31
Guyau Yana Vada Tafutafuna Kana Tokiyona
Yauna 35:30—36:1
1 Eketa Yave Mosese i iyaviya i bwaduwa, 2 “Ku nowaniya! Yuda fasekwina nenei, Uni natuna atu Une waḡana kana wava Besanenu a gibokiya. 3 Eketa Kanunuku nenei a vimaiya keta kana kakavenena be nuwatasuyasuya yota iba matatafusi kasi gikifukifu kana sanamana a veniya. 4 Ebe kana fata gonudi, siniva eketa bononisi ina ginivavisiya, 5 yota kana fata gabana ina kikawavikuvikukuna keta ina kabubunisiya kafa okanikanibubuna fasisiyai, eketa yota kai ina katasi-vikuvikukuna. Kana kakavenena dewadewana nenei mudadava nofe matatafuna ina savivinisiya.
6 Dani fasekwina nenei kana toovivita a gibokiya Ooniyabi Aisamaki natuna. Eketa yota matatafusi toginiginivava kasi kakavenenanama a venisiya ebe iba matatafusi a visimeiwa maise sina fufunisiya.
7 Yaku Vada Tafutafuna,
dedeni kana koni
keta koni kana gudu koni etanei,
eketa yota yaku Vada Tafutafuna kana nogonogo matatafuna
8 maise sonama na kana nogonogo,
kimayeta gonudi keyakeyana yana kafa misini na kana nogonogo matatafuna,
kafa guvimamadi kana didiḡa,
9 kafa vikanakooḡa bwanaosena kana didiḡa na kana nogonogo matatafuna,
kaboma nakasina kafa katumimi na kaena
10 keta yota nuya na kana kanibubuna — tovibwanaose kasi toviketanuneina Anoni kana nuya keta yota natunatuna namoḡa kasi nuya sina kikotonina be sina vitovibwanaoseya,
11 keta givikanatafu kana bubu
eketa iba mamadisi nuwatayuyunisi Totomu Tafutafuna fasinei.
Namoḡa na kasi kakavenena iba matatafuna sina fufunisiya naki a visimeiwa maise.”
<- Yauna 30Yauna 32 ->