Bala saki wetang awura ko den
B.C. Before Christ Kristus ali imi te me tairam la ko tom te. B.C. ko yia kaura mu kualala biya te duap bitar ale karo gotek 1 te iwita kaur kaparko. A.D. Latin den te Anno Domini In the year of our Lord Kristus tairam ko tom te se tai aitak.
Aaron: Aaron mu nu Jacob ko kuriang bo, nup Levi, wore ko gue te aratam. Juda alo nunga ningi nu giram priest ko aratam, se kari noko gue te arataman mu la priest ura bitakasan. Nu Moses ko laun, se ilak wete ura bitakasan.
Abraham, Isaac, Jacob: Abraham Isaac se Jacob alo mu Israel kariimet nunga taleng girigir usir. Nononga dugu duap Genesis chapter 12 nama 50 mu te aniso. Abraham ko nuwus nunguning Sarah mu kuriang Isaac iluwam. Se Isaac ko nuwus Rebekah nu kuriang singisik Esau Jacob ilak nunga iluwam. Jacob ko nup bo Israel, se ko kuriang kari mu 12 pela, se nanawus suwanta mu Dinah. Abraham nu Kaem ko den nu maonam mu ko gomang ningi nunguning aram se ko kuring karo tuikaso. Buta se kariimet arikaya nu beteram iwita nongomang ningi nunguning aso, mu nu nunga girigir iwita bagoso: Romans 4.
Adonai: Nup Adonai mu Kaem ko nup bo, Hebrew den te. Wetang awura ko den Kaem se Kari Biya arikko.
Altar: Altar mu Kaem te tama bita tua ko kuwim, kariimet te Kaem kote pingi namomonko. Motam motam nuna manga bolala awukasan karogo tarigikasan, ale sipsip mel moakasan mu patawu awote bitakasan ale tama bitakasan. Udagi nuna altar bo ain brass te nungurman ale kawam sel agi temple ko por ningi beteman se anikaso. Bare Jesus tairam mu nu kota numi tama beteram:
John 1:29;
6:51;
Ephesians 5:2;
Hebrews 10:12. Buta se aitak ana Kris alo nanga tama bita Kaem tua mu girakala bitakasan iwita mena:
Romans 12:1-2;
1 Corinthians 5:7-8;
Hebrews 13:10.
Annas Caiaphas ilak: Annas mu nup biya sokel karogo bagakaso. Yia tom A.D. 6 mu te nu priest supuling ko aratam. Ale yia tom A.D. 15 mu ura umu te menaram, bare ura nup mu eng kote anikaso. Se udagi noko kuriang 5 tala mu suwan suwan ura mu ilukasan. Ko noton Caiaphas mu yia tom A.D. 18 nama 36 mu te priest supuling ko bagakaso, se noko tom te Jesus moman se kueram. Nuna suen la mu Sadducee. Annas Caiaphas ilak:
Luke 3:2;
Matthew 26:3,57;
John 11:49-51;
John 18:13‑28;
Acts 4:6.
Apostle: (Greek den te apostolos) Den apostle mu ko nunguning mu iwita: “den gilalong gi karogo namara ko kari”. Jesus mu apostle tala, mu awuk, nu Kaem ko den gilalong karogo ali imi te tai kaparam:
Hebrews 3:1.
Asia: Rome ali sor suen biya bitarukaso tom te, Asia mu province bo ko nup. Province umutang mu aitak sor Turkey masan mu te aniso. Aitak ana India, China, se sor saki koma east mu te balsan “Asia” masan, ale ali sor Turkey ko pingita mu balsan “Asia Minor” agi Middle East masan.
