Link to home pageLanguagesLink to all Bible versions on this site
82
Aulataʼala i nuncana Sidangina Sorogaa
82:1-8

1 Zaburuna Asaf.

 
Aulataʼala akapalai sidangi i sorogaa.
Incia amembali haakimu mobhotukiakana parakara i tanga-tangana manga "aulataʼala,"*82:1 aulataʼala: Pogau Ibranina "elohim" kananeana akomaʼana dewa atawa Kawasana Opu, maka i nuncana aeati incia sii tee 82:6 amembali akomaʼana manga malaaʼekati modorohaka i Aulataʼala, siitumo manga seetani. Bhanguna mboo manga "aulataʼala" sumai atohakimi i sidangina sorogaa incia sii.
2 "Sakawana naepia ingkomiu bheuala kambotu tee cara inda moʼadili
tee uewaaka manga mia madhaki?
Sela
[b]
3 Ewaakamea o hakuna mia momisikini tee ana maelu,
dhawuakea kaʼadili to mia motopisaki tee mia inda mokokadhaangia.
4 Pasalaamatia o mia momisikini tee mia monarakaa,
rambasakea manga incia minaaka i limana mia madhaki."
 
5 Ingkomiu inda umataua, ingkomiu uka inda umaʼanaia,
ingkomiu udhala i nuncana kalalanda;
bhari-bharia ariina alamu sii atolendu
tee tuturana raʼeati amarungga.
 
6 [c]Iaku padhamo kufirimani, "Ingkomiu sii 'manga aulataʼala'
tee bhari-bharikomiu sii o anana Momalangana;
7 moomini mboo sumai, ingkomiu bheumate mboomo maanusia,
tee mboomo manga kaogesa, ingkomiu uka bheumate."
 
8 E Aulataʼala, kakaromo, adilia o dunia sii;
roonamo bhari-bharia lipu satotuuna o pewauamu.

<- ZABURU 81ZABURU 83 ->