31
Devitda kau aaknga matakut.
1 Buyambam tapa, nata gatane gepbiatang koke kusopuwawa
gata iwana dua kapewi na tasiwa maike maakawit.
Ga dundumna siknga apa, gata na gatuka tapi nata wai dua siwit.
2 Gata nae wam natake na zeetgaman gatuka tapso.
Ga tawanu buyambamu supna kaya daka binga yuayakge
nata undang kusopuwit.
Siwan gata na katak siknga wamanapmambi take yuwawa iwanata na dua tasiwa maiwit.
3 Ga unzing nata akusopunanga tapa binga siwan gata na kakuya tasinggayak.
Gata tupan kuke na nanitake kepi noman takngane nanitakuyo. Unzing gika tupa gwa yakuyak kaknga tawake tasinggayak.
4 Sike iwanata yapapna tewa nata undang pukuwa na tanangge tasikaing.
Gata na asiknga kakuya tasiwi nata meya waaknga dua papit. Dasingge, ga nata akusopunggat tapa gakan.
5 Nata ninane waunga gatane katakgane teat.
Buyambam tapa, ga Anutu sanga noman takngakan tasinggayaunin, gata na gatuka tapso.
6 Sike nata aminu anutu pupukngae yanindatakaingge apbitanggat.
Siwan ngana na Buyambam tapae banip singgat.
7 Sike gata nae butaya asinggan natangamunggayak.
Unzingge nata gae apbaknganggat. Dasingge, gata meya natapbum taknga akakuyak.
Ngan, gata natane musipmaatang meya takngatu takngatu natapbumu atnatapbuyak.
8 Gata iwana dua kapewi waaminda na kaautde dua taking.
Gata na gatangami na keu kakaa komune take yuat.
9 Buyambam tapa, na meya buyambamu kaya.
Unzingge nata kwanamu kumzang sikgawa kainata atzukngaing.
Siwan kwatana tuyuknga singgakge gata nae musip kwikwik natangamuyo.
10 Siwan musipmane meya nataat takngata na kayuk yutnanga aknga atzipmandaknganggak.
Na kwanamu asinggan sike na tapduu mamaya yutnanga dua singgak.
Na meya buyambam siknga. Unzingge natane kekekngana wena singgak.
Siwan natane kwatana kuupbam atuyukakaing.
11 Sike iwanata na atnanisapdukaing.
Siwan notna take yuamangga nae masa namukaing.
Sike nata kepiapane kuwawa
na nandupnangge bitake kusopukaing.
12 Sike aminu kuupbamda nae gwa botaking. Unzing na aminu akupa kwaike botakaing binga yukum.
Na unzing gapma gwegwenda atapan mukaing binga sikum.
13 Dasingge, nata nataawa iwana kwaapzangga nae sapdut wam nanikaing.
Siwan gatu kaut kaut yuke na tasiwa gwaumbitde kumzang tasikaing.
Sike gatu unekan yuke wamu yawan kekekawan na tasiwa maiwitde yakaing.
Waaminda atnuwa kupitde yakaing.
14 Siwan ngana undanga. Buyambam tapa, nata gae banip singgat.
Sike, “Ga natane Anutuna,” ngang yanggat.
15 Sike asingganu nata gae kataune yuat.
Gata na iwanae kataune gatu aminu na nawakaingge kataune sandeke tapso.
Waaminda na tasiwa maiyat.
16 Na gatane puya aminda. Unzingge gata nanduyuke musip kwikwik natangamuyo.
Gata nae musip kwikwik asinggan asinggan natangamuke na iwanatane kataune sandeke tapso.
17 Buyambam tapa, nata gae yangawawa gata gatangamuyo.
Gatangamuke iwana ma kapewi waaminda na napbimbam.
Sike gata kapewi wai aminda apmaakaning.
Maakake waaminda gena kusiwan yusika matmat gwene pukuning.
18 Sike waaminu yamandet sike sapdut wam yakaing.
Siwan wamu waiaknga amin nomande yanikaing. Waaminu kem wamban yakaing.
Unzing tasikaingge natake gata waaminu pasiwi maiwa waamindane gena tupakande pasiwi kusinong.
19 Sike gata puya take siknga aknga tasike
gae gepbiatang yuaing aminu akgatayamunggayak.
Ngan, puya aaknga aminde kaine
aminu gae gepbiatang yuaingge tasiyamuya.
20 Gata waaminu gika yuayak komune inengan pakusopunggayak.
Pakusopuwawi aminda wam yawan kekekawan zipnangge tasiwa maiwik.
Gata aminu gae gepbiatang yuaing aminu katak siknga pakusopunggayak.
Siwan iwanata wamu waiaknga yaningga waaminu dua pasiwan maining.
21 Tupanu iwanata na nutnangge nawake natane yotgapma yupbasiking.
Yupbasiwawa ngana ita nae musip gwaang siknga natangamuke inane kekekngata gatangaman nata take yuat.
Unzingge Buyambam tapatane umana yatangenatnong.
22 Buyambam tapa, tupa na iwana waakwau
asiknga kagwauke anzing yakum,
“Na apba nanikwasiwa na gae wesimu dua ba yuat,” ngang yakum.
Siwan ngana gata natane wam natake gata na akgatangamukuyak.
23 Siwan aminu Anututane aminabam, ginda ie take siknga natapnong.
Dasingge, ita aminu ie wam natake tawakaingu akgatayamunggak.
Sike ngana aminu yamandet sikaingge yake toknga kapzang ayamunggak.
24 Ginu aminu kuupbamu Buyambam tapae banip sikaingu ginda kekeknga yutnong.