ZABURU 63

Pemelili i Kawasana Opu

63:1-12

1 [a]Zaburuna Daud wakutuuna incia adhaangia i Tana Matuuna Yuda.

2 E Aulataʼala, Ingkoomo Aulataʼalaku, iaku kupeeloko,

tee gauku kupokawa tee Ingkoo.

Saangua badaku apemeliliakako,

mboomo mia molingkana i tana matuu mofaraluuna uwe.

3 Mboo sumaimo kutontoko i tampamu momangkilo

to kukamataaka kuasamu tee kamuliangimu.

4 Roonamo kaasimu molagina alabhi akoharagaa minaaka i dhadhi,

sababuna sumai kupujiko.

5 Mboo sumaimo bhekupujiko saʼumurua dhadhiku,

tee kuangka limaku to kumuliangi saromu.

6 Atumpu incaku, mboomo tee kinande momambaka,

tee kupujiko tee bhiwiku mokaunde-unde,

7 wakutuu kuudhaniko i kolemaku,

tee kufikiriko samaloa.

8 Roonamo Ingkoomo motulungiaku,

i tambena panimu iaku kusambo-sambo.

9 Ngangarandaku bheakeniakako pekatangka,

lima kaanamu atukoaku.

10 Maka manga mia mohaejatina mopekamateaku

bheapesua i tambena tana tee manga mia mate;

11 manga musuku bheatopekamateaka tee hancu,

tee amembali kinandena serigala.

12 Maka raja bheakaunde-unde roonamo katulungina Aulataʼala;

bhari-bharia mia moposumpana tee Aulataʼala bheabangga,

roonamo Incia bheasoncongi ngangana manga pande gau-gau.