1 Moses poiana Jethro, mai Midian ai pirisi pulo tauapuna i nonori aiwai anatapuna Bada i kaukaueia Moses ma mai Israel awarii; ma menanare Egyptei i taravaina-opunei.

5 Moses poiana - Jethro, Moses awana ma natunatuna nelarai ruaḡa i nei da Moses ita raugenari au mutulua. Weka Moses ana rava maiteni i rauḡaravu God ana ola au ḡereḡerena. 6 Jethro riwa i paritawanei Moses awarina da taui i nenei. 7 Ma Moses i opu da poiana ita nebelei. Tauna i mae-ḡaira ma poiana i raudunelei ma i vigia-laḡolaḡonei. Taui i viegualau vivira ma i rui Moses ana au numagara. 8 Ma Bada aiwai i kaukaueia Pharaoh ma mai Egypt awari mai Israel aubai; ma apoapoe anatapui au eta i nebelei; ma menanare God taui i vilawani; anatapui poiana i pariverei. 9 Ma Jethro nuanuana i ai kaua maranai i nonori menanare Bada aiwai anatapuna aiaii i kauei mai Israel aubai maranai Egypt urai vivirewapanana awariei i tere-opunei.

10 Jethro i riwa i pa, “Voepaepa Bada awarina. Tauna Pharaoh ma mai Egypt awarii i vai-tawanemi. Ee, Egypt urai vivirewapanana awariei i vai-tawanemi. 11 Marina a aramanei da Bada i ḡetelara eḡa me god ḡelaui nanare. Aubaina Bada ḡoḡogulagulaui mai Egypt ai kaua apoapoe mai Israel awarii aubaina i kovoḡi.”

13 Ma marana i tom, Moses ana au anikiala i kiala da ita rauetara. Ma rava Moses i mairi-kwaviviroi ma i vipaipai ubaubanai da madeḡa i ḡaira. 14 Maranai Jethro i ʼnanai aiwai anatapuna Moses i kaukauei rava aubaii. Tauna i vitara-viravira i pa, “Wei aiwai rava awarii e kaukauei? Aiwai aubaina ainelam wei e kaukauei, ma wei ravai e maimairi pompom da am riwa ita nonori?”

15 Moses i paribelei i pa, “Tau wei a kaukauei aubaina rava e nenei awariu da ita aramanei aiwai God e ḡoeḡoei da ita kauei. 16 Maranai rava ruaḡa e viviamparipari. Taui e nenei awariu da a teretere-vaijijimani; ma God ana riwa ma ana tarawatu a ririwei.”

17 Moses poiana i riwa i pa, “Aiwai tam e kaukauei lamna eḡa ita ai. 18 Nola e kaukaueia i vitai kaua da tam ainelam eḡa tagotagogina uta kauei. Tam ma rava ona voirairaḡe. 19 Ma rautaniḡana ma ana vinuaterenem; ma God awarim ina mae. Tam anina da rava ma raviepaiai God au naona ma ai viamparipari ma neiai awarina. 20 God ana parivai-araramana ma ana tarawatu ma viararamani ma taui ma viatataiei da menanare ita maenei ma aiwai ita kauei. 21 Wate am patara awariei nelara ḡelaui araramanii ma God e viviborumei ma eḡa amkwalakwalai ma vinei da rava ina vibadei: ḡelaui rava 1,000 ina vibadei; ma ḡelaui rava 100; ma ḡelaui rava 50; ma ḡelaui rava 10 ina vibadei. 22 Taui rava ai viamparipari ina tere-vaijijimani. Wate aiwai da i piripiri, ina neiai awarim. Taui ina voaguim da am vita ina avarai ma ina votelatelai. 23 Mepa da God i ririweia ma kauei amapo eḡa ma voirairaḡe ma rava anatapui ana nuaiaii ina nae ai au numa.”

24 Moses, poiana i rautaniḡanei ma aiwai anatapuna i ririweia i kauei 25 Ma Moses mai Israel araramani i vinei da rava 1,000 i vibadei, ma 100, ma 50 ma 10 i vibadei. 26 Wei babadai, rava ai viamparipari i teretere-vaijijimani ma aiwai da i piripiri i neneiai Moses awarina. Ma kaua telatelai i teretere-vaijijimani.

27 Anina ma Moses, poiana Jethro i viegualauei, ma Jethro i naeme ana au dobu.