1 Nil Apollos.an angman yippak wun-wun aak Corinth.angan-a, an-aniyangana nil Paul.an woyan keny-kenyangk anman wak-wak mal kungkama, aꞌ kuuwam ngul mel ench aꞌ ang-ngul wamp aak Ephesus.anga. Aꞌ angana nil uw thanang pam wanch wiy anangan than ngangkangaman piꞌ-piꞌin nunang piip God.ana. 2 Aꞌ nil thaw thant, “Aak an-aniyangana niiy ngangkangaman piꞌ-piꞌan nunang ngul God.an-a, an Ngeen-Wiy Minan wamp niiyant ey?” Aꞌ than wik inangan thawin nungant Paul.antan, “Yaꞌa, ngan puth keꞌam wik ngeeyan Ngeen-Wiy Min alantamana.” 3 Puth nil Paul.an thaw thant, “Niiy kan waaꞌān ngathara, than wiyangan kootra kuungkin niiyangan-a, an aak want-wanttak niiyant wun e?” Than puth thawin, “An keꞌ anman nil John.angan kootran ngakangan kuungk-kuungk thanang yimanangana.” 4 Paul.an thaw thant, “Nil John.angan kootra kuungk-kuungk thanangan-a, an thananiya weentin ngul way thanttam anpalana thanan yump-yumpin woyan min aakanakan weentinwey. Aꞌ John.an thaw thant pam wanchantan, ‘Niiy ngangkangam piꞌ-piꞌān nunang pam anan nila mangk ngatharangan wampowa, nil pam anana Jesusa.’ ”

5 Aꞌ than wik inangan ngeeyin nungantam Paul.antaman-a, thanan thawin nungant kootra kuungkow thanang an yipam meenathow thant wiyantan than kan-ngul ngangkangan piꞌ-piꞌantan nunang Jesus.ana. 6 Aꞌ nil Paul.angana maꞌ nungantaman kootrang thanttamang wunpa aꞌ Ngeen-Wiy Min God.antamana yaam keꞌanam paththam wamp thanta than puth thaaꞌnganth wiy-wiyam ngul thaw-thawin Ngeen-Wiy Min alantamana aꞌ than ngulana kan-ngul waaꞌ-waaꞌin wik min God.antamana thant wiyantan. 7 Ngeen-Wiy Minan yimanangan wamp thant pam twelve il-ilantana, pam twelve inanganiy-a, aak Ephesus punchana.

8 Aꞌ kep koꞌalamakana Paul.an iiy-iiy church Jews.antamaka aakanakan, aꞌ waaꞌ-waaꞌ thant pam wanch al-alantan wik min God.antamana. Nil ngangk thayanam thaw-thaw thant. Nil maꞌ-yotaman thaw-thaw thantaniya than yipam ngangkangam piꞌ-piꞌayn nunang God.ana nil puth kan-kanam paththam moom piꞌan ngampar, nil min anman iiy-iiyan ngampar umyompanamantana. 9 Puth than Jews wiy anangan yaꞌ way-wayamin, kuchek thayan weemin, puth than kaangk keꞌ paththam ngangkangaman piꞌ-piꞌayn wik Paul.antam anangana. Puth thananiya wik minana way waaꞌ-waaꞌin meeꞌ yotantangan. Puth nanpalana, Paul-a, puth Christians wiy anangan than koyam keꞌ-ngul iiyin church Jews.antamakan yaꞌ-ngul. Than ngaaꞌ thon-thonana aak thonang yalmathwin, aak wik thawanakan Tyrannus.antaman, aak angmanan-a, than wik God.antaman waaꞌ-waaꞌin aꞌ thaaꞌ-aath-aathin. 10 Nil Paul.ang thaaꞌ-aath-aath thanang aak angmaniya kaap kuchamaka puth nanpalana than yotam anangana Jews aꞌ puth Greeks anangan aak angan wun-wunin aak Asia.angan-a, than kan ngeeyin wik min Lord.antamana.

