82
Kau aaknga Asapda matakut.
1 Anututa yekaune pout buyambam gwekatang tupan tapa dakngake yuak.
Sike aminu buyambamu wam usanzikaing aminda wamna usanzitnangge apuke unekan yuwawa Anututa aminu kuupbamdane wamna usanzikgaak.
2 Ita anzing yanggak, “Ginu wam yak gwene koke kem wam yake wamu dua yawan nomatakaing.
Asikaya wai aminu ginda kaa wam yanikaingunin.
3 Ginda waatdaka kundu nana gwa kupsa aminu gatayamunong. Waaminda sangana wena yuaingu gatayamunong.
Siwan aminu kundu meya gwaamuke take dua yuaing aminu kuut take pasiyamunong.
4 Sike aminu kundu wai yuke sangae dapmakaingu
ginda waaminu wai aminde kataune sandeke panong.
5 Natdetdetna wena, siwan katum siknga. Kepi zikaa dakaatang sukukaingunin.
Unzingge sangabamdane yapii aanggaman dua kake nangaakan natake aminu kuupbamda noman taknga dua tawakaing.
Unzing miamunda buyambam siknga singgak binga.
6 Nata anzing yanikum, Ginu aminu tupan siknga apa apa anutu binga yuaing.
‘Ginu Anutu enane siknga yuak kapatane waaknga.’
7 Siwan ngana ginda aminda akungwakaing binga kumning. Siwan gindane kayuk yutnanga akngasa wena asiwik.
Unzing king tapa apatane kayuk yutnanga aknganata wena sining binga.”
8 Anutu, gata enake apu aminu kepna kepna yuaingu kayuke usanziyo.