Romans 3

1 Puth niiy niiyantakaman ngul nath thawina, “An-ngul ngamp ngeenak Jews.an iiyanamp e? An-ngul min ngampar ey? ngeen-wiy peꞌanan umpayn ngamparaniy ey?” 2 Eeꞌa, an min ngampar Jews.an iiy-iiyanampweya. Nil God.angan wik kaꞌathaman ngampar Jews il-ilantan want. 3 Wik God.antaman kan-kanama, nil wik nungantam keꞌam pip, ngampangan kaaꞌngak. Nungkway than pam wanch wiy al-alangan wik keꞌan ngeeyiythan nunang-a, nilan puth wik nungantaman keꞌam kon-ngath nunang, God.an. 4 Puth piip God.an keꞌam wik uuy-uuyamana, pam wanch ngampiya epa wik uuy-uuyamanampa, nil God.an-a, yaꞌa, an puth lat ngench thayanang kan waaꞌan ngampar nil David aak keenkan thaw nungant God.antan:

“Wik nungkaramana an kan-kanama.

Pam wanch wiyangan nathwey waaꞌiythan nintang-a, aꞌ man-ngeeyiythan nintang wik nungkaram amanaman-a,

an nint meenathān wik nungkaram anangana nintan thaw-thawangan-a, an kan-kanam paththama.”

5 Niiy nath wik way anman ngaantam-ngeeyaniy niiyantakaman, “In min ngampar ngamp wayan yump-yumpanampana, yipam than pam wanch wiyangan thathayn nil God.an thonakam minana, pam wanch ngampaniya, an yaꞌa.” An yaꞌa, niiy way anman keꞌ iiy-iiyin a! Nath niiy yimanang thamp wik wayan ngaantam-ngeeyaniy niiyantakaman, “Nil God.angan aak wayakan keꞌ kuchiy ngampanga, yaꞌa! Puth ngamp nathwey way keꞌan yump-yumpimpan-a, an puth thanan want-wanttak ngaantam-ngeeyiythan nil God.an thonakaman minan e?” 6 An yaꞌaniya, kaangk nil nath kuchiy ngampang aak wayakan-a, an nila kuchow ngampang. Nil puth God.an nil-nil, nil keꞌ ngamp yimanangan yaꞌa. An puth kan-kanam pam wanch ananganiya umangam ngul thanayn nungant, nilana thawow thant, aak minak nathwey kalow thanang, nath yaꞌwey, aak wayakan natha kuchow thanang than wayan yump-yumpantana.

7 Niiy nath way-way ngaantam-ngeeyaniy niiyaman ey? an keꞌ min niiyant ey? wikan uuy-uuyamān ey? An yaꞌa! Niiy nath wik inan tham ngaantam-ngeeyaniy niiyamana, “Nil puth God.angan ngeenak waaꞌiy ngampang way yot anangan yump-yumpanamp e? Puth ngampwey keꞌan wik uuy-uuyamimpwey-a, an than wiyangan puth want-wanttak ngaantam-ngeeyiythan thanttakaman nil piip God.ana mina, nilaman thonakam wik kan-kanaman waaꞌ-waaꞌan ngampara?” An yaꞌaniya, wik yimanangan keꞌ ngaantam-ngeeyāmp a! 8 Aꞌ niiy nath ngaantam-ngeeyaniy niiyantakamana an keꞌ min niiyant wayan yump-yumpāna yipam pam wanch wiyangan ngaantam-ngeeyayn nil God.an mina. An yaꞌa! Ngamp way keꞌ yump-yumpāmp a! Than pam wanch wiyangan thanttakaman waaꞌ-waaꞌantan ngayang, than thaw-thawantan keꞌ ngay pam wanch wik way inangan thaaꞌ-aath-aathang thanang. An yaꞌa, than wik kan-kanaman keꞌam waaꞌ-waaꞌantan, an puth kan-kanamaniya nil God.angan ngul waaꞌow thanang pam wanch wayanangana.

