GENESIS 9

Kaem Noah ilak den kaolam

1 Kaem Noah ko namarari ago marak nungaram ale balam, “Nina te ninga kuriang gue kaparuk ale ali sor imi karogo terong ma saparukko. 2 Melmasak suen biya, bibiya ta, gotektek ta, ali te se kualala bengesan se gagi ningi mu nenenga ko biring biring mamon, se nina nunga bitualko. 3 Nina melmasak suen la marak baga se nama taiwasan mu inang ko am nalko. Ani sume galuk nina nalko ningarem iwitatala, aitak ani mel suen biya ningarsam, mu nina am nalko.

4 “Bare anapeya mel, ko nunguning marak gue ago, mu me nalko. 5 Awiriya, bo moruk se kueruk ale kumik gue kaparuk, mu koma ikup taukko. Se anapeya mel diwang bo kariimet bo moruk se kueruk ale kumik gue kaparuk, mu koma memek tualko.

6 “Ani Kaem, se agata aga aimi adera ari se kariimet nungem;

buta se awiriya kari bo moruk se kueruk

mu nu betelatala kari kuting te kuerukko.

7 Bare nina mu, nina te gue paguk ale ali sor karogo terong ma saparukko.”

8 Se Kaem Noah ko namarari nongorak nunga maonam, 9 “Aitak ani ni se ka kuriang imas taleng girigir alo mu nengerak den imi kalosam, 10 ale mel suen biya marak karogo, inangnang se melmasak lila wonong ko se diwang giarum ko, dal ningi baga nengerak ali te kapaman, wore nongorak den imi koma suanta tala kalosam. 11 Den nengerak kalosam mu iwita: mel marak anisan mu udagi tuwik lom biya me ta nunga maguwurokko. Aking udagi lom biya sor me maguwurokko tala.”

12 Ale Kaem balam, “Ikialko. Ani den nengerak kalosam imi ko kausa bo betesam, kausa imi arigal mu den ani nina nengerak kalem, kumik menara mena, mu ko ningamin ares maukko. 13 Se ani kausa mu magulep taiti nuwi ningi betesam, mu aninga den ali lilim la ilak kalem mu ko kausa anirukko. 14 Tom ani taiti nuwi bitirik se aratuk, se magulep karogo aratuk se arigek, 15 mu ani den nengerak kalem mu ko angamin ares maukko, ani udagi yu lom biya te ali lilim me maguwurikko. 16 Tom ani magulep taiti nuwi ningi aratuk se arigek, mu ani nina kariimet se melmasak suen la marak bagasan mu nengerak aga den pempem la anirukko kalem mu ko angamin ares maukko.”

17 Kaem udagi tala Noah maonam, “Aninga den nina se mel suen biyala marak bagasan nengerak kalem mu magulep te la ko ikialko,” mam.

Noah ko kuriang alo

18 Noah ko kuriang dal beteman ale arataman mu Shem, Ham, se Japheth. Se Ham mu Canaan ko nuet. 19 Noah ko namarari ilagala suan umu te kariimet gue pagam ali lilim iramuram.

20 Noah kuting gege nagura ko kari. Se nu waen ningam bo aguwam. 21 Udagi nu waen sang nam ale ngualaram, ale ko guang kutuwu waram ale nunguning la ko kawam sel ningi aniwakaso. 22 Se Ham, Canaan ko nuet, mu tairam, ko nuet nunguning la aniwaram se arigam, ale peleram namaram ko launuria ilagala mu nunga maonam. 23 Se Shem Japheth ilak guang bo taman, ale nubiwinang te beteman, ale nubiring ko aolak iluman nama kawam sel ningi kasu naguman, ale nonet nunguning la aniwakaso wore kumik arigimon bore ko, nomotam kaluwu se guang taman nonet te ereman.

24 Se udagi te Noah ko ikia dirmam, se ko kuriang Ham nu kumik te munan beteram mu ko den ikiam. 25 Ale nu kuriang umu ko den iwita balam:

“Canaan mu ikup biya nunguningkiri irokko!

Nu noko launuria nunga dungan kari ko bagarukko.”

26 Ale aking balam,

“Yawe nup biya, Shem ko Kaem!

Canaan nu Shem ko ura dungan kari ko bagarukko.

27 Aninga angamang mu Kaem baluk se Japheth ko gue paguk ulalaruk,

ale nuna Shem ko gue te mu nongorak nongorak bagamonko;

se Canaan noko ura dungan kari bagarukko,” mam.

28 Tom yu lom duap beteram mu Noah ko yia tom mu 600.*Genesis 7:6. Ale yu lom buring ko mu 350 yia tala iwita bagaram. 29 Noko marak bagara tom lilim la mu 950 yia baga asele kueram.

<- GENESIS 8 GENESIS 10 ->