OBADIAH Obadiah mu Yawe ilak tuatara ko kari bo. Noko dugu duap mu kariimet ninguru me ko ikisan, bare ko nup Obadiah mu ko nunguning mu “Yawe ko ura kari”. Noko batoga imi mu sor Edom ko baluwoso. Edom mu Jacob ko laun Esau ko nup bo. Se noko gue te ko kariimet mu nunga balukasan Edom kariimet makasan. Bare Esau ko gue te mu Jacob ko gue te mu ninguru nunga bita maguwukasan. Nunga kager kari taiman ale Jerusalem tom ilagala ilagala ko maguwuman. Nuna la mena. Bare tom ali sor saki taikasan ale Jerusalem butatala bitakasan mu Edom kariimet ninguru tala amilmilakasan. Se tom bo betela, yia tom 587 tai 586 B.C. mu ningi, Babylon ko king Nebuchadnezzar tairam Jerusalem maguwuram ale kariimet saki nunga giam arungu namaram, se verses 11 nama 14 mu tom umu ko baluwoso iwita. Edom kariimet munan umu bitakasan. Se borta ko Yawe ko gomang magara nongote bitirukko mu ko Obadiah nunga maonam. Ale Yawe nunga kingdom mu menawu saparukko mu agotala ko nunga maonam. Se tai aitak kingdom bo Edom iwita me aniso.
1Yawe sor Edom menawurokko 1 Yawe kausa yumura imi Obadiah tuam. “Ani Yawe, ani agata suanta Kaem, ani Edom ko den iwita balsam: Aninga den gilalong kari beterem se sor sor den imi karogo geragam, ‘Barasalko! Ana namanak ale Edom arungu kagernakko!’ 2 “Edom, ni ikiko. Ani ka ilu parusuwurik se sor saki nunga ningi kituwura gotek bagerko; se mel yam ko karkamonko. 3 Ni nimi patawura ko munan te nimi kulem, ale ni balsam ni garap gogong ningi bagasam, ale ka wonong mu duruk bibiya kulupik ningi aniso masam, ale masam, ‘Awiri kari nuar se ani agarak kapa aliti aga bitirukko ya?’ masam.*Edom alo nunga sor mu duruk bibiya ago. Se nunga wonong biya ko nup mu Petra (rock), mu awuk, nuna garap luan kalel bibiya mu kawam naung ko nunguru burangikasan ale ningi bagakasan. 4 Ni taraga iwita kalel biya tarigir ale baras kulupik ningi ka singir kalo ta wore ikiko, ani ka menawurik kerak kapa aliti ka bitirikkowo!” Yawe buta balam. 5 “Tere kari tirom taimon ka melmasak tere gimon, bare sang am anirukko; agi waen muguri gia ko kari taimon gimon, bare sang am anirukko tala. Bare ikiko! Nika memek taiwoso mu memek ko memek wore tairukko! 6 Esau, ni ka kariimet ago ninga mel ningo ningo mu kupumon karomon ale bo me ta bagarukko, gi sapamonko! 7 Ni sor saki nongorak nimi gemang suanta bagerem mu, ka kiti tumon kerak nama due ko ka betemonko; ninga tiran ningo mu, ninga kulurmon ale nuna kasu sanamamonko; ninga nam giam suan nengerak no giwara mu, nina me ikial se nogo ko mel memek bo betemonko.” 8 Yawe iwita balso, “Tom umu te mu, ani Edom sor ko kari sinar se nunga ikia bibiya te nunumi patawusan mu me nunga maguwurikko e? Mena. Mu ani nunga menawu saparikko! 9 Ni Teman wonong, ka kari sokel ago mu biririkamon ale nguangamonko, se kariimet Esau ko sor duruk ningi anisan mu kager te kua sapamonko. 10 Esau, ni ka uria Jacob ko kariimet arungu bita karo lagakasam, buta se ni dolara aromemek ka iramurok se ni eng ka menawurokko. 11 Mu awuk, tom kager iwareng mu kager te nunga wonong ningi kasu naguman ale nunga mel ningo ningo gi parusuwu karogo namaman, mu ni nononga bo iwita nimi beterem ale Jacob me sangem.†Psalm 137:7 ago arikko. 12 “Esau, ni awuk se ikup tom mu ningi ka uria buta ari maguwurem? Ale Judah kariimet memek biya taman mu ko amilmilakasam? Ale siwik kopa bang bang bagakasam? 13 Ni awuk se aninga kariimet sor saki nuguting te memek ningi bagaman se ni wonong tuagu ningi kasu nagurem ale ikup mu ningi nungarki daleluwu se, ni ago la nuguting kunaserem ale aninga kariimet nunga melmasak ningo ningo gi ago namerem? 14 Ni lage suring ago sanamerem ale aninga kariimet nagu namakasan mu nunga ilu kager kari nuguting te nunga awukasam, mu ni munan memek nunguning beterem. 15 “Yawe ko tom sor sor umu te nunga maguwurokko mu tai pingi aram. Edom, ikiko! Ni munan beterem mu uwutatala ni kimik te aratukko.‡Galatians 6:7 arikko. 16 Ni ninguru ikiko! Ni aninga duruk laili mu te aninga kariimet yu ko nunga utu naem uwutatala, ni sor sor suen la mu arungu aninga angamang magara mu yu ko kuakoyam no laga, eng am karogo maga namaralko. 17 “Bare aninga kariimet nuamur bagasan mu tai duruk Zion te saonga tamonko, se aninga duruk laili mu pempem laili anirukko; se Jacob ko kariimet gue mu ali ani nungarem se kariimet saki nuguting te taman mu akingtala kotam awumon ale butata te bagamonko. 18 Jacob ko kariimet gue mu lilim la tama iwita kaniwomon, se nunga ningi Joseph ko gue mu tama kuamili iwita barasuwurukko. Bare Esau ko kariimet gue mu sua marakam merang iwita se tama betemon se kani malilamonko. Se kariimet gue mu bo ta me marak bagarukko.” Imi Yawe ko kuring se uwutata aratukko. 19 Se Negev kariimet mu Esau ko sor duruk umu tamon, se aninga kariimet saki duruk duap ningi bagasan mu Philistia alo nunga ali sor mu tamonko, ale Ephraim se Samaria nunga sor welang mu agotala tamonko. Se Benjamin ko kariimet gue mu Gilead sor nobowa tugumonko. 20 Se Israel alo nunga karoman se awar namaman ale aking taiman Canaan bagasan mu ali umu namaram nama Zarephath tam mu kotam awumonko. Se aga kariimet saki tala, Jerusalem beteman ale nagu namaman Sepharad bagasan mu, pelemon ale Negev sor ko wonong suen la mu gi gi namamonko. 21 Se Yawe ko kariimet alo nunga bataguru tata alo mu Duruk Zion te nama tarigimon ale baga se Esau ko sor duruk mu lilim la bitarmonko. Se Yawe kingdom mu lilim la ko kotam.
- a Edom alo nunga sor mu duruk bibiya ago. Se nunga wonong biya ko nup mu Petra (rock), mu awuk, nuna garap luan kalel bibiya mu kawam naung ko nunguru burangikasan ale ningi bagakasan.
- b Psalm 137:7 ago arikko.
- c Galatians 6:7 arikko.
- a Edom alo nunga sor mu duruk bibiya ago. Se nunga wonong biya ko nup mu Petra (rock), mu awuk, nuna garap luan kalel bibiya mu kawam naung ko nunguru burangikasan ale ningi bagakasan.
- b Psalm 137:7 ago arikko.
- c Galatians 6:7 arikko.