18
Papilon ka kësang pö utpet ëa
1 Omën pöt pet irën ne kaalak itaangkën ensel munt namp kutömweriaan yangerakël yeiraan itenaut. Pöp Anutuuk weëre kosang kësang mangkën pim ëwaöök yangerak ëwa ë pet yair. 2 Pël ëën pi ngön ë olëak epël ya.
“Papilon yok utpet yaë.
Papilon ka kësangö utpet ëak kö yes.
Pël ëën peene urmer ke nampre nampre int utpetarö pitëmënt pëën wë.
3 Ka kësang pö utpet yes pöta songönte epël.
Öng pöpök omën nampë muntap wain iit mangkën nak kön irikor yaë pöta ök
omp nga ëëre utpetat kësang ë pël yaaö pöt pet elmëën yang omën pourö tapël ëeim wëaurö.
Pël ëak yang omp akörö pit öng pöpring utpetat ëeimaurö.
Pël yaëën öng pöpë omën nant kësang öpnaataan kentre kaur yaaö pötaan
yangerakë omën monere urömatëën ya yamëngkauröak omnant menak pim naëaan sum kësang weima.
Pötaanök kö yes.”
4 Pël yaan ne kat wiaan ngön munt nent kutömweriaan epël ya.
“Nem omnarö, ar öng utpet pipop sëp wesak kas seë,
öng pipopring wë saun koirak pötë kangut önganëën.
5 Öng pöpë utpet yaaö pöt kësang panë sëën
Anutu kutömweri wë pöp itenak utpet kangut mampënëak kön wieim wë
6 Ar omën utpet kangut pi mampunë pörö pim këlangön omën muntarö yemengka pötön kön wiak kangut mampun.
Ar pël ëënëak pöt pi omnarö utpet mena ëën pöt kangiir il wesak mampun.
Omën nampë muntap i ngaat mangkën nak utpet yes pöl öng pöpök omnarö utpet wesak këlangön kat mowieima.
Pötaanök i nga kosang panëët yemangk pöl il wesak këlangön kësang kat mowiin.
7 Pi pimtën wak isak yeem pim utpet yaautëën ërëpsawi eima pöta ök
arök kangiir këlangön kat mowiin ing ap.
Pim lupmeri kön korar epël wieëaup.
‘Ne öng ak kësangëp yak omp ak urtak wel aisëeë omnarö ngarangk yaalmëaup.
Ne öng kapiröa ök omnantëën il ngentingenti naënëp.
Könöm nant nem naë oröön ingre ya ilak naënganëëp.’
8 Pimtok kön korar pöt wieëa pötaanök kët kopët nentak utpet epot pim naë orööpnaat.
Anutuuk maan yaumanre ngöntök yaaöre ën ingre ya ilak yaaö pöt orööpnaat.
Aköp Anutu utpet kangut yemengka pöp weëre kosang kësang yaaup yak
puuk maan es kotöpnaat.”
Pël yaan kat wiaut.
9 Yangerakë omp ak piiring ya utpet yamëngkem pötëën ërëpsawi eimaurö öng pöp, ka kaö pö, es yokotön koulöpö ngaarëk yawisën itenak pimëën ingre ya ilak apnaarö. 10 Pit Papilon ka kaö pöökë omnaröa këlangön kat yawia pöten itenak pitta tapël ëëpanëak kas ëën om kamaarek taueë epël apnaat.
“O yakom, ka kaöaöön yaköm pan.
Papilon ka kaöaö, 1 aöa akun kot pita öngpök
nim saunatë kangiir utpet yaën.”
Pël yaan kat wiaut.