Pam Wanch Maꞌmangkaman Way-Wayam Maꞌ-Yotaman Iiy-Iiyantan

9 Yaa, ngay kan thawāng niiyant pam wanch ngamp Jews il-ilantana. Niiy ngaantam-ngeeyaniy keꞌ nil God.angan pam wanch Jews anangan min thath-thathan thanangan ey? pam wanch wiy anangan min yaꞌ ey? An yaꞌ paththam a! Ngay puth kaꞌathaman kan thawangan than pam wanch maꞌmangkaman wayan maꞌ-yotaman iiy-iiyantan, thanan puth kaangk way anman iiy-iiyayn, than Jews aꞌ puth Jews yaꞌ anangan thamp. 10 Wik inan kan-kanama, puth lat ngench thayanangan waaꞌ-waaꞌan:

“Pam wanch yotaman way paththam iiy-iiyantan,

than meeꞌ God.antangan pam wanch min keꞌam iiy-iiyantan, yaꞌ paththam.

11 Than pam wanch yotamangana God.an minam keꞌam thiichantan nunang, yaꞌa,

aꞌ than puth kaangk keꞌ wik God.antaman ngeey-ngeeyayn.

12 Than pam wanch yotamangan man-mangkam theeꞌin nungant God.antan,

than yotamangana wayathwin thanttakamana,

than puth maꞌmangkaman min keꞌam iiy-iiyin nungant, yaꞌa.

13 Than wik way paththam aak-yaꞌangan waaꞌ-waaꞌantan thanttakamana

aꞌ puth pam wanch wiy anangan man-monkan thenchantan thanangana.

Than wik wayan thaw-thawantan thanttakaman-a,

an keꞌ thaaꞌ theek way-wayaman thuukangan piꞌ-piꞌana, pam mulathanakana.

14 Thananiya pam wanch wiy anangan nench-nenchantan thanang, aꞌ ak-akantan thanang,

15 aꞌ man kulan wampan thant-a, an paththam piik-piikwuntan thanttakaman mulakama,

16 aꞌ putha wiy anangana way-wayathantan thananga,

aꞌ ngangk way-wayam yump-yumpantan thanang.

17 Than kulakan maꞌ-yotam wenk-wenkantan thanttakamana,

than puth keꞌam ngaantam-ngeeyantan want-wanttakan ngangk minangaman wun-wunaynana.

18 Than puth God.ana keꞌam ngaantam-ngeey-ngeeyantan nunanga nil wuut piꞌan ngampar paththama.”

19 Ngay wik inangana lat ngench thayan kaꞌatham anpalan waaꞌ-waaꞌang niiyant yotamantana, Jews il-ilantan thampa. Niiy Jews.an puth keꞌ thawina, “Wik nanangan ngampar ngul ey? An yaꞌa.” Pam wanch yotaman ngamp ngul than-thanāmp um God.antang, aꞌ thawāmp nungant ngan puth way iiy-iiyana. 20 Ngampaniya puth keꞌ thawimp keꞌ ngampan wik thayan God.antaman minam piꞌ-piꞌanampa, puth amanamaniya nil God.angan keꞌ minan waaꞌiy ngampanga, yaꞌa! Ngamp keꞌ thawimp yimananganiya, puth ngamp keꞌam wik ngench thayan nungantaman ngeey-ngeeyanampa, yaꞌ anmana, ngamp way yippak iiy-iiyanamp. Nil puth piip God.angan kan waaꞌ ngampar wik thayan yotam nungantam anangana, ngamp yipam ngaantam-ngeeyāmp ngamparakamana ngamp wayan yump-yumpanampweya.