Babylon: Babylon mu wonong aromemek bo Yu Euphrates (Yufretis) norogen te anikaso. Se wonong umutang sor aitak Iraq masan umutang te anikaso. Babylon wonong ko nup motam motam mu Babel makasan. Nimrod wonong mu nungam:
Genesis 10:10. Se mu te kariimet nunumi patowara ko kilek beteman ale kawam kalel biya kaloman:
Genesis 11:1‑11. Udagi Babylon kari supuling mu sor suen biya tala bitarukasan. Nuna Israel kariimet ninguru nunga bita maguwuman:
Matthew 1:11-12,17;
Acts 7:43. Bare Isaiah Jeremiah ilak giriman balman butata, Persia kariimet kager te Babylon wonong maguwuman se aitak me aniso. Aitak Babylon ko balso mu kariimet ali imi ko munan mel ko kuesan ale Kaem ilak kagersan owore nunga balso. Revelation chapter 18 mu ago arikko.
Balaam: (Belam masan) Balaam mu prophet bo: Numbers chapter 22 nama 24. Tom bo Moab kariimet nunga king Balak mu nu Israel kariimet arungu kagerurukko. Se nu Balaam kote den beteram, “Tair ale Israel nunga bita maguwura ko den balu se koma manga biyala kisekko,” mam. Se Balaam den mu ikiam bare kilek umu bitirukko miakaso. Bare udagi te nu aking ko ikia gurugam ale aking kilek mu bitirukko ago kaeyakaso, ale donkey te aragam ale namakaso. Bare Kaem ko engel bo donkey koma siruwuram se donkey arigam ale sanamaram. Bare Balaam mu engel arigokko me terong se donkey aolak iluwokko moakaso. Bare donkey miakaso ale kuring paogam ale ining tuam. Se Balaam Balak kote nama aratam mu nu Israel nunga maguwura ko den bo me balam, marak den ningo la nogo ko balam.
2 Peter 2:15-16;
Jude 11;
Revelation 2:14. Bread Yeast Mena Nana ko tom: Passover tom arikko.
Caesar: (Sisa, Kaisa) Rome alo nunga supuling biya bo ko nup Julius Caesar. Se kari sikina udagi nu kuwim tokasan mu nunup te nunga arukasan ale nup Caesar mu karogo bitakasan. Nup Caesar mu ko ikia “kari dom” iwita. Caesar Augustus:
Luke 2:1; Caesar Tiberius:
Luke 3:1; Caesar Claudius:
Acts 11:28; Caesar Nero:
Acts 25:8.
David: David mu Juda alo nunga king bo bagakaso, ko tom 1000 B.C. iwitata. Se noko gue te Jesus aratam:
Matthew 1:1-17 se
Ruth 4:13-22.
Den gilalong yawara: (gospel, gutnius, Greek den te evanggelion) Anuwa marak kari John se nanga Kari Biya Jesus mu kingdom owore ko den gilalong kariimet nunga manorman:
Mark 1:14-15;
Matthew 4:17;
9:35. Se Paul den gilalong mu tukunangta ko iwita balam, Jesus kariimet nunga memek siwurokko kueram, se mutim tuguman, se day tom 3 mu te aking barasam:
1 Corinthians 15:1-7 arikko. Kariimet nu te la ningo arigisan ale kingdom ningo tasan. Nup gospel mu ko duap iwita: girakala ko English mu te “godspell” makasan, se ko nunguning mu “good story”.
Dragon: Aitak ali imi te dragon mena. Bare girakala mu dragon bibiya kawam digo iwita bagakasan. Nunga ariga mu tagala iwita. Dragon mu Satan ko nup bo:
Revelation 12:3–
13:4.
Engel: (Greek den te anggelos) Nup engel ko nunguning mu “den ta ale ago tai bala ko kari”, se English den te “messenger” masan. Engel alo mu Kaem ko ura kari, duruk wonong te ilak bagasan. Tom saki Kaem nunga manarso se ko kariimet nunga sangarmonko taisan:
Acts 12:6-11;
27:23;
Hebrews 1:14. Aking ura saki betemonko taisan:
Genesis 19:1-29;
Revelation 7:1. Nuna bur se me nungarkasan. Bare nunumi wetang te betesan mu asele nungarkasan. Engel alo nunga supuling biya bo mu nup Michael:
Jude 9. Se engel biya bo tala mu nup Gabriel:
Luke 1:19,26.
