1 Apasol ma tauvitumaḡana au Judea provins i nonori da Jentail maiteni God riwana i nonori ma i vitumaḡana. 2 Ma maranai Peter i ḡeta me au Jerusalem tauvitumaḡana mai Jew ḡelaui tauna i eni i pa, 3 “Tam Jentail ai au numa u rui, ma maiteni u am!”
4 Anina ma kaua menanare i tuputupuanei anatapuna Peter taui i pariverei: 5 I riwa i pa:
Maranai a raraupari au Joppa ma matauei kaua a inanai, ma purapura inanana me puru ḡaeḡaena adana 4 i vojijini ma marei i tere-ḡaireiai awariu. 6 Au orana a inana lamna ḡamoḡamo maramaraḡamai ma moduei, tetetei me mota ma kiu au aidamo lavelavei. 7 Ma pona a nonori i pa, “Peter ma vomairi, ma viraḡena ma ma am!”
8 Tau a paribelei, “Eḡa! Lamna eḡa melanai ana kauei. Eḡa melanai lam viviḡana ata am-dadani.”
9 Wate pona marei mara viruaina i babani, “Aiwai purapurana God i riwa da i ai, tam eḡa ma riwa da i apoapoe.” 10 Mara tonuḡa wenanare i tupua, ma puruna i ḡaiana-melei au mara.
11 Nai maranaina mai Caesarea ai rava tonuḡa i paripari-tawaneiai, au metaeta i raumairiei. 12 Ma Arua Vivivireina i riweu da eḡa aiwai ana notai ma orau taputapunei ana nae. Mai Joppa tauvitumaḡana 6 maiteni a nae ma ravana ana au numa a rui. 13Cornelius i riwelai da anela awarina i eḡa, ma i riwei, “Rava ma paritawanei au Joppa da rava wavana SimonPeter ina neiai.” 14 Tauna wei riwana ina neiai ma lamnei tam ma am numa ravai maiteni ina vilawanimi.
15 Ma babani a raukarei ma Arua Vivivireina i ḡairai da taui i vioai me au naona awarita i tupua nanare. 16[a]Anina ma Iesu aiwai i ririwei a notai, “John wairei i babataito, wate taumi Arua Vivivireinei ina babataitoimi.” 17 Inanana au aiaina da God Jentail pulona tagogina i verei, me tauta i verevereta maranai Iesu Keriso ta vitumaḡanei, ma tau aiai da God ata viḡaei?
18 Taui i vigamopotai maranai wei i nonori, ma God i viborumei i pa, “Riwa kaua da God Jentail maiteni i vianinei da ina rupena ma ina lawana.”
Ekalesia au Antiok
19[b]Ekalesia ḡelaui rau-iviapoapoe i rovoei maranai Stephen i viraḡeni ma i vilamonei au uama. Ḡelaui i ruba nae au Phonisia, au Saipras ma Antiok, ma kampa Iesu Riwana Aiaina i raugugulei mai Jew ava awarii. 20 Wate ekalesia ḡelaui mai Saipras ma mai Sairini i nae au AntiokJentail awarii ma Iesu Riwana Aiaina i raugugulei. 21Bada ana rewapana taui au orai i mae ma Jentail maḡamaḡaui i vitumaḡana ma i mae-tavirei Bada awarina.
22 Wei riwana i ḡeta ekalesia awarii au Jerusalem, ma taui Barnabas i paritawanei au Antiok. 23-24 Maranai i ḡeta ma i ʼnanai da God ravai i viaiaina-kauei, tauna i vinuaiai ma i egari da Bada awarina ina vipatutu orai taputapunei. Barnabas tauna rava aiaina, Arua Vivivireina orana i oai ma ana tumaḡana i rata, ma God ana aguiei, i rauguga ma rava maḡamaḡaui i taini Bada awarina.
25 Ma Barnabas i nae au Tarsus da Saul ita baiei. 26 Ma i nelaḡai ma i neiai au Antiok, ma kampa tauvitumaḡana maiteni i mae madeḡa tagogi i kwa, ma patara ḡaeḡaena awarii i viararamana. (Weka au Antiok lamna i vikarei da tauvitumaḡana i viḡorei Kerisiana)
27 Wei au marana peroveta ḡelaui Jerusalem ei i ḡairai. 28[c]Peroveta tagogi wavana Agabas i vomairi ma God ana rewapanei i vieḡa da gomara e nenei au naoii dobu au anatapuna (CaesarClaudius ana vibada au marana gomarana i nei). 29 Tauvotaḡotaḡo au Antiok i vianina da taui ava ita kauana-guratei da mane vounaina ita kauei da ai rava ekalesia au Judea ita voagui. 30 Taui nanare i kauei ma manena Barnabas ma Saul au urai i terei ma taui ekalesia ai babada au Jerusalem i verei.
