ZABURU 8

Mahaluku Mohina mboomo Mahaluku Momulia

8:1-10

1 To kapalana molaguna. Mboomo lagu Gitit.[a] Zaburuna Daud.

2 E KAWASANA OPU,[b] e Aulataʼalamami,

saromu amulia i saangua alamu!

Kaogesana kuasamu alabhi kalangana minaaka i laiana.

3 [c]Minaaka i ngangana manga anaana momaidhiidhi tee anaana modudu uka apuji kamuliangimu.

Roonamo Ingkoo padhamo upakaro bente potaangia momatangka

sabutuna o ngangana bhari-bharia musu tee bhalimu atosoncongi.

4 Ande kutonto tee kufikiri laiana ipadhaangiamu,

bula tee kalipopo idhikamu,

5 [d]incema buaka o maanusia sumai, mbakana uudhania,

incema buaka o incia, mbakana udhambaakea?

6 Maka upewau maanusia saidhepo apokana tee Aulataʼala,[e]

upakanaakea tee mahakota kamuliangi tee kahoromati.

7 [f]Udhawua kuasa to saangua alamu,

bhari-bharia ipadhaangiamu upatungkua i incia:

8 Dumba, sapi tee bhari-bharia binata kadhambaaka,

tee manga binata i rumpu;

9 Manu-manu tee manga ikane

bhari-bharia mahaluku i nuncana tawo.

10 E KAWASANA OPU, Aulataʼalamami,

saromu amulia i saangua alamu!