WAHIYUU 19

Lagu to Kandawuna Babel

19:1-5

1 Sapadhana incia sumai iaku kurango suara momakaa mboomo suarana poromua momaoge i sorogaa, agora,

"Bhari-bharia kapujia to Aulataʼala!

Kasalaamati, kamuliangi tee o kuasana bhari-bharia pewauana Aulataʼalata,

2 [a]roonamo kahaakimuna abanara tee aʼadili!

Incia padhamo ahaakimu pasunda maoge sumai,

mopadhana mopekadhakina dunia tee pewau pebulana.

Aulataʼala padhamo abholosi bhawine pasunda sumai,

to raana manga bhatuana Aulataʼala motopekamatena.

3 [b]To kamondona rua mpearo manga incia bhari-bharia agora,

"Bhari-bharia kapujia to Aulataʼala!

Ombu mominaakana i waa mopekangauna kota maoge sumai bheapene torosu

tee inda aunto-unto saʼumurua."

4 Kasiimpo rua pulu pata miaia manga mancuana tee pata miaia mahaluku sumai uka asuju asomba Aulataʼala i bhawona kauncuramakana sumai, tee manga incia apogau,

"Aamin! Bhari-bharia kapujia to Aulataʼala!"

5 [c]Kasiimpo atorangomo suara minaaka i kauncuramaka sumai mopogauna,

"Pujimo Kawasana Aulataʼalata,

e bhari-bharia bhatuana,

ingkomiu momaekana tee Aulataʼala,

malape o kaogesa atawa o mia maidhiidhi!"

Kariaa Kawiana Anana Dumba

19:6-10

6 [d]Kasiimpo iaku kurango saangu suara mboomo suarana poromuana mia bhari. Nduuna mboomo uwena mawa tee suarana guntu momaoge, pogauna,

"Bhari-bharia kapujia to Aulataʼala!

Roonamo Kawasana Opu, Aulataʼalata Mokokuasana Mpuu,

sii-sii aparinta amembali raja.

7 Maimo takaunde-unde tee tasambo-samboaka,

tee tamuliangia!

Roonamo eo kawiana Anana Dumba akawamo,

tee o panganti bhawine padhamo apasiapu karona.

8 Kae lenan moʼalusu mokombena momaputi tee momangkilona

padhamo adhawuakea to incia to apakea."

(Kae lenan moʼalusu iwe sii to agambaraaka giu malape ipewauna manga mia mosaalihi to aoseaka tuturana Aulataʼala.)

9 [e]Malaaʼekati sumai apogau tee iaku, "Burimea o giu incia sii, 'Amasanaamo bhari-bharia mia motokembana i kariaa kawiana Anana Dumba.' " Kasiimpo apogau uka, "Siimo pogau mobanara minaaka i Aulataʼala."

10 Sumaimo iaku kusujumo i aena to kusombaia, maka incia apogau, "Bholi! Bholi usombaaku, roonamo iaku soo bhatua molaianina Aulataʼala, mopokanana tee ingkoo tee bhari-bharia witinaimu mokenina pekatangka kasakusiina to Isa. Sombamo Aulataʼala sumai! Roonamo kasakusiina to Isa satotuuna o karajaana Rohina Momangkilo, apokana tee apaumbaaka firimanina Aulataʼala.

Firimanina Aulataʼala

19:11-16

11 [f]Kasiimpo iaku kukamata sorogaa atobungkale, tee atiumbamo sambaa ajara maputi. Mia mosawikia akosaroaka Motoparacaeana tee Mobanarana, roonamo Incia aʼadili wakutuuna ahaakimu tee wakutuuna apotimbe. 12 [g]Matana mboomo rorena waa tee i bhaana apake abhari mahakota. I karona atoburiaka saangu saro inda imatauna incemapo uka, tee tangkanamo karona momatauna saro incia sumai. 13 Incia apake juba mopadhana motopalondona i raa, tee Incia atosarongi 'Firimanina Aulataʼala.' 14 Bhari-bharia tantarana sorogaa aosea tee asawi i manga ajara maputi tee apake kae lenan moʼalusu maputi momangkilo. 15 [h]Minaaka i ngangana Incia mosawikina ajara maputi sumai alimba samata hancu momatadha to abhebheaka bhari-bharia lipu, tee bheaparintangia tee katuko ase. Incia bheapio angguru i tampana pioana angguruna pamuruna Aulataʼala Mokokuasana Mpuu. 16 I jubana tee paana atoburiaka saangu saro, siitumo "Rajana bhari-bharia raja, tee Opuna bhari-bharia opu."

Binata tee Nabiina Atotalo

19:17-21

17 [i]Kasiimpo iaku kukamata malaaʼekati akabhale-bhale i bhawona matana eo. Tee suara momakaa incia agoraaka bhari-bharia manu-manu mopolakana i tanga-tangana laiana, pogauna, "Maimo ingkomiu uporomusakaaka i kariaana Aulataʼala momaoge sii, 18 mamudhaakana ingkomiu ukande dagina manga raja, dagina manga kapita, dagina manga mia makaa, dagina ajara tee mosawikia, tee dagina bhari-bharia maanusia, malape kaogesa atawa o mia maidhiidhi, bhatua atawa o maradhika."

19 Kasiimpo kukamata Binata Masega bhaa-bhaana i saao tee bhari-bharia raja i dunia tee manga tantarana aporomusaka to apotimbe abhali Incia mosawikina ajara maputi tee tantarana. 20 [j]Maka o Binata Masega sumai atorako apoose tee nabii gau-gau mopadhana mopadhaangiana manga tanda inda momentela i aroana binata sumai. Tee manga tanda inda momentela incia siimo mopasaladhalana bhari-bharia mia mokotandaakana binata incia sumai tee manga mia mosombana patuna. Kasiimpo binata tee nabii gau-gau sumai atudhaakea kadhadhi-dhadhi i nuncana tawona waa mokarore-rorena tee walera. 21 Sainamo mosagaanana apekamatea tee hancuna molimbana minaaka i ngangana Incia mosawikina ajara sumai, tee bhari-bharia manu-manu uka amambosu akande dagina manga incia.

<- WAHIYUU 18 WAHIYUU 20 ->