1 Mara ḡelauna, anela au mara i ḡeta me, Bada awarina ma tauviwavuna - Satan taui i votaḡoi. 2 Ma Bada Satan i paridadanei, “Tam meiei e nenei?”

Satan i paribelei i pa, “Tau were ma nare a nenae ma a nenei, dobu a tetetei.”

3 Ma Bada i paridadana, “Au taunola Job u inanai bo eḡa? Tauna rava aiaii kaukauana eḡa aiai ḡelauna au dobu nanare. Tauna rava jijimanina ma patupatutuna. Ma e vivivireiu ma ḡoʼapoapoe e gedugedaiei. Ana lawana anina jijimanina e maemaeni avena da orau u taini da a kovoḡa labalababai.”

4 Tauviwavu Bada i paribelei, “Tauna ana lawana ava e vinuabolei, me rava ana purapura anatapuna ina verenei da eḡa ina kero. 5 Wate uram ma viloloi ma tupuana ma ḡelamina ma ravi, ma au matam ina parivai-apoapoenim!”

6 Bada i riwei, “Anina, tauna au uram a tereterei wate eḡa ma viraḡeni.”

7 Ma Satan Bada i netawanei ma i nae da Job kero apoapoei i verei, au loulouna da i ḡaira au ae lapalapana. 8 Ma Job nau gebona i vaia da kerona i kakakaroi ma au lapukare i kiakiala.

9 Awana Job i riwei i pa, “Amapo da am lawana jijimanina ma vovojijini bo? God ma parivai-apoapoeni ma ma iraḡe!”

10 Wate Job i paribelei i pa, “Tam opaopam! Eḡa nanare ma babani. Tauta God kaua maḡamaḡaui ma aiaii e verevereta, ma apoapoei e paripari-tawaneiai, maiteni tana vaia.”

Wei kauai maḡamaḡaui apoapoe Job awarina i tupua, wate tauna ana babani awarinei eḡa ḡoʼapoapoe ita kauei.

11 Maranai ana rava tonuḡa riwana i vaia da Job wenanare ma menanare i vinuʼapoapoenei, taui i vitagogiei ma i nae Job ita raugenari ma ita vinuaubai. Taui wavai Eliphas tauna Temanei, Bildad tauna Shuahei ma Zophar tauna Naamah ei. 12 Taui tapunei Job i ʼnanai ma i vinuanainei da lamna Job. Maranai i ʼnana-kauei. Taui i vitouana, ma ai kwama i viaisikasikai ma pokau au tepai i tawatawanei. 13 Ma aupom ma waguvarai 7 taui au doa i vikiakialei, Job i mae-vereverei. Ma i ʼnanai da ana nuabola i rata guratana ma gamoi i pota ma i kiala genuatau.

<- Job 1Job 3 ->