1 Wate Saul amapo da i mejimeji ma i ḡoeḡoei da Bada ana tauvitumaḡana ita viraḡeni. Ma i nae Pirisi Ḡetelarana awarina, 2 ma i vibaḡai da pepa ita girumi boru-numai babadai awarii au Damaskas da rewapana ita verei da Iesu ana etanai tauvitumaḡanai, nelara ma waivine ita pani ma ita neiai au Jerusalem. 3 Ma Saul, Damaskas i tuḡereḡerei, nanare ma lalalaina marei i ḡairai da tauna i ravilalai. 4 Tauna i peu au doa ma pona i nonori awarina i babani i pa, “Saul, Saul! Aiwai aubaina e rarau-iviapoapoeleu?”

5 Saul i paridadana, “Tam aiai bada?”

Ma pona i paribelei, “Tau Iesu, tauna e rarau-iviapoapoelei! 6 Marina ma vomairi ma ma rui au Damaskas, ma kampa aiwai ina riwem ma kauei.”

7 Nelara Saul maiteni i nenae i mairi kwakwa, ana gamopotai, taui pona i nonori wate eḡa aiai ita inanai. 8 Ma Saul au doa i matamatave i vomairi ma matana i kala, wate eḡa aiwai ita inanai. Ma ana rava i raunimavoai ma i taravaina-naiei au Damaskas. 9 Ma au pom tonuḡa eḡa ita inana, eḡa ita am bo ita uma.

10 Au Damaskas tauvitumaḡana i mae wavana Ananias. Bada ana au inana i viatataiei i pa, “Ananias!”

Ma i paribelei, “Bada, tau weka!”

11 Bada tauna i riwei, “Etanai wavana Etanai Jijimanina ma vaia da Judas ana au numa, kampa oroto Tarsusei wavana Saul ma baiei. Tauna marina e raraupari awariu. 12 Ma ana au inana i ʼnanai oroto wavana Ananias i nei awarina ma urana au inina i terei da ita inana-me.”

13 Wate Ananias i paribelei, “Bada, rava maḡamaḡaui i riweu da wei ravana ana kaua i apoapoe kaua tauvitumaḡana awarii au Jerusalem! 14 Ma weka i nei pirisi ḡaeḡaei ai rewapanei da aiai wavam e viviborumei ina pani.”

15 Wate Bada, Ananias i riwei, “Ma nae! Tau a vinei da aubaiu ina vitaunola ma wavau ina jimei, Jentail ma ai gulagulau awarii ma nanare mai Israel awarii. 16 Tau ana viatataiei da aubaiu ina jima ma rau-iviapoapoe ḡaeḡaena ina nei awarina.”

17 Anina ma Ananias i ḡeta au numa ma i rui. Ma urana Saul au tepana i terei ma i riwei, “Vareiu Saul, Bada Iesu, Tauna au etanai awarim i eḡa maranai weka u nenei, i paritawaneu awarim da ma inana me ma Arua Vivivireina oram ina vioai.” 18 Maratagogi purapura inanana me iana wenavina au matana i peu, ma tauna, inana me. Ma i vomairi ma i babataito. 19 Ma i am ma ana rewapana i vai-melei.

20 Ma tauna maratagogi i nae ma pari au numai i raraugugula da Iesu anina God natuna. 21 Taui aiavoi da Saul i nonori i ba kaua ma taui ava i babani vivira i pa, “Wei ravana tagogina, rau-iviapoapoe ḡaeḡaena Iesu ana tauvitumaḡanai awarii i kaukauei au Jerusalem bo? Tauna i nei weka nolana tagogina aubaina da tauvitumaḡana ita pani ma ita naiei Pirisi babadai awarii bo.” 22 Wate Saul ana raugugula i virewapana kaua ma lamnei mai Jew au Damaskas i aramanei da Iesu anina Keriso, Vinevinena, ma lamna aubaina ana babani eḡa ita parivirevirei.

