1 Ta na7au, neeni miishsha tal77ida ne shooruwaassi waase gelidabaa gidikko, neeni erenna uraassi ne kushiyaa baqqada geppidabaa gidikko, 2 neeni geppido gefaa gitiyan gelidabaa gidikko, ne doonaappe kiyida qaalan oiqettidabaa gidikko, 3 simmi neeni ne shooruwaa kushiyan geladasa. Hegaa gishshau, ta na7au, hegaappe kiyanau koyikko, elle ne shooruwaa soo ba; baada waasetettaa i ne bollappe wottana mala, auddashada a woossa. 4 Hagaa oottennan de7aidda xiskkoppa; shemppuwaakka shemppoppa. 5 SHankkaappe genessiyaa kessa ekkiyoogaadan, gitiyaappe kafiyaa attiyoogaadan, ne huuphiyaa ashsha.

6 Inttenoo azallatoo, qaacotukko biite; biidi etappe tamaarite. Yaatidi aadhdhida eranchcha gidite. 7 Qaacota ootissanau azaziyaabi, halaqi woikko eta haariyaabi baawa; 8 shin banttau maanabaa bone minjjoosona; kattaa cakkiyo wodekka banttau koshshiya kattaa shiishshoosona. 9 Nenoo azallau, neeni aude gakkanaashin xiskkuutee? Ne xiskkuwaappekka aude dendduutee? 10 Neeni qassikka guuttaa zin77aasa; guuttaa xiskkaasa; kushiyaa shiishsha ekkada, guuttaa shemppaasa. 11 Yaatiyo wode hiyyeesatettai panggaadan, pacai ola miishshaa oiqqida asadan, ne bolli yaana.

12 Iita asinne hanttaara asi, yuuyi yuuyidi wordduwaa odees; 13 i ba aifiyan qim77otees; ba tohuwan bessees; ba biradhdhiyan malaatees. 14 A uluwan geellatettai de7ees; i iitabaa qoppees; ubbatookka i ooshshaa medhdhees. 15 Hegaa gaasuwan bashshai akeekennan a bolli yaana; i hassayennan meqqana; meqqidikka paxenna.

16 GODAI ixxiyo usuppun yohoti de7oosona; i shenetiyo yohoti ubba laappuna:

20 Ta na7au, ne aawaa azazuwaa pola; ne aayyiyaa nena tamaarissidoogaakka aggoppa; 21 eta ubbatoo ne wozanan oiqqa; ne qooriyankka qachcha. 22 Neeni hemettiyo wode, eti nena kaalettana; neeni zin77iyo wode, eti nena naagana; neeni beegottiyo wodekka, eti nena zorana. 23 Aissi giikko, ha azazoti xomppe; timirttetikka poo7o; qassi seeraikka de7uwaakko efiya oge. 24 Ha azazotinne ha timirtteti iita maccaarippenne azina machchi cimo inxxarssaappe nena naagana. 25 I puulaa ne wozanan qaaqqatoppa; i qim77otankka omoodettoppa. 26 Issi attumaasi issi oittaa immidi, shaaramuxa maaccaasa demmanau danddayees; shin azina machcho laggettiyoogee nena worissana. 27 Issi asi tamaa idimmin, a maayoi meetettennan attanau danddayii? 28 Issi asi tamaa bonqquwaa yedhdhi hemettin, a tohoi xuugettennan attanee? 29 Asa machcho laggettiya urai hegaakka mala; o bochchiya ubbai qaxxayettennan attenna. 30 Kaisoi namisettidi, baayyo maanau wuuqqikko, asai a karenna. 31 SHin i oiqettidabaa gidikko, laappun kushe qanxxana; ba son de7iya miishsha ubbaakka immana. 32 SHin maccaasaara shaaramuxiya asi wozana paca; he urai ba shemppuwaa bashshees. 33 Deshettiyoogeenne kauyyiyoogee a gakkida saama. A yeellai appe mulekka qucettenna. 34 Aissi giikko, maccaasee azinai mishettidi, hanqquwaa suullana; suullidi ba haluwaa kessiyo wode, au qarettenna. 35 I aiba afilaamakka ekkenna; ai keena imoikka a hanqquwaa doshissenna.

<- Leemiso Maxaafaa 5Leemiso Maxaafaa 7 ->