96
1 Ginda kau kayuk kaknga aknga Buyambam tapae tainong.
Ginu kepna kepna nana aminu kuupbam sikngata Buyambam tapae kau tainong.
2 Kau Buyambam tapae tainong. Taike itane umana yatangenatnong!
Tapduk tapduk ginda aminbamu anzing yanikapnong. Buyambam tapata inane aminu panggakge yanikapnong.
3 Ginda itane umana kopsa akngae aminu kepna kepna nana dongu kuupbamde yanikapnong.
Yanikapmake puya gwaang gwangu buyambamu ita tasinggakge yanikapnong.
4 Dasingge? Buyambamtapa umana kopsaapa. Ge ninda umana kumzang siknga yatangenatnim.
Sike anutu pupuknga wa Buyambamtapa binga dua. Unzingge ninda ie gepbiatang koyutnim.
5 Dasingge? Anutu pupuknga aminu dongu kundutane, wa Anutu siknga dua.
Siwan ngana Buyambamtapa sangabamu ena kakaa komune nana pasike pekut tapa unin.
6 Buyambam tapata inane yotnane yuke umana kopsa siknga king kapa yuak.
Siwan ita kekeknga akngatane toiknga. Siwan sanga gwaamgwaamde toiknga.
7 Ginu aminu kuupbamda itane umana kopsa akngaat
gatu kekeknganaat ngangge apbakngake yatangenatnong.
8 Ginda Buyambam tapatane umana kopsa akngae yatangenatnong.
Sanga kundu ie imunangge pake yotnane kopnong.
9 Ginu aminu kuupbamda Buyambamtapa takwan yuak kapae munu puke inimbaknganong.
Inimbakngake ginda ie akgwauke dandansa yamutnong.
10 Sike ginda aminu keu komdu komdune nana kuupbamu anzing yaninong, “Buyambamtapa king kapa yuak.”
Siwan ita kepdaka tapan kekekawan saa sinanga dua.
Masande Buyambam tapata kepi noman takngane wam usanzike aminbamu yuyuknga yuaing kakngane usanziwik.
11 Sanga kakaa komune nanaat gatu aminu kepna kepna nanaat ngangu ginda apbaknganong.
Yanggabam gwen gatu sangabamu gaatang yuaingu kuutda gakngatbam tasike ayanggamatanong.
12 Puya anga kuupbam gatu nanamu kuupbamu gaatang yuaingu ginu kuupbamda apbaknganong.
Siwana katau zongaatang nana kuupbamda kau apbakngake tainong.
13 Dasingge, Buyambam tapata apuke aminu
kepna kepna nana kuupbamdane wam usanzitnangge apik.
Siwan ita aminu kuupbam kepi noman takngane usanzike tasiwik.