Greek kariimet: Tom imi te Greek kariimet nunga wonong gira mu Athens, se nononga ali sor ko nup mu Greece. Girakala nuna sor saki ko kariimet agotala nunga bitarukasan, se kariimet umutang Greek den ikiman ale te munakakasan, ale nunga munan saki agotala karo tuikasan. Greek kariimet nononga kaem kawel suen biya, se temple se kaem kawel nodora suen biya tala:
Acts 17:16,22-23. Udagi Rome kariimet nongorak kagerman ale nunga kiaman, ale nunga ali sor bitarukasan. Nuna Greek den ikiman tala, ale te munakakasan. Se kari New Testament batagorman mu Greek den te bataguru gilingiman.
Hebrew den, Greek den, se Aramaic den: Hebrew den mu Israel kariimet nunga den, se Old Testament mu Hebrew den se Aramaic den te batagorman. Se tom Jesus ali imi te tairam mu Greek den mu sor suen biya te munakakasan, buta se New Testament mu Greek den te batagorman. Hebrew den se Aramaic den mu ko ikia se bala mu pingi pingi. Aramaic den saki
Mark 3:17;
5:41;
7:11,34;
14:36 mu te arikko.
Herod: Nup Herod mu kari supuling ilagala ilagala nunga nunup.
1. Bo mu Herod Biya, Herod the Great (
Luke 1:5). Nu Esau ko gue te ko kari bo. Tom Jesus bilangaram tom te nu Judea sor bitaruwakaso (yia tom B.C. 37 nama B.C. 4 iwita). Ale Juda alo nu te ko kuemonko nu temple biya Jerusalem kaolam. Bare noko kilek memek biya. Nuguta balam se Bethlehem kuriang nunga moman se kueman (
Matthew 2:16-19).
2. Se noko namar bo mu ko nup Herod Antipas. Nu Jesus ko tom te Galilee sor bitaruwakaso. Nuguta balam se Anuwa marak kari John mu dogotak batagorman (
Mark 6:14-28). Se Jesus Herod imitang ko tom bo te balam mu kausik diwang ko ma balam (
Luke 13:31-32). Nuna Jesus diruwuman ale Herod imitang kote ilak namaman (
Luke 23:7).
3. Se Herod Biya ko numas bo mu nup Herod tala, se ko nup bo King Agrippa. Nu balam se James moman se kueram (
Acts 12:2). Noko numi patowara mu ko, kuera memek tam ale kueram (
Acts 12:20).
4. Noko namar mu nup Herod Agrippa tala. Paul king imitang moke te numi duap balam (
Acts 25:13-26:32).
Israel: Israel mu Israel kariimet nunga girigir Jacob ko nup bo:
Genesis 32:28;
35:10. Se ko gue te kariimet arataman mu nunumi balman “Israel kariimet” maman. King David ko namar Solomon kueram mu te Israel kariimet pagaman motam ilagala arataman. Kariimet koma south mu te bagakasan mu nunga ali sor nup beteman Judah maman, se nunga wonong biya mu Jerusalem. Se kariimet koma north mu te bagakasan mu nunga ali sor nup beteman Israel maman, se nunga wonong biya mu Samaria. Udagi, yia tom 722 B.C. mu te, Assyria ko kager kari taiman ale Israel ko kariimet ura dungan ko nunga giman ale arungu namaman. Se aking yia tom 586 B.C. mu te, Babylon kager kari alo Judah sor ko kariimet nungumik te butatala beteman:
Matthew 1:12. Se udagi te kariimet suwan suwan ta pila pila nunga sor te taiman. Bare nongota nunumi me bitarukasan, ali sor saki ko king nobowa ningi bagakasan.
