Tovanama Nota Sodoma i fakwafakwa nenei, tufomu nasi nufunina yasi tonuaviya nukusi si nemiya keta Sodoma be menana nakanakasisi na fafaninama nenei si kanasunisiya keta Sodoma tonuaviya si vatanisiya.
Ebenamu Nota I Gifafafaniya
11-12 Sodoma keta Gomona fiyaosi kasi kaniyabina si nemiya keta yasi nogonogo be kasi kabwaga matatafuna si yuna. Ebenamu auna Nota Sodoma i fakwafakwa, tanake tauna keta yana nogonogo matatafuna yota si visiya keta si niisiya.
13 Tamokaḡa namoḡa vikamunumunuwa nenei i dibwana keta i nemiya Ebenamu biga i veniya. Tovanama nenei Ebenamu tene Ibeniu i fakwafakwa tene Amonai kana wava Mamene yana kai nakanakasisi niniusiyai. Mamene na sisitaina, Esikoni keta Ane, si vinowaniya Ebenamu vitana nukusi sina vikaovivita vikamunumunuwa nenesiyai.
14 Ebenamu yana tonuaviya kasi yagwana 318 yana kabaḡai si tufuwa. Tovanama i nowaniya nifanifaisi auna si viya, yana namonamoḡa matatafusi i wenevakukusisiya keta nifanifaisi si kwavinisiya kana nivaniva Dani menana nakasina nenei. 15 Tovanama i kumanovana, Ebenamu yana tonuaviya i vitukuwisiya yoko nenesiyai keta nifanifaisi si kanasunisiya fafani tuninatunina nenesiyai keta si vatanisiya. Nifanifaisi si dibwana eketa Ebenamu yana namonamoḡa nukusi si omunitawisiya kana nivaniva Oba menana nakasina Damasiko bomatu kuweyaina. 16 Ibasima matatafuna nifanifaisi si gikumisiya, matatafuna i visiya. Yota Nota na yana nogonogo nukusi keta vivine be mani namoḡa matatafusi nukusi i nemiye-savavinisiya.
Menekisedeki Ebenamu I Sawanuwagabubuwiya
18Ibeniu 7:1-10Menekisedeki i nemiya keta Ebenamu i venufotefotiya. Tanake Sanema menana nakasina kana tufomu keta yota Guyau Etanemokenei yana tovibwanaose. Maneka keta waini i nemiisiya keta Ebenamu i veniya. 19 Menekisedeki Ebenamu i sawanuwagabubuwiya i iyaviya i bwaduwa,
“Guyau Etanemokenei abama keta fwayafwaya i fufunisiya,
iba dewadewasi fasiweu ita savivinisiya.
20 Guyau Etanemokenei nifanifaiu nimaweu i tenisiya,
na fasinei tana daviya.”
Eketa Ebenamu nogonogosima i visiya nifanifaina nenesiyai, dawana 10 i tenisiya keta dawananama nenei tamokaḡa Menekisedeki i veniya.
<- Kabikona 13Kabikona 15 ->
