Genesis - Karena 48

Jacob, Ephraim ma Manasseh i viaiaini

1 Wei kauai au murina, rava Joseph i riwei, “Amam i doria.” Anina ma natunatuna Manasseh ma Ephraim i taravaini ma i nae amana da ita inanai.

2 Rava tagogi Jacob i riwei, “Natum Joseph i ḡetai da ina inanaim.” Jacob doridoriana ma i voguratei da i vomairi ma ana animatave au tepanai i kiala.

3 [a]Anina ma Jacob natuna Joseph i riwei, “God Vivirewapana Kaukauana awariu i eḡa au Luz (Bethel) au Canaan ma i viaiainiu. 4 Ma i riweu, ‘Natunatum ana vimaḡai ma am epaepaia ai dam ana viratai; wei dobuna am epaepaia ana verei da ina viḡariana-nonoei.’

5 —Ma lamna aubaina ḡoḡoḡau ruaḡa Manasseh ma Ephraim au Egypt tuputupuai muriai da a nei; lamna tau ana vaia da natunatu me natunatu Reuben ma Simeon. 6 Roaroa muriai e tuputupua lamna tam ḡarimei; ma ai buderi Ephraim ma Manasseh awariei ina vaia.”

13 Anina ma Joseph natunatuna ruaḡa i neiai Jacob awarina, Ephraim amana au oiena lamna Jacob au kelakelauna ma Manasseh amana au kelakelauna lamna Jacob au oiena 14 Wate Jacob uraoiena i tere-taḡonei ma Ephraim au kolana i terei avena da tauna umau, ma ura-kelakelauna i tere-taḡonei da Manasseh au kolana i terei avena da tauna natuevou.[b] 15 Anina ma Joseph[c] i viaiaini i pa,

“God. Tam Amau Isaac ma ḡoḡau Abraham ai God,

God taupainiu au lawana au anatapuna,

16 Ma am anela taugagaloeu au anatapuna wei roaroai ma viaiaini!

Ma wavau ma amamau wavai awarii ina mae-nonoa

ma a raraupari da ai dam ma viratai au dobu.”

17 Wate maranai Joseph i ʼnanai da amana aiwai i kaukauei ma tauna eḡa ita vinuaiai; ma amana urana Ephraim au kolana ita vaitawanei ma Manasseh au kolana ita terei. 18 Joseph amana i riwei, “Amau eḡa nanare. Wei tauna natuevou uraoiem au kolana ma terei.”

19 Wate Amana i riwa, “Natu! Tau a aramanei aiwai a kaukauei. Manasseh maiteni ana dam ina rata kaua. Wate ana tevera wavana ina rata ma ana dam ina rata dewadewa eḡa me tuana.” 20 Anina ma Jacob roaroa nai marana i viaiaini i pa,

“Mai Israel wavam ina latoni maranai e viviaiaina, taui ina riwa,

‘Tauai a raraupari da God ina viaiainim me Ephraim ma Manasseh i viaiaini nanare.”

Wenanare lamna Ephraim wavana i ailatoni ma muriai Manasseh wavana.

21 Ma Israel, Joseph i riwei, “Tau aburuna ava da ana iraḡe. Wate God awarim ina mae da ina naiana-melem au Canaan, amamam ai au dobu.”

Genesis - Karena
a
- b Taui ai nota da au oiena kialana lamna kaua bo nota ḡaeḡaena ma eḡa me au kelakelauna kialana nanare. Lamna aubaina Jacob nimana au oiena tevera au kolana i tereterei tauna amapo viaiaina ḡaeḡaena ina vaia eḡa me ḡelauna nanare. Lamna aubaina Joseph i baiei maranai Jacob nimana au oiena tevera umauna au kolana i terei.
- c Maranai Jacob ḡoḡoḡana i viaiaini, tauna Joseph i viaiaini.