23 Ma au pom biaḡa au murina Jew babadai i viogatara da Saul ita viraḡeni. 24 Mai Jew marai ma waguvarai taon garina au metaetana i vipaipai da Saul ita viraḡeni. Wate Saul ai ogatara riwana i nonori. 25 Ma waguvarai tauvitumaḡanai ḡelaui ai bada Saul i taravaini ma iriga ḡaeḡaena au orana i poai ma gavogavo aburuna taon au garina, kampa ḡuravei i tere-ḡairei au doa ma i ruba.

26 Saul i ḡeta au Jerusalem ma maranai i ḡoei da tauvitumaḡanai ai au boru ita rui. Wate taui i rovoei ma eḡa ita vitumaḡanei da tauna Iesu ana tauvotaḡotaḡo. 27 Wate Barnabas tauna i taravaini ma i naiei Apasol awarii, ma i riwei menanare au etanai Saul, Bada i ʼnanai ma aiwai awarina i babaniei. Ma menanare au Damaskas ana tepatorana i raugugula Iesu wavanei. 28 Anina ma taui Saul i taravaini ma maiteni i mae ma Jerusalem i naeni ma ana tepatorai i raugugula Bada wavanei. 29 Ma nanare Saul mai Jew pona Greek taubabanieina maiteni i babani ma i viparipariḡai, ma taui i viogatara da tauna ita viraḡeni. 30 Maranai tauvitumaḡana ḡelaui wei i nonori, ma Saul i taravaina-naiei au Caesarea da i paritawanei au Tarsus.

31 Anina ma ekalesia au Judea, Galili ma Samaria ana nuaubaii i mae. Ma Arua Vivivireina ana aguei ekalesia ai tumaḡana i vovai-virewapani, Ma ai boru i rarata, ma taui Bada i vivirana-kauei.

32 Nai maranaina Peter dobu maḡamaḡaui i naeni, ma God ana tauvitumaḡana awarii i ḡeta au Lidda. 33 Kampa oroto wavana Aeneas i nelaḡai, tauna gwaḡagwaḡana madeḡa 8 ana au aravi i matave. 34 Peter i riwa, “Aeneas, Iesu Keriso i vilawanim! Ma vomairi ma am aravi ma noui!” Ma maratagogi i lawana. 35 Anina ma rava maḡamaḡaui au Lidda ma Sharon wapuna melagaina, i mae-tavirei Bada awarina.

36 Au Joppa tauvitumaḡana tagogi wavana Tabitha (Greek ponanei lamna Dorkas) tauna marana patapatana kaua maḡamaḡaui aiaii i kaukauei molamokai aubaii. 37 Wei marana tauna i doria ma iʼraḡe ma tupuana i oḡai ma numa vatavatara au aidamo, i vimataveni. 38 Lidda, lamna Joppa au ḡereḡerena ma maranai tauvitumaḡana i nonori da Peter au Lidda, taui ai rava ruaḡa i paritawanei da Peter i egari i pa, “Laḡilaḡina ma nei!”

39 Ma Peter taui maiteni i nae da i ḡeta ma i taravaina-ruiei au numa vatavatara. Kaikaiababa maḡamaḡaui ana toutoui Peter i mairi kwaviviroi. Maranai Dorkas lawalawaina ma kwama da gara i popopoia Peter i viatataiei.

40 Wate Peter anatapui i vibaḡai da i opu au doa, ma ae-tutunei i mae-ḡaira ma i raupari, ma taubeu i riwei, “Tabitha, ma vomairi!” Tabitha matana i kala ma maranai Peter i ʼnanai, i vomairi da i kiala. 41 Peter urana i viloloi ma i voagui da i vomairi. Ma tauvitumaḡana anatapui ma kaikaiababa maiteni i kwatueiai, ma wavine lawalawaina taui i verei. 42 Ma wei riwana dobu Joppa i naeni ma rava maḡamaḡaui Iesu i vitumaḡanei. 43 Peter au Joppa i mae au pom biaḡa nanare Simon ḡamoḡamo opina taurauḡaroḡaroeina ana au numa.

<- Apasol 8Apasol 10 ->