1 Ma Adam awana Eve maiteni i matave ma i duama ma tevera orotona i tupua. Ma i riwa, “Bada ana aguei natu a vaia.” Lamna aubaina i ḡorei “Cain.”[a] 2 Ma muriai tevera orotona ḡelauna i ḡuni ma i ḡorei “Abel.”[b]

Ma maranai taui i vilaraga, Abel tauna tauviḡamoḡamo ma Cain tauipi. 3 Mara tagogi Cain doa uana ḡelaui i neiai da i puloei Bada awarina. 4 Wate Abel nanare sipu natuevouii i vunu-naiei ma sia monamonai i apui Bada awarina ana pulo. Bada Abel ma ana pulo i vinuaiaiei. 5 Wate Cain ma ana pulo eḡa ita vinuaiaiei. Ma lamna aubaina, Cain amlona i ḡaiḡai ma naona i peu.

6 Anina ma Bada Cain i riwei i pa, “Aiwai aubaina amlom i ḡaiḡai? Aiwai aubaina naom i peu? 7 Mepa da kaua aiaina uta kauei, lamna ata vinuaiai awarim. Wate am nota da apoapoena ma kauei, lamna ma aramanei da apoapoe am au metaeta e daradaraim da ina vovaiubaim. Wate tam ma virewapana da ma vovaiubai.”

8 Ma muriai Cain ana tevera Abel i riwei, i pa, “Tana nae, tana babara.” Ma maranai i ḡeta au wapu, Cain i vomairi ma ana tevera Abel i vunui da i viraḡeni.

9 Ma Bada Cain i paridadani i pa, “Am tevera Abel mepa?”

Ma Cain i paribelei, i pa, “Eḡa ata aramanei! Tau au tevera taupainina bo?”

10 Ma Bada i riwa, i pa, “Aiwai u kauei? Am tevera tarana doei e kwatukwatu raubiwa aubaina. 11 Lamna aubaina tam marina apoapoe awarim a tereterei. Am tevera tarana uramei au doa i toi da doa i matave ḡaḡari. 12 Ma lamna aubaina maranai u ḡoei da doa uta ipiei, lamna uana eḡa ma nelaḡai ma am animae eḡa. Tam ma babara labalababa.”

13 Cain Bada i riwei, i pa, “Au kovoḡa i rata kaua ma eḡa tagotagogina da ana avarai! 14 Tam wei doanei e viviopuniu da naom eḡa ana inana-melei. Tau ana babara labalababa ma eḡa au animae. Ma rava ina nelaḡaiu ma ina viraḡeniu.”

15 Ma Bada i paribelei, i pa, “Eḡa! Aiai da i viraḡenim, ana kovoḡa ina rata guratana.” Ma ana mataira Cain awarina i terei da rava ita viḡaei da tauna avena ita vunui, maranai i nelaḡai.

25 Adam awana maiteni i matave ma Eve natui ḡelauna i ḡuni. Eve i riwa, i pa, “Cain ana tevera Abel i viraḡeni. Ma lamna aubaina God natu orotona i vereu da Abel i raviepaiai.” Ma i ḡorei Seth. [c]

26 Seth natuna orotona i tupua ma i ḡorei Enosh. Ma nai marana, rava, Bada wavana vivivireina viborumana i vikarei.