11 Nil God.angana thayanam paththam yump nunang Paul.an nil yipam work piꞌan anangan yump-yumpow thant. 12 Than pam wanchangan ngook anangan uwin nungantam Paul.antam nil kaꞌathaman piꞌ-piꞌ workakan, aꞌ than ngookan kalin pam wanch alpan al-alantan. Than alpan al-alangan ngookan maminan-a, than miyal erkam paththam wunina puth oony way al-alangan thampa wantin thanang ngula. 13 Than pam Jews wiy anangana than pal-puy iiy-iiyina, aak thon-thonak. Than kenth-kenthin oony way anangan ngangk thanttam anpalan. Aꞌ kinch thonamangana than ngaantam-ngeeyin namp nungantang Jesus.antang wichayn. Aꞌ than thawin oony way alantan puth wantow nunang pam thonam anana, than inangan wik thawin, “Ngan inan puth thawanan namp Jesus.antanga, pam inman nil Paul.angan waaꞌ-waaꞌan nunanga, nint pam inana wantān nunang.” 14 Pam than wik inangan thawinan-a, an than pam seven anangan nhengk nungantam pam namp Sceva alantamana, pam nil moom piꞌan thanttam priestsantam, aꞌ puth nil Jewa. 15 Aꞌ oony wayan paththam thaw thant pam al-alantan aꞌ wik inangan thaw, “Ngay kan meeꞌmiy nunang Jesus.ana. Aꞌ putha ngay meeꞌmiy nunang Paul.an thampa. Puth niiy inangan weeꞌ-weeꞌanangweya?”

16 Nil pam anman oony wayan ngangkangan piꞌ-piꞌa, erkam paththam chang pey thanttang pam seven al-alantangan aꞌ piik-piik thananga. Aꞌ nil kan-kanam piik-piik thanang aꞌ than kamp moꞌ-moꞌin yoon aawuchamana puth maꞌlipa ngook keꞌanang moꞌ-moꞌin aꞌ kemp thanttamana chaapar ukanang moꞌ-moꞌin. 17 Than Jews maꞌmangkamanga puth Jews yaꞌ al-alangan angan wun-wuntan aak Ephesus.angana than puth kan wik thooꞌ ngeeyin ngeenan wamp thantana, aꞌ than maꞌmangkam anangan pam wancha winynyang ngul moꞌ-moꞌin. Aꞌ anpalana than pam wanchangan kan min-min ngul ngaantam-ngeeyin nil Lord Jesus.an pam wuut piꞌan paththam aꞌ thaaꞌ-kuumpin nunang aꞌ thawin ngul nil kan-kanam paththam pam piꞌana putha pam min paththam. 18 Than pam wanch yot anangan thanan ngangkangan piꞌ-piꞌin nunang Jesus.an-a, thanana um thanttang thanin pam wanch yot al-alantakaman aꞌ waaꞌ-waaꞌin thanttakamana than wayan aak keenkaman yump-yumpin. 19 Aꞌ than wiy anangan kaꞌathaman wayanangan iiyin maꞌ-kunch thakan-a, thanana wampin aꞌ lat wayanang maꞌmangkam thanttam anangana thumang kiingkin angman meeꞌ thanttang yotantangana. Than puth meeꞌmiy wukal ngeen-ngeenan theeꞌ-theeꞌin kaꞌathamana lat al-alantakana wukal piꞌan puth theeꞌin, one hundred thousand dollarsweya. 20 Than pam wanch thaaꞌ-wantanamang keꞌ-ngoongkam ngul ngangkangan piꞌ-piꞌin nunang Lord Jesus.ana puth than kan thathin thanang pam wanch anangan weentin Christ.antan puth than woyan way kan-ngul wantin ngula.

21 Ngul-ngulana nil Paul.angan ngaantam-ngeey nil kaangk iiyow aakanak kaaw aak Jerusalem.aka, puth kaꞌathangamaniya nil ngaantam-ngeey mal kuuwam iiyow Macedonia wakana aꞌ putha aak Greece wakana. Nil Paul.an puth wik inangan thaw nungantakamana, “Ngay aak Jerusalem.akan kanan iiyāng-a, ngaya kuuwam ngul iiyāng aak Rome.ak thampanga.” 22 Aꞌ nil pam kucham anangan work nungantangan iiy-iiypula, Timothy aꞌ puth Erastusa kuch pulang kuuwam iiyowpul aakanakan Macedonia.aka. Aꞌ Paul.ana yaam wun ang kaaw aak Asia.angana.

