BHAA-BHAANA 10

Tulatulana Manga Lipu Siwuluna Sem, Ham tee Yafet

10:1-32

1 Siimo siwuluna manga anana Nuh, sumai Sem, Ham tee Yafet. Sapadhana uwena mawa sumai, alaahirimo manga anana umane to manga incia.

Siwuluna Yafet

2 Manga anana Yafet sumai:

Gomer, Majuj, Madai, Yawan, Tubal, Mesekh, tee Tiras.

3 Manga anana Gomer sumai:

Askenas, Rifat, tee Togarma.

4 Manga anana Yawan sumai:

Elisa, Tarsis, Kitim tee Dodanim.[a] 5 (Minaaka i manga incia siimo apogaa-gaamo manga lipu momboorena i sakaaratea bhiwina tawo. Manga incia adhadhi i tanana karona manga, sumbesumbere tee pogauna manga, kaomu witinaina manga, tee lipuna manga.)

Siwuluna Ham

6 Manga anana Ham sumai:

Kus, Misraim, Put, tee Kanaan.

7 Manga anana Kus sumai:

Seba, Hawila, Sabta, Raema, tee Sabtekha.

Manga anana Raema sumai:

Syeba tee Dedan.

8 Kus dhaangia anana uka sarona Nimrod, momembalina mia mokokuasana bhaa-bhaana i alamu. 9 O incia samia pande pekaose mobaranina rampaakanamo KAWASANA OPU. Siitumo sababuna, ipogauakana mia, "Mboomo Nimrod, samia pande pekaose mobaranina rampaakanamo KAWASANA OPU." 10 Auwalina pamarintana Nimrod aminaaka i Babel, Erekh, tee Akad, bhari-bharia i Tana Sinear. 11 Minaaka i tana sumai, incia alingka i Asyur, kasiimpo apabhangu kota Niniwe, Rehobot-Ir, Kalah, 12 tee Resen, i tanga-tangana Niniwe tee Kalah. Bhari-bharia sumai kota maoge.

13 Misraim akoanaakamo

miana Ludim, miana Anamim, miana Lehabim, miana Naftuhim, 14 miana Patrusim, miana Kasluhim (minaaka i iwe siimo asalana miana Filistin), tee miana Kaftorim.

15 Kanaan akoanaakamo

anana o sarona Sidon, anana tumpena, tee Het.

16 Siwuluna Kanaan mosagaanana sumai miana Yebusi, miana Amori, miana Girgasi, 17 miana Hewi, miana Arki, miana Sini, 18 miana Arwadi, miana Semari, tee miana Hamati. Kasiimpomo apogaa-gaamo manga kaomuna miana Kanaan sumai.

19 Potidhaana lipuna miana Kanaan amaewa minaaka i Sidon, aporope i Gerar sakawana i Gaza, kasiimpo aporope i Sodom, Gomora, Adma, tee Zeboim, sakawana i Lasa.

20 Siitumo siwuluna Ham mboomo sumbesumbere kaomuna, pogauna, tanana, tee lipuna.

Siwuluna Sem

21 Alaahirimo uka manga anana to Sem, siitumo akana Yafet, o opu-opuana bhari-bharia siwuluna Eber.

22 Manga anana Sem sumai:

Elam, Asyur, Arpakhsad, Lud, tee Aram.

23 Manga anana Aram sumai:

Us, Hul, Geter, tee Mas.

24 Arpakhsad akoanaaka Selah,

tee Selah akoanaaka Eber.

25 Eber akoanaaka rua mia umane.

Sarona samia sumai Peleg,[b] roonamo i zamanina manga kaomu i alamu sii apogaa-gaamo, tee sarona andina sumai Yoktan.[c]

26 Yoktan akoanaaka

Almodad, Selef, Hazar-Mawet, Yerah, 27 Hadoram, Uzal, Dikla, 28 Obal, Abimael, Syeba, 29 Ofir, Hawila, tee Yoab. Bhari-bharia siwuluna Yoktan.

30 Tampa mbooresana manga incia amaewa minaaka i Mesa aporope i Sefar, siitumo gunu i sawetana timbu. 31 Siitumo siwuluna Sem mboomo kaomuna, pogauna, tanana, tee lipuna.

32 Jadi, sumaimo kaomuna manga anana Nuh mboomo siwuluna manga incia tee lipuna manga. Minaaka i manga incia sii apogaa-gaamo manga lipu i alamu sapadhana uwena mawa sumai.

<- BHAA-BHAANA 9 BHAA-BHAANA 11 ->