1 Ngan notnabam. Aminu kunduta enake Anututa musipmin pangenawan itane wamu takngatu natapbumang ngang kem yake tasikaing aminu kwaapzangga yanisukukaing. Sike wa amikat nana tapatuta yawanu ginda siakan ngangu zet ma natapam. Aho. Wamu wa aminda yakaing kaknga usanzitnong. Usanzike wamu wa Anututane ba Setendane ba ngang natapa siyok.

2-3 Siwan aminu kunduta apuke Jesue natake danindamuke Anututa tapan Krais akgatanimuyaapa dakngake kepdakane epuke nisae gup dakngake aakut ngang danining. Aminu wamu waaknga danining aminda Anututane wamu siakande siknga yakaing aminu unin. Siwan ngana aminu tapatuta Jesue natake wamu waaknga dua yawiu waapatane musia Anututa dua tangenawan yanggak. Aho. Waapata Jesue iwana dakngake yuak kapanin. Tupa ginda wamu takngatu natawawa Kraisde iwanata apme apik ngang yawa natapbing kaknga buyana unin aawan kaaing.

4 Siakan waatdakana. Ginda Anutue gepbiatang yuaing. Yuwawa Anutu gikat gatake yuak kapata kekeknga siknga. Sike ita aminu ie masa imukaing aminu ayaipapaakusinggakge ginda aminu wa kem yakaing aminu gwa yaipapaakusiwa yuaing. 5 Siwan aminu waakwau Anutue masa imukaikat nana. Unzingge wa aminda wamu masa imunanga aknga yawawa aminu masa imukaing notnata wa aminde wamu atnataaing. 6 Siwan ngana ninda Anutue gepbiatang yuamang. Yuke itane wamna yana aminu Anutue atnataaing aminda nindane wamu atnataaing. Ngana aminu Anututane amina dua dakngake yuaingga ninde wamu dua nataaing. Sike tuwangu waakngae ninda siakan amin ba kem amin ngang usanzike kanim.

7 Ngan notnabam. Nata ginde musip gwaang natandamunggat. Ina unzakan ninu kuutda nikat nana aminde musip gwaang natayamunim. Dasingge? Anututa nindane musipmin pangenawanu ninda notninde musip gwaang natayamunim. Sike aminu notnae musip gwaang nataau waapata Anututane waaknga dakngake yuak kapanin. Sike ita Anutue asiknga nataak kapanin. 8 Siwan ngana aminu notnae musip gwaang dua natayamunggau waapata Anutue dua nataak kapanin. Dasingge? Anutu wa sanga aminde musip gwaang natayamuya akngae toiknga siknga. 9 Sike ita ninde butaya siknga natanimunggak kaknga yeutnimunangge natapbut. Yeutnimunangge natake ita waaknga awia tapatukan ngana dua kotnakut. Dua kotnake initewan waaknga waapata kepdakane epbut. Epuke ita sanga ninde tasinimik kakngata gataniman kayuk yutnanga aknga take ninda kayuk asinggan yutnimde natake initewan apbut. 10 Sanga wa Anututa ninde butaya natanimunggak kaknga sanga ninda ie musip gwaang natangamukamang kakngata dua yeutniman kaamang. Aho. Anututa inane waaknga initewan apuke ita tasinimukut takngata nindane waiaknganinde wamu yatapan takawikge initewan apbut takngata yeutniman Anututa ninde butaya siknga natanimunggak kakngata anggaman siwan kaamang.

11 Ngan notnabam. Anututa ninde butaya natanimuke unzing gataniman kakengu ninda nikat nana aminde musip gwaang natayamunim. 12 Aminu tapatuta Anutu kainata dua kakut ngana ninda nikat nana aminde musip gwaang natayamukengu Anututa nikat gatake yuamang ngang natapnim. Ita nikat gatake yuke ninde butaya natanimunggak kakngata buya aawan ninda notninde musip gwaang natayamukamang kakngata buyambam siwik.

13 Siwan Anututa inane Waunga niman Waungu waapata nindane musipmin pangenawan ninda natake ninu Anutuat musipminu takngatukan natake unekan binga gatake yuamang ngang natapna kekekanggak. 14 Sike Nanin Anututa inane waaknga tapan ita akgatanimuya apanin dakngake yuak. Dakngake yuwan Nanata initewan kepdakane epuke ninu kuupbamdane waiaknganin sandetnimukut. Ita kepdakane apan ninda kaininda kakumang. Sike sanga wa kakumang kakngae aminbamde yanikapmakamang. 15 Sike aminu tapatuta Jesue natake ita Anututane waakngaapa ngang aminbamde yaninggau waapata Anutuat musia takngatukan natake unekan binga gatake yuamayak kapanin. 16 Siwan ninu Anututa ninde butaya natanimunggak kakngae natapna kekekanggak.

Sike Anutu wa sanga aminde musip gwaang natayamuya akngae toiknga. Siwan aminu inane notnae musip gwaang natayamuya akngae gepbiatang yuaing aminda Anutuat musia takngatukan natake unekan binga gatake yuaing aminu unin. Siwan Anututa wa amikat gatake unekan yuaing. 17 Siwan notninde musip gwaang natayamukengu ninu sanga Jesuta kepdakane yuke tasikut takngakan tawake tasinim. Tawake tasiwatna ninda musip gwaangu notninde natayamukamang kakngata buyambam siwik. Siwan masande Anututa aminu kuupbam usanziwik gwene ninda itane nomune yutnangge dua gwautnim. 18 Aho. Aminu Anutue nomune yutnangge akwaukgau waapata natake asikaya Anututa toknga waiaknganae apba namik ngang natake gwaukgak kapanin. Sike aminu Anutue wa gwauke yuau waapata Anutue musip gwaang siknga dua nataak. Sike ita Anutue musip gwaang siknga nataak gamu ie nomune yutnangge dua gwauban. Aho. Anutue musip gwaangu siakande siknga natangamukenga aminu waapata Anutue nomune gitna yuwik.

19 Siwan Anututa ita gamok ninde butaya natanimukutde ninda yake ie musip gwaang natangamukamang. 20 Sike aminu tapatuta na Anutue musip gwaang natangamunggat ngang yawik. Yake ngana notnae atemna natangamukengu ita kem amintapa dakngawik. Dasingge? Ita notna asinggan kaak kapae musip gwaang dua natakengu ita Anutu kainata dua kaak kapae musip gwaang natangamunanga dua. 21 Unzingge Jesuta mama wamu anzing nimukut. Aminu Anutue musip gwaang natangamunggak kapata inane notnae kuut musip gwaang natangamuyok ngang nimukut.

<- 1 JON 31 JON 5 ->