1 Apolos au Corinth taon Akaia provins i mae, ma Paul ola i taḡoni da au Ephesus i ḡeta. Kerisiana ḡelaui kampa 2 ma i paridadanei i pa, “Arua vivivireina o vaia bo eḡa maranai o babataito?”

Taui i paribelei i pa, “Eḡa, Tauai eḡa ata aramanei da Arua vivivireina e mamae.”

3 Ma Paul i paridadana, “Aiwai babaitona o vaia?”

Taui i paribelana, “John ana babataito a vaia.”

4 [a]Paul i riwa, “John ana babataito lamna mataira da taui ai ḡoʼapoapoelei i mae-tavirei; ma mai Israel i riwei da Tauna au muriu e nenei ona vitumaḡanei lamna Iesu.” 5 Maranai wei i nonori ma i aramanei taui i babataito Bada Iesu wavanei. 6 Ma Paul urana au kolai i terei ma Arua vivivireina au orai i rui. Ma i vikarei da pona tapunei i bababani ma God riwana i raugugulei. 7 Taui nelara iavana twelve.

8 Paul i nae au boru-numana ma kampa nawaravi tonuḡa au orana ana tepatorana mai Jew awarii i bababani. Da rava orai ita sinavirai da Bada ana vigulau ita vitumaḡanei. 9 Wate ḡelaui kampa orai i bagibagi ma eḡa ita ḡoei da ita vitumaḡana, ma patara au matai Iesu ana etanai i vijiboḡi. Ma Paul taui i voterei ma kerisiana i taravaini ma i nae Tairanus ana au numa, ma kampa i viararamana ma i giugiu pompom. 10 Ma nanare i mae madeḡa ruaḡa i kwa, da mai Jew ma Jentail ravai maḡamaḡaui au Eisia provins maemaei Bada riwana i nonori.

11 Ma God ana rewapanei Paul kaua ḡaeḡaei ma aniba i kaukauei, 12 lamna avena wate rava ai agesi da ai nola garai i naiei Paul awarina da i vodadani ma i naei da rava doridoriai i vodadani, ma arua apoapoei i opu-tawanei ma i lawana.

13 Mai Jew ḡelaui dobuna i naeni ma arua apoapoei i viviaḡana-opunei ma i raudadana Iesu wavanei da arua apoapoei i viviaḡaḡei. Taui arua apoapoei i riwei i pa, “Iesu wavanei, taunei Paul e raraugugula, Tau a egarim da ma opu.” 14 Skeva, pirisi ai bada natunatuna nelarai seven wei kauana i kaukauei. 15 Wate mara tagogi arua apoapoena i paribelei, “Iesu a aramanei ma Paul a aramanei ma taumi aiavoi?” 16 Ma rava au orana arua apoapoena maemaena i auepai ma taui i vunui da eḡa ita vikalokaloei. Ai gara i sika-naei ma ana kovakovai ma tararatai numei i viopuopuana ma i viruberubei.

17 Mai Jew ma Jentail ravai au Ephesus maemaei wei riwana i nonori ma rovo orai i ḡaeni ma Iesu wavana i vivirana-kauei.

18 Maḡamaḡaui i vitumaḡana ma i nae kerisiana awarii ma ai ḡoʼapoapoe i rupeni. 19 Tauvitumaḡana voui maḡamaḡaui paraparaumai,[b] ai buka i vidamni au deba ma i apui. Maranai bukai ai maia i ʼavi da silver 50,000[c]. 20 Kaua babai me wei, Iesu riwana i vibabarai nai au dobuna ma rava maḡamaḡaui i vitumaḡana.

21 Wei anatapuna au murina Paul au orana i vinua-notanota da au Masedonia da Akaia ita verautuini da ita damana au Jerusalem ma i riwa, “Ana nae au Jerusalem ma muriai ana nae da Rome ana inanai.” 22 Ma Paul ana tauagu ruaḡa Timothy ma Erastus i aiparitawanei au Masedonia provins, ma tauna kampa i mae mara aburuna au Eisia provins.

