Link to home pageLanguagesLink to all Bible versions on this site
12
Rehoboam
1 Mai Israel anatapui i nae au Shekem ma i vipaipai da Rehoboam ita nei ma ita terei ai gulau. 2 Maranai au Egypt, Nebath natuna Jeroboam, wei riwana i nonori ma Egypt i voterei ma i naeme. (Tauna au naona Solomon i rovoei da kampa i ruba nae.) 3 Ma Israel babadai riwa i paritawanei da Jeroboam i nei ma anatapui i nae Rehoboam awarina ma i riwei, i pa, 4 “Amam nola vitaikaukauai au tepaiai i terei, wate ai vita marina uta votelatelai, ma ana vitaunolem.”

5 Rehoboam i paribelei i pa, “Ona nae ma aupom vitonuina ona nememei ma ana paribelemi.” Ma rava i vilamonei.

6 Ma gulau Rehoboam, dogadogara awari vinuaterena i vaia, taui amana Solomon ana taunola maranai lawalawaininai. I paridadanei i pa, “Wei ravai menanarena ana paribelana-nei?”

7 Taui i paribelei i pa, “Mepa da u ḡoei da rava ma voagui, ai vibaḡa ma vianinei, ma taui aubaim ina vitaunola nonoa.”

8 Wate Rehoboam dogodogara ai vinuaterena i geduaiei ma i nae ana kimta awarii, maiteni i rata tagogi, ma marina tauna e vivitaunolei 9 Tauna i paridadana, “Ami nota aiwai? Menanare tana kauanei, wei ravai e ririwa da ai vita tana viaburui?”

10 Ma ana kimta i paribelei i pa, “Nai ravai awarim i ririwa, ‘Amam vita ḡaeḡaena i vereverelai marina ai vita ma viaburui.’ Wenanare ma riwei, ‘Tau vita ḡaeḡaena ana veremi eḡa me amau! 11 Amau vita ḡaeḡaena i veremi wate tau ḡaeḡaeotana ana terei au tepana! Tauna kwapuei i ravimi wate tau ḡoroḡorova donadonanei ana kwapuimi.”

12 Aupom tonuḡa au murina i riwa nanare Jeroboam ana babada maiteni i nememei Rehoboam awarina. 13 Gulau Rehoboam dogadogara ai vinuaterena eḡa ita vaia ma pona bagibaginei rava awari i babani. 14 Tauna ana kimta ai vinuaterena i rautaniḡanei ma nanare i riwa, “Amau vita ḡaeḡaena i veremi; wate tau ana viaitepatepani. Amau i ravimi wate tau ḡoroḡorova donadonanei opimi ana sikai.”

15 Au naona God ana peroveta Ahijah, Shilohei aiwai Nebath natuna Jeroboam i pariverei marina anona i tupua. Gulau rava ai vinuaterena eḡa nonorana ita ḡoei, wate lamna Bada i kaukauei da aiwai peroveta i ririwei nanare ina tupua[a].

16 Maranai Israel patarana i ʼnanai da gulau taui ai babani i parivirevire, ma gulau i riwei i pa:

 
“Tauta eḡa Jesse natuna David ana damei!
Eḡa ana dam ravai!
Oo Israel ona naeme me ami au numa
Oo David am dam oina ma inanai!”
 
Anina ma mai Israel i nae ai au numa. 17 Wate Rehoboam mai Israel au Judah maemaei i vibadei.

18 Adoniram, mai Israel anatapui ai taunola i vibadei. Gulau Rehoboam, Adoniram i paritawanei au Israel da ai taunola ita neiai au Jerusalem wate taui ḡaimei i viraurauei da i viraḡeni. Gulau Rehoboam laḡilaḡina ana chariot i gerui ma i nae me au Jerusalem. 19 Ma wei marana da i nae mai Israel David ana dam ma ai vigulau i geduaiei ma i parivirevirei.

