18
Devit kau aaknga taikuu iwanae kataune sandeke takut.
1 Anutu, na gae banip gwaang siknga nataat. Gata na atapi kekekanggat.
2 Buyambam tapana damanu kekeknga gwenu unin. Sike i suu gwenduta binga, na takusopunggak. Sike ita na iwanae katune sandeke tanggak kapanin.
Sike natane Anutuna suu kekeknga gwendu binga, nata ie kuke iwanae akusopunggat.
Buyambam tapana tiunggu daka binga, ita na iwanae atakusopunggak. Siwan na inane kekeknga akngane sandeke tapan na kekeknga yuat. Sike i natane damanu kekeknga gwena unin.
3 Buyambam tapatane umana kopsa aknga unin.
Nata ie tumuk wam iniwa gatangaman natane iwanata dua tasiwan maiwit.
4 Na akupitde wesimu asikum. Sike wa nau takngatuta binga kekeknga wamanggaganuwan yukum. Siwan wai aminda na nuwa maiwitde kumzang tasikaing.
Gatu wa tasikaingu yanggabam gwendane sambuyata binga enake na usukwatapik.
5 Ngan, nau takngatuta binga kekeknga wamanggaganuwan nata kupitde wesim sikum.
Ngan, bungep pasike kaap zong pakaing binga na nuwan kupitde dapaknga siwan datakunanga dua sikum.
6 Na meya waakwak natake Buyambam tapae sitawakum.
Na Anutunata akgatangamikge natake nata ie tumuk wam inikum.
Ita inane yotna buyambam gwene yuke natane tumuk wama natapbut.
Ngan, ita natane tumuk wama maakngata natapbut.
7 Siwan, Buyambam tapata musia toknga natane iwanae natapbut.
Natapan miamunu buyambam siawan,
tawan dakandaka ama yapiatangu ayamuke yuking.
8 Ngan, musia toknga natapan kupan taknga Buyambam tapatane nomna ganang epuwawan
gatu katau genaatangga akoke sangabamu kwaapzang yasiking.
Ngan, ita musia toknga natake tasiwan katapaimu mumuyang buyak genaneta epu kuking.
9 Ita minga musa kwasiwan kuwan yekau teke epuke
minga zikaa musa tasiwan inane kepinae gepbiatang yukut.
10 Unzing angela tapatuta binga gwaamuke bepmake apbut.
Sike wa apunggau got taknga kwaitdane pia kaamangga binga Anutu masene teke zeetgaman bepmake takapbut.
11 Ita tasiwan zikaandaka sel you gwendu binga dakngawan undang kusopukut.
Ngan, sopatane minga zikaa kaamang bingata takusopukut.
12 Siwana undangga kakaa siknga aknga sikut. Siwan minga musaatangga kakaa aknga uneta epbing.
Epuwawa yapasikga asiwawan gatu zambum mupewan epbing.
13 Buyambamtapa yekaune yuke gakngatda binga kaapmapa kumzang yakut.
Ngan, waapa kopsa siknga apata kaapmapa wamna yakapan aminu kepna kepna nana kuupbamda atnatapbing.
14 Ita sakutda yamawawan iwana gwatdu gwatdu datakuking.
Ngan, ita tasiwan yapasiu kekeknga siknga sakutna dakngawan iwana yamnangge pasiwan gwatdu gwatdu datakuking.
15 Buyambam tapa, gata iwandae kaanga yanike nombata tasiwi
gou kekeknga puyawawan yanggabam gwenu ikopewan pimaking.
Ikopewan pimapan keu yanggabam amunane kutakngi yuak kaknga anggaman sikut.
Sike yanggabam gwenu gatukande zakngakut. Zakngawan sanga kundu kepdaka tapan kekekanggau kakaa siking.
16 Ita yekaune yuke kataknga tewan epan na gatuna takut.
Na yanggabam gwenda asusukwatapan ngana ita na akaiwan akopbum.
17 Natane iwana kekeknga siknga. Ge nata yapbitnanga dua.
Siwan ngana Buyambam tapata na iwanae kataune sandeke takut.
18 Ngan, nata tapduu wai yukum komune iwanata nae apu amak tasiking.
Siwan ngana Buyambam tapata na akgatangamukut.
19 Ita gatangamuke nanitakuwan nata keu aanggaman komune take yukum. Sanga gwautnanga aknga wena sikut.
Dasingge, ita nae musip gwaang natangamuke na gatuna takut.
20 Nata gutonga takngatu dua tasiwa nanduke Anututa naenu take tasikut.
Ngan, nata kepi noman taknga tawamba nanduke Buyambam tapata sanga gwaamu kwaapzang namukut.
21 Nata Buyambam tapatane mama wamu take tawakum.
Nata Anutunae masa dua imukum. Aho, wai waaknga dua tasikum.
22 Ngan, nata asinggan itane mama wamdekan natanggamatakum.
Siwan nata itane wamu take akngae yamandeu dua sikum.
23 Unzingge ita atnataak. Na ie gutonga takngatu wena.
Nata kepi sukukumu katak siknga tanggwaukum. Gutonga takngatu tasiat nganggen.
24 Buyambam tapata natane noman taknganae natayukut.
Natangamuke yake yuyuu take aknga namukut. Minae, nata ie kaine dundumna yukum.
