariwirikko, ani karikko.
6 Ani kariimet ni kiring karo tusan mu la
nunga kua se, balik se agarak bagamonko;
kariimet nunga bagara aolak diram mu la aninga ura kariimet bagamonko.
7 Kawel kari memek bo ta ani king aga bitua bowa ningi me bagarukko,
ale kariimet kuamili suring ilagala mu aninga amakete me ta bagarukko.
8 Ani turomola pempem barasik ale sor
imi te kariimet memek alo nuguring kalikko;
ale Yawe ko wonong ningi kariimet memek suen la nunga karik se watingi aratamonko.
<- PSALMS 100PSALMS 102 ->