91
1 Aminu tapatuta Anutu enane siknga yuak kapae kuwan, Anututa kakuya tasiwikge.
Siwan Anutu kekekngana bamban tapae inengan siknga yuwawan Anututa usikwatapik.
2 Siwan aminu waapata Buyambamtapa anzing iniwik,
“Gata na takotnake na gata katak nanduyuwayak.
Ga natane Anutuna.
Nata gae baniu asinggat.”
3 Siakan siknga, Anututa ga katak ganduyuwanu aminu kunduta gutnangge natake bungep pasining ngana ga dua tasiwan maiya.
Siwan ga atakotnawanu maiu wai akwakga ga dua taning.
4 Ita ga katak usikwatapik. Unzing taau minga gwenda mateknga piata usikwatapmanggak binga.
Ngan, ina unzakan ga Buyambam tapatane pia sayatde gepbiatang kusopuwi ita ga ganduyuwik. Sike i akganduyutnanga akngae kemu dua yanggak.
Unzingge ga Buyambam tapaat yutzon. Unzing aminda amakgane tiunggu sande maseatang kusopunggak binga.
5 Sike zikaanen, sanga wai tapatue dua gwaumza.
Siwan kwakngaomun, sanga takngatuta zeetgaman apu ga tasiwan maiwiakge dua gwaumza.
6 Sike gatu zikaane maiu buyambamu takngatuta apan kakengu dua gwaumza.
Ina unzakan, sanga wai takngatuta gunzitbam tapane gata maiwiakge apan kakengu dua gwaumza.
7 Sike amak aminda aminu 1,000-nu zipa gae wesim kumning.
Siwan 10,000-da katakga siapa saak kumning. Kupanu undanga.
Sanga kumnanga aknga gaenganu dua apik.
8 Unzingge dua gwauke gika kaawinu
Anututa waiaknga wai aminda tasikingge yake meya ayamik.
9 Ga Anutue kuke sanga waiakngae akusopunggayaunin,
siwan Anutu enane sikngaapata ga ganduyuak kapanin.
10 Ngan, ita ga tapan takekan yuwi sanga waita gae apnanga dua.
Siwan maiu buyambamu takngatu gae yotdane wesimu kunanga dua.
11 Dasingge, Buyambam tapata puya angelanae yaman
kepi kuupbamu sukuwiyau ita gandutning.
12 Siwan angelata katakngata ga tapa
kenzomba sup gwene dua tepsa.
13 Siwana gata kaap zongu laion gatu gomok waiaknga ngang yainggamumza.
Ngan, kaap zongu gumbanga laion gwekat gomou buyambamu waiakngaat yaipapaakusiwi dua gasisan.
14 Anututa anzing yanggak, “Nata aminu nae siknga nataaingu apapit.
Ngan, aminu nae katak siknga nataaingu nata katak siknga kayuwit.
15 Sike tapduu aminda nae tumuk wam yaningu nata atnatayamit.
Sike meya takngatu waaminde apanu na iat yutnim.
Iat gatake yuke waaminu apake umana kopsa yamit.
16 Siwana nata kayuk yutnanga aknga yamuke isapakopa tapduu mamaya yutning.