Nil God.angan Nhengk Nungantaman Kuch Nunang Kaaꞌ-Piichanathow Ngampang

21 Eeꞌa, pam wanch yotamangana wik ngench thayan God.antaman pip-pipina. Puth in yimanang ngulana, nil piip God.angan kan-ngul meenath ngampar, wik anangan than Moses aꞌ prophetsangan keenkanaman waaꞌin ngampar, wik engkanang ngul wun-wunan ngampar. Nil puth nhengk nungantaman Jesus Christ.an kuch nunang kaaꞌ-piichanathow ngampang. 22 Ngamp puth weeꞌ-weeꞌanangan kan-kanaman ngangkangaman piꞌ-piꞌāmp nunang Jesus Christ.an-a, nil God.angan way ngamparaman keꞌ-ngul ngaantam-ngeey-ngeeyow. Wik inangan God.antaman pam wanch yotamant Jews al-alantana aꞌ puth-a, pam wanch wiyant thamp than Jews yaꞌana, 23 puth pam wanch yotaman way iiy-iiyantan, puth nanpalan nil God.angan pam wanch min keꞌam waaꞌ-waaꞌan ngampanga. 24-26 Puth nil God.ana min iiy-iiyan ngampar, ngamp wukal keꞌam theeꞌamp nungant nil yipam nhengk-kunchan kuchow ngamparana, an yaꞌa, nil ngangk minangam kuch nunang, an yimanaman kuch nunang ngamparaniya. Nil Christ.angan nungamang theetath way ngamparamakaniy uthamow, chaapar nungantam theetath ngamparana, nil God.angan yipam keꞌ-ngul ngaantam-ngeey-ngeeyow way pam wanch al-alantaman than Christ.an ngangkangaman piꞌ-piꞌantan nunanga. Than pam wanch wiyangan nath ngaantam-ngeeyantan nil God.angan erkaman wayathow thananga pam wanch anangan aak keenkanaman wun-wunina, puth yaꞌa, nil ngampar meenath nilam thonakaman minana, puth nil erkam keꞌam wayath thanang, yaꞌa, nil ngangk mam thanang, amanaman-a, an meeꞌ engkanang ngul wun-wunan ngamparana, nil God.an min paththama. Than puth weeꞌ-weeꞌanangana God.an ngangkangan piꞌ-piꞌayn nunang-a, nilan puth way thanttamana kon-ngathow nunang ngul.

27-28 Amanamaniy-a, ngamp ulp-ulpanangana keꞌ iiy-iiyāmpa, aꞌ keꞌ waaꞌwump ngamparakam minaniya, yaꞌa! Ngamp ngul min-minam iiy-iiyimp ey? wik thayan God.antam yotaman minam piꞌ-piꞌimp ey? Yaꞌ ey! Ngamp wik nungantam keꞌ min-minaniy piꞌ-piꞌimpa, yaꞌ anman. Puth than weeꞌ-weeꞌanangan Christ.antan ngangkan theeꞌayn-a, aꞌ ngangkangaman piꞌ-piꞌayn nunangan-a, nil God.ana kon ngul ngathowana way thanttam al-alantamana. 29 Niiy inan ngeeyāna, nil pam moom piꞌan thonam thonakama, an nilam God anmana. Nil God thonam pam wanch yotamantana, Jews al-alantakam thonakam yaꞌa, puth thant wiy al-alantan thamp Jews yaꞌ al-alantan thampa. 30 Nil God.an pam wanch yotamantan thawa Jews.antan-a, puth-a, Jews yaꞌ al-alantana, “Than weeꞌ-weeꞌanangan ngayang ngangkangan piꞌ-piꞌantan-a, ngayan way thanttaman ngul kon-ngathow ngayang.” 31 Puth ngampwey Jesus.an ngangkang piꞌ-piꞌimp-a, ngampan puth wik thayan God.antamana keꞌ wantimpa, yaꞌa. Ngamp wikan konangam piꞌ-piꞌāmp aꞌ ngaantam-ngeey-ngeeyāmp thampa. Wik inangan God.antaman-a, an min-minam paththam ngamparana.

<- Romans 2 Romans 4 ->