Yia tom A.D. 70 mu te, Rome kager kari alo taiman ale nunga temple parasuwuman:
Luke 21:5-6; 20-24. Se Israel kariimet suen biya parasaman sor sor namaman bagakasan. Ulengkota saki nunga sor te pila pila taikasan, ale 1948 mu te nongota nunumi bitua duap beteman, ale nunga ali sor nup Israel beteman. Se ana nup ilagala te nunga balsan: Israel kariimet (Israelis) se Juda kariimet (Jews). Tom saki ana nunga balsan Hebrew kariimet (Hebrews). Nononga girigir bo nup Eber ewere te se:
Genesis 10:24-25;
11:14,16-17.
Jawe: (Hebrew den te JHWH; English den te LORD, Jahweh, Jehovah) Kaem Moses ilak munakawaram se Moses Kaem isuam, “Ka nip balu se ikiekko,” mam. Se Kaem Hebrew den te numi nup balam “Jawe” mam, se nup mu ko nunguning iwita: ani bagasam. Se ko ikia mu nu tom suen biya uwutata Kaem baga lagoso. Juda alo nup mu balmonko nguangakasan. Se nuna Kaem den kaukasan ale tai nup mu arikasan mu gurugukasan ale nup Adonai mu te balukasan. Tom sikina Jesus numi balukaso “ani bagasam” makaso, mu awuk, noko nup mu Jawe tala. Se borta ko Juda kari saki nongomang ningi nunguning mena mu manga te usagomonko ilak kaeman:
John 8:58-59.
John: John mu kari bo suwanta ko nup mena. 1. John bo mu Anuwa marak kari John. 2. Se Zebedee ko kuriang ilagala, James se bo John tala. Nuna Jesus ko olekem alo. 3. Simon-Peter ko nuet ko nup mu John tala. 4. Se Mark ko nup bo John tala.
Joshua: Tom Moses kueram mu Joshua Israel kariimet nunga giam ale nongorak ali Canaan Kaem balu nungaram mu te nongorak namaram. Nuna kariimet saki ali mu te bagaman mu nunga karo parasuwuman. Se Joshua mu ali mu pakakumuram ale Israel ko digo komal 12 mu nungaru gurugam. Bare Levi ko digo komal mu ali bilik bo me nungaram, mu awuk, nuna priest ura betemonko. Joshua mu kari dom yawara. Nu kariimet nunga maonam, Kaem la kowom karo se lagomonko mam.
Acts 7:45;
Hebrews 4:8. Juda alo nunga tom bibiya: Juda alo yia suwan suwan ningi nunga tom bibiya karogo. Tom mu kapa nungarukaso mu Jerusalem namakasan ale Kaem aguwaya nunga saongam mu ko nungamin tugukasan ale amilmil te nup patawukasan. Juda nunga tom bibiya nunguningkiri mu bo Bread Yeast Mena Nana ko tom se Passover masan, bo Pentecost masan, se bo mu Sasal sapara ale ningi bagara ko tom.
Juda: Kariimet suen la Jacob ko gue te arataman mu ana nunga balsan “Juda kariimet” masan, kam sikina “Israel kariimet” masan (English den te Jews, Israelites).
Judea: (Judia) Greek alo se Rome alo Judah se Benjamin kariimet nunga sor nup beteman mu Judea maman. Jesus ko tom te Judea mu province bo ko nup, se ko wonong gira mu Jerusalem.
Judah: Judah mu Jacob ko kuriang bo ko nup, se ko nup bo Israel tala. Jesus mu Judah ko gue te aratam.
border="1">
| Hebrew | Greek | Waskia | English |
| El / Elohim | Theos | Kaem | God |
| Jawe | Kurios | Jawe | LORD |
| Adonai | Kurios | Kari Biya | Lord |
| Meschiach | Christos | Kristus | Christ |
Languages