20 Maranai mai Israel anatapui i aramanei da Jeroboam Egyptei i nememei, taui riwa i paritawanei da i nei awarii ma i terei Israel dam anatapuna ai gulau. Dam tagogiava, Judah ava, i mae David maiteni.

 
Jeroboam bulumakau goldei i kauei
25 Ma ḡavia rovona aubaina Jeroboam Shekem taon ḡaimei i gari kwaviviroi ma kampa i mae. Wei lamna dobu violaolana, dam Ephraim ai dobu. Muriai i nae ma nanare Penuel taon i gari-kwaviviroi.

26-27 Mara tagogi gulau Jeroboam wenanare i vinua-notanota, “Mai Israel anatapui e ḡeḡae au Jerusalem da au tempol pulo e apuapui Bada awarina. Ma mepa da nuanuai ina virai ma ina audamana Judah gulauna Rehoboam awarina amapo tau ina viraḡeniu.” Ma wei vigulauna ina nae me David ana epaepaia awarii.

28 [b]Ma ana dogadogara maiteni i babani da i vinua-terenei ma bulumakau ruaḡa goldei i kauei ma ana rava i riwei, “Jerusalem ḡaena i vinigarigari, Oo Israel wei ami god, tauna Egyptei i tere-opunemi.” 29 Ma bulumakau goldei tagogi au Bethel ma ḡelauna au Dan i terei.[c] 30 Wei lamnei i ḡoʼapoapoe; aubaina rava ḡelaui uama ḡaeḡaena i naeni da au Dan da burumakauna i voepaepai.

31 Jeroboam maiteni voepaepa gabui ma pulo aniapuni i voanaiei ola au tepai ma rava labalababa eḡa mai Levi i vinei da pirisi, pulo tauapuna.

Rehoboam au Judah i vigulau, ma i vigulau da madeḡa 17 i kwa. Maranai tauna gulau i maemae, mai Judah god morumorui i raraudunelei. Ma mai Egypt i nei da Judah i viḡaviei ma ai tempol purapurai maiai ḡaeḡaei ma gulau ana numa purapurai maiai ḡaeḡaei anatapui i pupuni da i vivanei.
Rehoboam ma Jeroboam i viḡaiḡaiawa nonoa. Maranai Rehoboam i ʼraḡe, natuna Abijah au Judah i vigulau madeḡa tonuḡa i kwa. Tauna maiteni Jeroboam i viḡaviei. Maranai Abijah i ʼraḡe, natuna Asa au Judah i vigulau da madeḡa 41 i kwa. Tauna gulau aiaina, ma God i raudunelei ma mai Judah ai god morumorui i viparipariei. Tauna mara nonoa mai Israel ai gulau Baasha maiteni i viḡaiḡaiawa. Maranai Asa i ʼraḡe natuna Jehoshaphat i vigulau mai Judah awari.
Au Israel Jeroboam natuna Nadad lamna gulau apoapoena, ma nanare aiavoi da tauna au murina i vivigulau anatapui gulau apoapoei. Nadab mai Israel i vibadei da madeḡa ruaḡa i kwa ma Baasha tauna i viraḡeni, ma Jeroboam ana dam mamae-terenanai maiteni. Wate rava wavana Baasha i vigulau da madeḡa 24 i kwa ma i ʼraḡe. Ma natuna Elah i vigulau da Israel i vibadei da madeḡa ruaḡa i kwa ma ana sorodia badana tagogi, wavana Zimri, tauna i viraḡeni ma i terepa-melei da i vigulau. Wate wiki tagogi au murina mai Israel ai sorodia Omri i terei da gulau, anina ma Zimri i viraḡena-melei. Omri i vigulau da madeḡa 12 i kwa, anina ma natuna Ahab tauna Israel ana gulau ma i mae da madeḡa 22 i kwa.

<- 1 Kings - Gulagulau Naona 111 Kings - Gulagulau Naona 13 ->