Psalm ko batoga saki mu wur, se batoga sang mu guranek; psalm saki mu kari kota suanta ko gomang motam Kaem manarso, se psalm saki mu suen la ilu biguwura la nongomang motam Kaem kasursan. Ali imi te tom saki ana amilmil te bagasan, tom saki ikup ningi kapasan. Bare amilmil tom te agi, ikup tom ningi, wore ana pempem la Kaem nup patawu se, nangamang motam nu kasurnak, ale nu te la ira sanami se laganakko.
Kariimet bo suanta la psalm lilim me batogam, mena. King David mu suen nuam ta batogam. Se Moses, Solomon, se Korah ko kuriang alo, se Asaph Heman Ethan, kari ari imitang wur saki agotala batagorman. Se psalm saki kariimet batagorman mu nunup wetang te me aniso. Psalms ningi mu Jesus ko den yumura sang karogo balu beteman se aniso (2; 16:9-11; 22; 40:6-8; 110). Den Aleluya psalm sang ningi aniso, se ko nunguning mu Yawe nup patawuralko.
1
Kariimet diram alo se kariimet memek alo nunga den
1 Awiriya kariimet memek nunga ikia me karo tuso,
ale kariimet memek betesan mu nunga nomolak me karoso,
agi kariimet den nunguning mu mel yam ko betera mu arungu me dagiso,
mu nu amilmil ago bagarukko.
2 Nu Yawe ko den ninguru ko amilmiloso,
ale tirom woremkalal den mu ko kuamin tugu se lagoso.
3 Kari umu nu tam yu norogen te aguwa se baga ko tom te nunguning kapa se gawa me marakaso wore toroman.
Se nu anapeya nungurso mu am ningo la arataso.
4 Kariimet memek mu uwuta mena.
Nuna tam gawa merang daula itugu warso iwitata.
5 Buta se kariimet memek alo mu tutera kam te koma memek tamonko;
nuna kariimet ningo diram mu nunga biguwura ningi me bagamonko.
6 Mu awuk, Yawe mu kariimet ningo diram mu nunga bagara aolak bitaruwoso;
bare kariimet memek alo mu sarenga namamonko.
PSALMS 2 ->
Languages