HEBREWS 8

Jesus wuruꞌu
Umanawunuꞌoraz waFaadaan

1 Aizii diꞌi wuruꞌu õaipaniaz uaitapan, kainaꞌa Umanawunuꞌo waFaadaan, sakanataꞌoraz naa umanawun-tinapa-karu idaꞌa Tominkaru diwaꞌora antanapu aokazi ii. 2 Ukaudinan Umanawunuꞌo Faadaa nii, wuru nazoꞌo iaꞌa mishiꞌoraz Tabernacle* Tominkaru tomaniaz aokazi ii, aonaa pidan tomanii mani.

3 Ipai Umanawunuꞌo Faadaa taa kaimanaꞌo aimaakan kida naꞌiki kawaodaꞌo nii uzai Tominkaru ati. Uruu idi waFaadaan Umanawunuꞌoraz, utaanii kapam aimaakan Tominkaru ati. 4 Umashaapan an zii mani imiꞌi baaraꞌa, aonaa mani ufaadaa-tinan, ushaꞌapanum kauꞌan, kainaꞌaꞌa naa faadaanao taaꞌo aimaakan kida Tominkaru ati Kakinaorii kawanaꞌati. 5 Wuruꞌu Tabernacle imiꞌi baaraꞌaꞌoraz naꞌapaꞌo aokazi iaꞌoraz kawan, mazan udikin karikaonan. Uruu idiꞌo Moses kakinao-kao ukadishita-kidaꞌazon donoꞌoraz naa Tabernacle, Tominkaru kian uꞌati, “Mishi paꞌi putoma ipai aimaakan, naꞌapa manawun wuru kawanaꞌatiꞌi õaida-kidaniaz puꞌati midukuo ii.”†Exodus 25:40; 26:30 6 Mazan Jesus kaudin-kizi taa-kao, ufaadaa-tinapanuz, powaꞌaꞌo zii umanawunun paꞌan wunao kaudin-kizi aiaꞌa, kiwiitapainaouz faadaanao. Naꞌapa ukauꞌan wuruꞌu Paꞌinaꞌoraz Covenant‡Paꞌinaꞌoraz Covenant Putukapa kaarita tokon ii, Parada-karu Mashaꞌapannaada-kinao diꞌii, ‘covenant’ waranuꞌu. Jesus idaꞌanaꞌoraz umishiinan, powaꞌaꞌo zii paꞌan umanawunun Kiwiitapaꞌoraz Covenant ai. Naꞌiki Tominkaru shaꞌapatan kaiman kidaꞌo aimaakan uruu idaꞌan. 7 Aonaan an mani pidannao kasharutinpan Kiwiitapaꞌoraz Covenant ai, aonaa kanom nii mani ukawadaunuta-kao. 8 Mazan Tominkaru tukapan idi papidanannao kasharutinpan paꞌai, uruu idi ukian,

“Kainaꞌiki kamoo kida waꞌatin,” Naobanai kian,

“Uruu donoꞌo nii õtoman Paꞌinaꞌo Covenant

Israelitenao naꞌiki Judah sannao tuma.

9 Wuruꞌu Paꞌinaꞌoraz Covenant õtoman niꞌoraz,

aonaa wuru kawanuꞌo nii maniꞌi õtaaniaz covenant ĩdokozunnao ati.

Õnaꞌakan ĩdyaun õkarodapan idaꞌanaꞌo,

õkodita-kidan donoꞌoraz ĩdyaun Egypt iki.

Aonaan idi ĩizoꞌatin wuruꞌu Covenant õtaaniaz Moses idaꞌan,

uruu idiꞌo aonaꞌa naa õnyukunuupaꞌakan ĩdyaun.

10 Aizii kaikapaꞌo nii wuruꞌu Paꞌinaꞌo Covenant õtoman niꞌoraz

Israelitenao tuma diinaꞌitiꞌi,” Naobanai kian,

“Õmuudan nii õkakinaori kida ĩnyukunuu ii ĩdiꞌitinapa-kinaa nii,

naꞌiki õsaadan niizu ĩnyukunuu idaꞌa ĩnyukunuitapa-kinaa niizu.

Õgaruꞌo nii ĩTominkarun nii,

naꞌiki ĩnaouꞌo nii õpidanannao nii.

11 Aonaꞌo nii pidan tominapa-kidan pamin-dazabazi oo paꞌinawuzu,

ukian idaꞌan, ‘Putominapa Tominkaru dauꞌu.’

Ushaꞌapanum kauꞌan ipaiꞌo nii ĩaitapan õgaru,

pidannao wuruꞌu aonaꞌoraz ĩmanawunun naꞌiki umanawuniinaouz pidannao.

12 Õmainaabatan nii wuruꞌu aimaakan dikauda kidaꞌoraz ĩshaꞌapatauzon,

naꞌiki aonaꞌo nii powaꞌa õnyukunuitapan ĩꞌoian kida.”§

13 Tominkaru dakotan idi patoman Paꞌinaꞌo Covenant, uruu idi Kiwiiniꞌoraz Covenant, aonaꞌo niꞌi naa uaiapa-kao.

<- HEBREWS 7 HEBREWS 9 ->