1 Dam mai Ishmael Joseph i ḡairei au Egypt, ma Potiphar tauna i gimarai da ana taunola. Potiphar tauna Egyptei ma sorodia ai bada ḡaeḡaena. 2 ✡Act 7:9Bada Joseph i mae-ratui ma i voagui da anatapuna aiaina i kaukauei ana bada aubaina. Tauna Potiphar ana au numa i mae. 3 Potiphar i ʼnanai da Bada Joseph i mae-ratui ma i voagui da aiwai anatapuna i kauana-kauei, 4 ma wei Potiphar i vinuaiaiei ma Joseph i terei da tauna aubaina ina nola, ma ana taunola numa au orana, ma ana purapura anatapuna ina vibadei. 5 Nai marana da i nenai, Joseph awarinei ma Bada Potiphar ana numa orana ravai ma ana purapura anatapui au numa ma ana au wapu i viaiaini.

6 Anina ma Joseph vaivai i verei da Potiphar ana purapura anatapui i paini, ma ana bada ana nola da am ava ina paipaini.

Joseph i tupua da karawata ma inanana aiaina. 7 Kampa eḡa ita mae-pora ma ana bada awana Joseph i ʼnana rauoḡarei ma i riwei i pa, “Ma nei tana matave.”

8 Wate Joseph i geduai ma wavine i riwei i pa, “Ma i ʼnana, tau au bada weka i tereu da a vivipaipai ma lamna aubaina tauna eḡa aiwai numa au orana ina vinuabolei. Tauna ana purapura anatapuna au urau i terei. 9 Tau au rewapana wei au numana nanare tauna, ma eḡa aiwai ita nuanei anina tam ainelam. Menanare da kaua apoapoena ana kauei da God au matana au ḡoa ina apoapoe.” 10 Wavine marana patapatai Joseph i rarauelari da maiteni ita matave, wate Joseph i gedugeduai ma i nene-tawanei.

11 Mara tagogi Joseph i nae au numa da ita nola, ma kampa eḡa taunola ḡelaui. 12 Ma Potiphar awana i nae ma Joseph ana au kareko i voa ma i riwa i pa, “Ma nei tana matave!” Wate Joseph i ruba-opu au doa ma kareko wavine au urana i voterei.

13 Wavine i ʼnanai da Joseph i ruba-opu ma ana gara au urana i voterei, 14 ma wavine ana taunola i kwatuei da i nei ma i riwa i pa, “Weka ona inana! Wei Hebreweina awau i neiai awarita, i vinameta. I nei awariu ma i ḡoei da ita viawawaneu wate tau garara a vikarei. 15 Ma i nonori a garagarara ma i ruba-opu ma ana kareko i ruba-tawanei.”

16 Ma wavine kareko i paini da awana i nememei au numa. 17 Ma wavine riwana tagogina awana i riwei i pa, “Wei Hebreweina tam u neiai awarita, i vinameta. I nei ma i ḡoei da ita viawawaneu. 18 Wate maranaina a garagarara, tauna i ruba-opu ma ana kareko au ririvau i voterei.”

19 Potiphar awana ana babana i nonori ma amlona i ḡaiḡai kaua. 20 Anina ma tauna Joseph i vaia ma panipani au numana i tawana-ruiei, mepa gulau ana panipani e mamae ma kampa i mae.

Maranai Joseph au panipani-numana 21 ✡Act 7:9Bada Joseph i mae-ratui ma i viaiaini, lamna aubaina da panipani taupainina Joseph i vinuaiaiei. 22 Ma tauna Joseph i terei da panipani ravai ita vibadei ma nola au urana i terei. 23 Panipani taupainina ana nuabola eḡa aiwai, aubaina Joseph aiwai anatapuna i paipaini. Ma Bada tauna i mae-ratui ma i voagui da aiwai anatapuna i kauana-kauei.

<- Genesis - Karena 38Genesis - Karena 40 ->