11 Ën yangerakë omën monere urömatëën ya yamëngkauröeta omnaröak pitëm naëaan urömat kaalak sum naëpan pël wesak pimëën ingre ya ilak apnaarö. 12 Pitëm uröm pöt epot. Koolre siluwa, kël ompyaut, polere kal, songre sar, poë koröp ke naöre naö ompyaö retëngretëng ëaut, këra köp nga kamp ke nampre namp yaautre omën nant këra sum kësangötök ket ëaut, aini parasre yaap, kël retëngretëng ëautök ket ëaut, 13 omën kamp ompyaö këra koröp neweriaan yewaut yapinte sinamon pël yema pötre ëwamöt, këra ëpre kömau nga kamp ompyaut, wainre i kolap kaömp ar ëëpnaat, korupaë lölöpöt, pol purmakaöre sëpsëpörö, pol osöröere ën kaar pitëm wii ngan ëak wak weruak yaautre, ën omën inëën yaauröere, pitëm sum yaaö pöt pipot.
14 Omën monere urömatëën ya yamëngkauröak öng pöpön epël ya.
“Omën nant nim ömëak kent kön yawian pöt sasa won yes.
Monere këëre kaömpre omën ompyaö ë rangi pötta won yes.
Pötaan omën pipot pout kaalak naöngan, won pan.”
15 Pël ëak omën monere urömatëën ya yamëngka pörö omën ke pilöt pim naë sum yeëa pörö Papilon ka kaö pöökë omnaröa këlangön kat yawia pöten itenak pitta tapël ëëpanëak kas ëën om kamaarek taueë ingre ya ilak ëak epël apnaat.
16 “O yaköm, ka kësangöön yaköm pan.
Ka kësang epö öng nampë ök.
Pi ulpëën ompyaö retëngretëng köp nentepar möa namp mëak
pim koröpöök koolre songre sar ë rangiak wëaup.
17 Akun kot 1 aöa pöta öngpök pim monere uröm pout kö yes.”
Ën i kaö wangatë ngarangk pöröere omën narö wangat wak ka muntatë yes piporö, wangatë inëën yaauröere omën i kaö pöök mon ya yamëngka pörö pourö pit Papilon kak pëlëër wiaan kamaarek taueë 18 itaangkën ka pö es yokotem koulöpöt oröak yesën itenak ngön ëak epël yema. “Elei, ka kësang epöökë ök naö e nerek wi naön, won pan.” 19 Pit pël mëak kaplak ilaimeë ingre ya ilak ëak epël aim wë.
“O yaköm, ka kësang epöön yaköm pan.
Wangatë ngarangk yaaurö tiar ka kësang epöökë urömat wak yesem monere uröm kësang weimaurö.
Akun kot 1 aöa pöta öngpök ka epö kö yes.
20 Kutömweri ngëëngköröere Anutuu ngön yaaöre tektek ngön yaaö omënere pim omën muntarö ar ka pö won yes pötaan ërëpërëp ëën.
Ka pöök utpet elnieima pötaan Anutuuk kangut yamangk.”
Pël yaan kat wiaut.
21 Ën ne kaalak itenaan ensel weëre kosangring nampök kël kësang panë naö wak wal ëak i kaöök yoolëem epël ya.
“Nem këlö i kaöök yoolak epël
Anutuuk ka kësang Papilon pö utpet
wasën sasa kö sëën kaalak itnaangkan.
22 Pël ëën intöere iraö ngön aöre pëëp mëmpö,
polere kuup ngön aö pöt ka pöökaan kaalak yaan kat nawiingan.
Ën omnaröakta ka pöök ya ke nentere nent yamëngkën itnaangkan.
Korupaëta kas yamöem yaan kat nawiingan.
23 Ka pöökaan es rampe newes kaalak ëwa naën ëëpnaat.
Öngre omp yaëën ipre kër yemangka pötenta itnaangkan.
Ngaantak ka pöökë omën monere urömatëën ya yamëngkaurö yangerakë kaö sak wakaimaurö.
Ën ka pöökaan naröak kempre tëptëp wak yeem omën muntaröen morök elmëeimaurö.
24 Papilon ka kësang pöökë omnaröak Anutuu tektek ngön yaaö omënere pim omën muntarö mëneima.
Ën yang omën naröeta kööre toköröak mëneima pël ëautë saunat Papilon ka kësang tapöök wieëa.
Pötaanök Anutuuk kangut yaalmë.”
<- Ënëma Ngönte 17Ënëma Ngönte 19 ->