25 Buyambam tapa, aminu tapatuta masa gae dua gamanu gakaa yake gata masa dua imiyak.
Sike aminu tapatuta noman takngakan tawake tasike gutonga takngatu dua tasiwanu, gataaya yake ie noman takngakan tasingamunggayak.
26 Sike aminu tapatuta noman akngaekan ba tawambanu, gata noman taknga yake tasinggamuya.
Siwan ngana aminu tapatuta gutonga aknga tawake tasiwanu, gata kepi waakngae yapii katak siknga kake yake meya aknga asiimunggayak.
27 Gata aminu ninu kopsa amin dua dakngake yuamang ngang yakaing aminu apanggayak.
Sike kundu ninu kopsa amin dakngake yuamang ngang yake umana yapangenakaing aminu, gata umana ayaipakepunggayak.
28 Buyambam tapa, gata kakaa aknga namunggayak.
Ngan, Anututa zikaa naatang yuak kaknga atawamban kunggak.
29 Anutu, gata akgatangaminu nata amak tasike iwana ayaipakepu pewit.
Ngan, Anututa kekeknga namanu nata damanu yot gapma takumbasikuu ayatupit.
30 Anututane yuyuknga aknga take siknga siwan noman gan.
Sike ita sanga takngatu tasinangge yanggau, siakan gan siknga yanggak.
Gatu Buyambamtapa tiunggu amak tasiya daka binga.
Ita aminu ie kukaingu akgatayamuke iwanata dua kaningge apakusopunggak.
31 Buyambam tapakan i Anutu siknga. Asikaya Anutu tapatuat ba dasing?
Ita ninu suu buyambam gwenduta binga wamambasinggak.
32 Anututakan tasiwan na kekeknga yuat.
Gatu ita kepi sukunggau kuut gatangamuke nanduyuawan kepi noman akngane sukunggat.
33 Ita katak siknga nanduyuwawan na dua pimanggat.
Unzing kaap zongga tawan dakandakaatang sukuke kepi katak kake sukuaing binga.
34 Gatu ita amak tasinanga akngae nanindamukgak.
Unzing tasiwan kataknga kekeknga siwana kweemu kekeknga siknga kaiwa dandakawik.
35 Buyambam tapa, gata na gatangami nata tiunggu take iwana ayapbimbit.
Unzing gata iwanda ayapbikgayak. Gata katakga siaapane tapi kekeknga yuat.
Siakan, gata na gatangami aminu kuupbamde kaine umana kaapa dakngake yuat.
36 Gata kepi nata sukunggat tapa tanomanuwi
kepi waapane kuke saweknga dua nuwan pimanggat.
37 Siwan nata iwana zipnangge yawake panggagunukum. Sike iwana waakwau atzipa kumbing.
Nata kuutgan zipa puyuwan iwana tapatu wena kakenga teke yotna kukum.
38 Ngan, nata kuutgan zipa
kepinae gepbiatang pimake kuupbam dua enaking.
39 Gata kekeknga amak tasiwitde namukuyak.
Sike gata iwana nae kataune pewi nata waaminu ayapbikum.
40 Gata pasiwi natane iwana mase nae namuking.
Siwan ngana nae kaanga nataaingge apasiwa maiking.
41 Waakwakga notnae yawa apu gatayamuningge yawan ngana aminu tapatu undang dua yukut.
Ita Buyambam tapae yawa apu gatayamikge yawan ngana ie dua natapbut.
42 Nata pasiwa gatukande muyuu gotda apu puyapan kukaing binga dakngaking.
Nata yanikwasiwa iwana ngwaik kanzangu mupewa kukaing binga dakngake moo yuking.
43 Siwan ngana tapduu aminu kundu natane dongune nanata nutnangge tasiking komune gata gatangami na dua tasiwa maikum.
Gata nandutewi yamandet aminu dongu takngatutane tupan amintapa dakngake aminu kayuat.
Sike aminu kundu nata dua nataau, apmanu nae gepbiatang koyuaing.
44 Aminu kunduta kepna kepna nana aminda natane umana kopsa akngae natake
natane wama gwaamuke nae gwauke munu kuut nae pukaing.
45 Puke kekekngana wena siwan
ita yotbamdane damanu kekeknga siknga gwen gwen peke yamuyamuiike nae apukaing.
46 Buyambamtapa asinggan yuwawik. Ita suu buyambam gwenduta binga na wamambasiwik.
Wamambasike na tapan take yuwit. Unzingge ninda itane umana yatangenatnim.
47 Anututa waiaknga nae tasikaingu iwanae yake meya yamukut.
Siwan ita aminu dongu kepna kepna nana nae gepbiatang yutningge pewan yuking.
48 Siwan ita na iwande kataune sandeke takut.
Siakan siknga Buyambam tapa, gata nae umana kopsa aknga iwanatane kaine namukuyak.
Gata gatangami aminu amak tasikaingga na dua nuwan kumbum.
49 Unzingge Buyambam tapa, nata gatane umanda aminu takngatu takngatue banakan yuke yatangenawit.
Siwan nata kau takngatui kuut taike umanda yatangenawit.
50 Buyambam tapata na, Devit, King kapa dakngawitde yakut.
Unzingge asingganu ita tasiwan iwana asiknga yapbikgat.