BHAA-BHAANA 36

Siwuluna Esau

36:1-19

1 O siimo siwuluna Esau, isarongiaka uka Edom.

2 Esau akobhawineakamo manga bhawine Kanaan, siitumo Ada anana Elon miana Het; tee Oholibama, anana Ana, anana Zibeon, miana Hewi; 3 tee uka Basmat, anana Ismail, andina Nebayot.

4 Ada apalaahiri Elifas to Esau, tee Basmat apalaahiri Rehuel, 5 sainamo Oholibama apalaahiri Yeus, Yaelam, tee Korah. Siitumo manga anana Esau, ipalaahirina to incia i Tana Kanaan.

6 Esau abhawa manga bhawinena, manga anana umane tee bhawine, tee bhari-bharia mia saangua bhanuana, kadhambaakana, sagala binatana, tee sagala harataa pewauana ipotibhaakana i Tana Kanaan, kasiimpomo alingka incia i lipu momaridhona minaaka i Yakub, andina. 7 Esau apogaa tee Yakub sababuna harataa pewauana manga abhari laulau, sumaimo manga incia inda amembali amboore apobhawa. Tee uka i lipu mbooresana sumai manga inda akawa rumpu to kadhambaakana mobharina mpuu sumai. 8 Sabutuna, Esau isarongiaka Edom sumai ambooremo i Tana Gunu Seir.

9 O siimo siwuluna Esau, amana kaomuna miana Edom, i Tana Gunu Seir.

10 Sarona manga anana Esau:

siitumo Elifas, anana Ada bhawinena Esau, tee Rehuel, anana Basmat bhawinena Esau.

11 Manga anana Elifas:

siitumo Teman, Omar, Zefo, Gaetam, tee Kenas.

12 Timna, maruena Elifas anana Esau, apalaahiri Amalek to Elifas.

Siitumo siwuluna Ada, bhawinena Esau.

13 Manga anana Rehuel:

siitumo Nahat, Zerah, Syama, tee Miza.

Siitumo siwuluna Basmat, bhawinena Esau.

14 Oholibama anana Ana binti Zibeon bhawinena Esau, apalaahirimo uka manga anaana to Esau:

siitumo Yeus, Yaelam tee Korah.

15 O siimo manga kapalana kaomuna bani Esau.

Siwuluna Elifas, ana tumpena Esau, amembali kapalana kaomuna Teman, kapalana kaomuna Omar, kapalana kaomuna Zefo, kapalana kaomuna Kenas, 16 kapalana kaomuna Korah, kapalana kaomuna Gaetam, tee kapalana kaomuna Amalek. Siitumo manga kapalana kaomuna Elifas i Tana Edom, tee siitumo siwuluna Ada.

17 Siwuluna Rehuel anana Esau,

amembali kapalana kaomuna Nahat, kapalana kaomuna Zerah, kapalana kaomuna Syama, tee kapalana kaomuna Miza. Siitumo manga kapalana kaomuna Rehuel i Tana Edom, tee siitumo siwuluna Basmat, bhawinena Esau.

18 Siwuluna Oholibama, bhawinena Esau,

amembali kapalana kaomuna Yeus, kapalana kaomuna Yaelam, tee kapalana kaomuna Korah. Siitumo manga kapalana kaomuna Oholibama binti Ana, bhawinena Esau sumai.

19 Siitumo miana Esau, isarongiaka uka Edom, tee siitumo manga kapalana kaomuna manga.

Siwuluna Seir

36:20-30

20 O siimo manga siwuluna Seir, miana asiliina momboorena i lipu incia sumai isarongiaka miana Hori:

siitumo Lotan, Syobal, Zibeon, Ana, 21 Disyon, Ezer, tee Disyan. Siitumo siwuluna Seir momembalina manga kapalana kaomuna miana Hori i Tana Edom.

22 Manga anana Lotan:

siitumo Hori tee Heman, sainamo witinaina bhawine Lotan o sarona Timna.

23 Manga anana Syobal:

siitumo Alwan, Manahat, Ebal, Syefo, tee Onam.

24 Manga anana Zibeon:

siitumo Aya tee Ana. Ana siimo mopokawaakana manga matana uwe masodho i inawu i tana matuu wakutuuna incia ajagani keledaina Zibeon, amana.

25 Ana dhaangia samia anana umanena siitumo Disyon, tee samia anana bhawinena siitumo Oholibama.

26 Manga anana Disyon:

siitumo Hemdan, Esban, Yitran, tee Keran.

27 Manga anana Ezer:

siitumo Bilhan, Zaawan, tee Akan.

28 Manga anana Disyan:

siitumo Us tee Aran.

29 Manga kapalana kaomuna miana Hori:

siitumo kapalana kaomuna Lotan, kapalana kaomuna Syobal, kapalana kaomuna Zibeon, kapalana kaomuna Ana, 30 kapalana kaomuna Disyon, kapalana kaomuna Ezer, tee kapalana kaomuna Disyan. Siitumo manga kapalana kaomuna miana Hori; mboo sumaimo manga sarona kaomu i Tana Seir.

Manga Rajana Edom

36:31-43

31 Siimo manga raja moparintangina i Tana Edom, wakutuuna indapo dhaangia samia raja moparintana i bhawona miana Israel:

32 Bela bin Beor moparintangina i Edom, tee sarona kotana siitumo Dinhaba.

33 Samatena Bela, Yobab bin Zerah minaaka i Bozra amembali raja mobholosia.

34 Samatena Yobab, Husyam minaaka i lipuna miana Teman, amembali raja mobholosia.

35 Samatena Husyam, Hadad bin Bedad, motalona miana Midian i lipu Moab, amembali raja mobholosia, tee sarona kotana siitumo Awit.

36 Samatena Hadad, Samla minaaka i Masreka amembali raja mobholosia.

37 Samatena Samla, Saul minaaka i Rehobot modhaangiana i bhiwina umala, amembali raja mobholosia.

38 Samatena Saul, Baal-Hanan anana Akhbor amembali raja mobholosia.

39 Samatena Baal-Hanan bin Akhbor, Hadar amembali raja mobholosia, tee kotana sarona Pahu. Bhawinena sarona Mehetabeel anana Matred binti Mezahab.

40 Siimo sarona manga kapalana siwuluna Esau mboomo kaomuna tee tampa mbooresana manga, sumbesumbere tee sarona manga:

kapalana kaomuna Timna, kapalana kaomuna Alwa, kapalana kaomuna Yetet, 41 kapalana kaomuna Oholibama, kapalana kaomuna Ela, kapalana kaomuna Pinon, 42 kapalana kaomuna Kenas, kapalana kaomuna Teman, kapalana kaomuna Mibzar, 43 kapalana kaomuna Magdiel, tee kapalana kaomuna Iram. Siitumo manga kapalana kaomuna Edom, mboomo tampa mbooresana manga i tana pewauana manga.

Siitumo Esau, opuopuana miana Edom.

<- BHAA-BHAANA 35 BHAA-BHAANA 37 ->