23 Aak an-aniyangan-a, pam wanch wiy al-alantana man kul aak-yaꞌang wamp thant pam wanch Christians al-alantana than puth woyan minan wak-wakin Jesus.antamana. 24 Aꞌ pam thonam inana namp nungantiya Demetriusa nil alangan yuk silverama yuk ngeen-wiy yump-yumpan thanang keꞌ aawuch ngench thayan thanttamana. Namp god ananiy waaꞌin nunang Artemis. Than pam yota workan iiy-iiyin nungantang Demetrius.antangan aꞌ putha thananiy-a, wukal thaꞌiy uw-uwin yuk ngeen-wiy al-alantamana. 25 Nil Demetrius.angan yalmath thanang pam yotam anangan workan iiy-iiyin nungantangana aꞌ puth wiy anangan pam workan iiy-iiyin keꞌ nilaman iiy-iiy, aꞌ nil wik inangan thaw thanta, “Ayyang, niiyalang, ngamp yotamangana puth wukal piꞌan uw-uwanamp work ngampan iiy-iiyanamp anpalana. 26 Aꞌ niiy yotamangan kan thathaniy nunang pam Paul inana aꞌ puth niiy wik thakan kan ngeeyaniy nungantamana. Nil thaw thant, ‘Yuk ngeen-wiy inangana niiy pamangan yump-yumpaniy maꞌ niiyantamangan-a, an than gods yaꞌa.’ Than pam wanch yot ingan wun-wuntan Ephesus.angana aꞌ than pam wanch aak Asia.angan wun-wuntan-a, than puth wik nungantaman ngangkangam piꞌ-piꞌantan. 27 An ngeen ngul wampow ngampar e? Than pam wanchangan ngul waaꞌ-waaꞌin ngampang puth work ngamparaman way thak waaꞌ-waaꞌiythan. Aꞌ putha than ngul ngaantam-ngeeyin aawuch piꞌan ngamparaman, yuk ngeen-wiy piꞌan Artemis.an than-thanana, an keꞌ min yaꞌa. Than pam wanchangan yaakaꞌ keꞌ-ngul thaaꞌ-kuumpayn nunang Artemis.ana. An nil wuut piꞌan paththama, aꞌ an than pam wanch thaaꞌ-wantanamangan thaaꞌ-kuumpantan nunanga aꞌ putha yuk ngeen-wiy nungantaman thaaꞌ-kuumpantan. Puth thanan nath kaangk keꞌ-ngul weenayn nungantamana too wantayn nunanganiya!”