23 Iesu ana babani ma ana kaua vouna aubaina, ma viḡaiḡaiawa ḡaeḡaena i tupua au Ephesus. 24 Silver taunoleina wavana Demetrius, mai Greek ai god wavinena ana numa taparoro kokoitaui i rarau-ḡaroḡaroei da i gimagimarei, ma wei nolana mane ḡaeḡaena e neineiai silver taunoleina nai au dobuna aubaii. 25 Ma taui anatapui ai rava nolana tagogina e kaukauei maiteni i rauḡoreiai ma i riwa, “Au rava, o aramanei da ata maura wei nolanei ta vaivaia. 26 Ma o inanai ma o nonori menanare wei ravana Paul e kaukauei, Rava ai nota i sinavirai da maḡamaḡaui god Artemis raudunena i voterei au Ephesus ma dobu Eisia paratana anatapuna. Ma e ririwa da ‘rava god i rauḡaroḡaroei, lamna eḡa god.’ 27 Tauta tana inana kaua da wavata ma ata mane ani kauana eḡa ina apoapoe. Ma ata god ḡetelarana Artemis ana numa taparoro ma wavana eḡa ina vijiboḡi, eḡa au Eisia provins ava ma dobu au anatapuna.”

28 Maranai patara wei babanina i nonori taui i meji kaua ma i vigaragarei, “Artemis mai Ephesus ai god i ḡetelera!” 29 Ma taui i garagarara rava nai au dobuna i nonori ma taui maiteni i garara labalababa. Anina ma patara Gaius ma Aristakas i vojijini taui ruaḡai mai Masedonia Paul ana tauvigwanigwaniana, ma i rubana-naiei nai dobuna ana boru gabuna.‡Dobuna ana boru gabuna lamna numa ḡaeḡaena. Eḡa poewana, ma inanana me nawaravi gebona. Rava maḡamaḡaui 26,000, nanare ina kiala meeting place. Rava e nenae kampa da kalo tapuna ma e raraubiḡa. 30 Paul i ḡoei da patara au naoi ita rui da ita babani wate kerisiana eḡa ita vianinei. 31 Wate nanare Paul ana rava ḡelaui au gabemani tauna i viḡaei da eḡa ina nae au boru.

32 Patara i vinuanaina, i logologoi ma i garagarara labalababa ma eḡa ita aramanei aiwai aubaina weka i nei. 33 Mai Jew oroto tagogi i dudu-opunei au naoi wavana Alexander ma patara ḡelaui i garara awarina da ita babani. Alexander urana i voepai da taui ita genuana ma tauna ana rava aubai ita babani. 34 Wate maranai i aramanei da tauna Jew. Taui anatapui pona tagoginei wenanare i garagarara, “Tauta mai Ephesus ata god Artemis i ḡetelera!” da hour ruaḡa i kwa.

35 Ma taon badana patara i riwei da i genuana ma i riwa, “Au rava mai Ephesus, rava anatapui au dobu i aramanei da tauta tauvipaipai mai Ephesus ai god ḡeḡetelarana Artemis ana numa taparoro ma ana ḡaima vivireina marei i peuai aubaina. 36 Eḡa aiai wei ina vikaua-moruei. Lamna aubaina orami ina rauei ma eḡa aiwai apoapoena ona kauei. 37 Wei ravai o neiai weka wate taui eḡa au numa taparoro aiwai ita danenei bo ata god ita riwana-boei. 38 Mepa da Demetrius ana rava maiteni e viviwavui taui ina nae ina rauetara ma ami viwavu ona naei kampa taurauetara awarina. 39 Ma mepa da ami nuabola ḡelaui e mamae lamna taon babadai ai au boru ona babaniei ma ona tere-jijimani. 40 Ma amadodo aiwai i tupua, tau a rovo da ina viwavuita mae-boaboa aubaina. Wei vikaruwaḡawaḡana anona eḡa, ma mepa da Rome ina paridadana ma tauta menanare tana paribelananei. 41 Anina ma boru i gudui ma rava i vilamonei.”

<- Apasol 18Apasol 20 ->