5 Maranai riwa i ḡeta Pharaoh awarina, da mai Israel i ruba. Pharaoh ana gabegabemani maiteni ai nota i virai ma i riwa, “Tauta aiwai ta kauei? Ma ata taunola ta voterei da i nepai!” 6 Anina ma Pharaoh ana chariot i vokaukauei, ma ana sorodia i vaia ma i nae. 7 Ana sorodia anatapui 600 vinevinei ai au chariot i geru, ma chariot ḡelaui au Egypt maiteni i nae. 8 Bada, i kauei da Pharaoh, Egypt ai gulau nuanuana i vopotai ma mai Israel i viaḡaḡana-taḡoei, Mai Israel ana tepatorai i nenae. 9 Mai Egypt ana sorodia i viaḡaḡa, Pharaoh ana horse ma chariot anatapui ma horse babadai ma ana sorodia anatapui, maiteni i viaḡaḡa da au gera i mamaelana, i votani dobu Pi-Hahiroth, Baal-Sephon au baba ḡelauna.

10 Maranai Pharaoh i tuturiai, mai Israel i taepai da i ʼnanai ma i rovo kaukaua da orai i sisi, ma Bada awarina i garara agu aubaina. 11 Ma mai Israel Moses awarina amloi i ḡaiḡai i pa, “Au Egypt eḡa kokoaga da u taravaina-opunelai da weka au mutulua ana iraḡe bo? Aiwai u kauei awariai? 12 Tauai au Egypt a riwem, ‘Ma voterelai ma ana mae ma Egypt ai taunola!’ I ai kaua da tauai ata mae Egypt ai panipani, ma eḡa au mutulua ata iraḡe.”

13 Moses ana rava i paribelei, “Eḡa ona rovo! Ona mairi jijina ma ona inana menanarena Bada ina vilawanimi amadodo. Mai Egypt amadodo o inainanai eḡa melanai ona inana-melei. 14 Bada aubaimi ina viḡavia. Taumi ona mae-genuatau.”

15 Ma Bada, Moses i riwei, “Aiwai aubaina awariu agu e toutouei? Mai Israel ma riwei da ina vidagu. 16 Am jiḡona ma voepai da ma viloloi boga au tepana ma boga ina vilamonei, ma mai Israel boga au pouna doa au alalana ina babara damana. 17 Tam ma raubiga, Tau mai Egypt a vitepatorai da mai Israel ina viaḡaḡei. Maranai Pharaoh ana vovaiubai, ana sorodia, chariot ma ana horse sorodiai, rava Tau ina voepaepaiu. 18 Tau Pharaoh ana vovaiubai, ana chariot ma ana horse sorodiai da mai Egypt ina vivivireu ma ina aramanei da Tau Bada.”

19 Anina ma God ana anela, mai Israel ai eta tauravenia i nae ma mai Israel au muri i mairi. Ma apau maimairina au naoi i nei ma taui au muri i mairi. 20 Apau mai Israel ma mai Egypt au poui i mairi, ma maranai au i pom, apau lalalaina mai Israel i verei ma mai Egypt au waguwaguvareina i mae. Ma lamna aubaina mai Israel ma mai Egypt ai au gabu i mae-genuatau.

21 Moses ana jiḡona i viloloi boga au tepana ma Bada kariwabu ḡaeḡaena i paritawanei, ma boga i vilamonei, kariwabu i ruba da mara i tom da doa boga au pouna i alala. 22 Ma mai Israel boga i damani doa au alalana, Ma boga olana i mairi au oiei ma au kelakelaui.

23 Anina ma mai Egypt, Pharaoh ana horse ḡelaui, chariot ma taurubeina mai Israel i votaḡoi da au boga i rui, mai Israel au murii. 24 Ubaubanai boiboḡi Bada apau maimairina ma ai tuatuana araratana au orana ma i ʼnana ḡaira ma mai Egypt i viaiḡoaḡoai. 25 Ma chariot ana aniruba i viapoapoeni da ruba i kauana-avei. Ma mai Egypt i riwa, “Bada mai Israel e vovoagui, ma e viviviḡavieta, lamna aubaina tana ruba-tawanei!”

26 Ma Bada Moses i riwei, “Am jiḡona ma viloloi boga au tepana da boga ina nememei, mai Egypt au chariot ma sorodia horse au tepana anatapui ina puru-pai.” 27 Madeḡa i ḡoḡoḡo ma Moses urana i viloloi boga au tepana, ma laḡilaḡina boga i naeme ana au gabu. Mai Egypt ita ruba wate Bada taui au boga i viorereni. 28 Boga i naeme ana au gabu ma mai Egypt sorodia anatapuina i ruirui au boga i monu. Eḡa aiai tagogi ita lawana.

31 Maranai mai Israel i ʼnanai da Bada wei kauana vivirewapanana i kauei mai Egypt awarii, taui Bada i vivirana-kauei ma i vitumaḡanei ana taunola Moses maiteni.

<- Exodus - Oputawanana 13Exodus - Oputawanana 15 ->