28 Than pam wanchangan puth wik inangan ngeeyin-a, thantaniya man kul paththam wamp. Than kan-ngul wik othamayan pech-pechina, “Nil Artemis.ana aak Ephesus aakanakana, nil kan-kanam wuut piꞌan paththama!” 29 Aꞌ yaam keꞌanam paththama than maꞌmangkam anangan pam wanch aak townangan wuntana wik othamayan pech-pechina. Than erkam paththam punth mamin pulang pam kucham inangan namp pulantiya Gaius aꞌ Aristarchusa, pul aak Macedonia punchana, pul nungantang iiy-iiypul Paul.antangana. Than pam wanchangan poo-poo thaꞌin pulang aawuch piꞌan angan, pek angan thenchin pulang. 30 Paul.an kaangk iiyow aꞌ um-menhang angan thanow thanttang pam wanch yot al-alantangana, puth than pam wanch Christians al-alangan kaangk keꞌ kuchayn nunang. 31 Than pam piꞌ-piꞌanam wiy anangan than ngurp nungantam Paul.antama, thananiya wik kuchin nungant thaaꞌ-mamanang thaw-thawin nungant keꞌ iiyowan umputhan thanow pam wanch al-alantangan. 32 Aꞌ pam wanch maꞌmangkam anangan aak angan yalmathwinan-a, an thananiya wik othamayan pech-pechin, puungk wiyiya wik wiy-wiyam pech-pechin, aꞌ puungk wiy ananganiya thaniya wik wiy-wiyam pech-pechin thampa puth than yot anangana keꞌ meeꞌmiy ngeenam nathan wik thawayna. 33 Aꞌ than Jews wiy al-alangan pam namp Alexander thaachin nunang iiyow aakanak um thanttangan thanow pam wanchantangana, aꞌ than pam wanch wiyangan puth ngaantam-ngeeyin keꞌ nil Alexander alangan ump-ump thanang wik thawanakana. Nil puth mal yump thant popam nyiinayn wik keꞌananga nil puth kaangkweya wik waaꞌow thant than Jews al-alangan kaꞌathangaman keꞌam kulak wenkin. 34 Puth than meeꞌmiy nunang nil pam Jewa than nanpalan kaangk keꞌ wik ngeeyayn nungantamana. Puth than yotam anangana wik inangan pech-pechina, “Nil Artemis.an aak Ephesus aakanakan, nil kan-kanam wuut piꞌan paththama!” Than pech-pechin yaamweya puth keꞌam ngangkangan theeꞌin yaꞌa. Than keꞌ-ngoongkam pech-pechina.

35 Aꞌ yaam keꞌanama pam piꞌan nilan aak piꞌ-piꞌana, nochath thanang pam wanch anangan aꞌ nil kan-ngul wikan thaw thanta, “Ayyang, niiyalang, aak Ephesus punchan ngampa, pam wanch aak umyompanamana than kan meeꞌmiy nunang yuk ngeen-wiy piꞌan nungantam Artemis.antamana aak inpal kenyan keeka aak piꞌanang ingan Ephesus.anga, puth ngamp il-ilangan thonakama meeꞌ-pathathanamp nunang ngeen-wiyana aꞌ puth aawuch wuut piꞌan nungantamana. 36 Wik ngatharaman kan-kanama, than pam wanch wiy anangan keꞌ thawiythana ngay keꞌ wik uuy-uuyamang. Puth niiy yotam inangana appap nyiināna aꞌ keꞌ weenthamāna. 37 Nungkway than pam il-ilangan keꞌaman maayin way min aawuch Artemis.antam anpalan-a, aꞌ nungkway than keꞌaman way waaꞌ-waaꞌin nunang Artemis.an-a, niiy puth pal wampathan thanang ey! aak iikanakan ey! 38 Nil Demetrius aꞌ pam nungantangan work iiy-iiyantana than nath kaangk waaꞌayn thanang pam inangana. Than puth courtang wunpayn thananga! Than courtakan iiyaynwey-a, thaniya an-aniyangana iiyayna, than pam piꞌ-piꞌanam anangan courtangan nyiinayn. Than ngul ngeey-ngeeyayn thanang wikana, aꞌ mep-mepayn thanangana. 39 Aꞌ niiy kaangk putham nath thawān wik anpalman-a, ngampan puth yotamana yalmathwumpa wikan yumpanakana. 40 Than pam wanch aak nath-nathan wuntan nath wik thooꞌ ngeeyiythan niiyantamana niiy yotamaniy pech-pechanana, kuchek way wuninweya, thananiya aak ngamparam inana way ngul waaꞌ-waaꞌiythana, niiy puth pam wanch yotaman pam wanch kulliy ngul weenaniya. Puth ngan pam piꞌ-piꞌanam il-ilangan want-wanttak waaꞌ-waaꞌān thant pam wanch wiyantana niiy ngeenam kul piꞌ-piꞌaniy e? An yaꞌa!” 41 Aꞌ wika inangana nil pam piꞌanan thawa. Aꞌ nil kan-ngul thaw thant pam wanch yotam al-alantan puth kan iiyayn aawuch thanttamaka.

<- Acts 18Acts 20 ->