1 Lo77o sunttai daro duretettaappe aadhdhees; sabettiyoogeekka biraappenne worqqaappe aadhdhees.

2 Duriyaanne manqquwaa ubbaakka GODAI medhdhiis; hegan eti naa77aikka lagge.

3 Cincca asi iitaa be7idi, qosetti aattees; shin akeeki paccido asi metuwan gelidi qohettees.

4 Neeni ashkke gidikkonne GODAASSI yayyikko, duretettaa, bonchchuwaanne de7uwaa demmana.

5 Iita uraa ogiyan agunttainne piree de7ees; shin bana naagiya asi etappe haakkees.

6 Na7i waanidi de7ana bessiyaakko tamaarissa; yaatikko, i cimidikka hegaa aggenna.

7 Duree hiyyeesaa haarees; tal77i ekkidaagee tal77iyau immidaagau aille gidees.

8 Nagaraa zeriya urai waayiyaa cakkees; harata i tuggayiyo tuggaikka attees.

9 Keha asi ba qumaappe hiyyeesau coo immiyo gishshau anjjettana.

10 Qilliicciya asa diggarggikko, palamai, ooshshainne cashshai kichchana.

11 Neeni wozanaa geeshshatettaanne keha haasayaa dosikko, kawoi nenaara dabbotees.

12 GODAI tumaa naagees; shin worddanchchatu qaalaa i aatti yeggees.

13 Azalla asi, “Taani kare kiyikko, gaammoi tana maana; tana ogiyan asi worana” yaagees.

14 SHaaramuxa maccaasee doonai ciimma ollaa mala; GODAI hanqqettido uri a giddon kunddees.

15 Na7a wozanaa azallatettai baqqi oiqqees; shin qaixaariyan qaxxayiyoogee appe haassees.

16 Baayyo aquwaa gujjana giidi, hiyyeesaa naaqqiyaageenne duriyaassi imuwaa immiyaagee naa77aikka hiyyeesana.

17 Ne haittaa haa yeggada, aadhdhida eranchchai odiyoobaa siya; ne wozanaakka ta eraakko zaara. 18 Aissi giikko, eta ne wozanan wottikkonne ne doonankka eta ubbaa hassayikko, neeni ufaittana. 19 Ne ammanoi GODAN gidana mala, taani nena - ee nena - hachchi tamaarissaas. 20 Taani neessi zoreenne eratettai de7iyo hasttamu leemisota xaafoohoo! 21 Nena kiittidaagaayyo neeni likke zaaruwaa zaarana mala, taani nena tumatettaa tamaarissaas.

22 Hiyyeesatussi aibinne bainna gishshau, etabaa bonqqoppa; shilootankka metootanchchatu maataa xaissoppa. 23 Aissi giikko, GODAI eta gishshaa mootettana; eta bonqqidaageetakka i bonqqana.

24 Hanqqettiya uraara laggetoppa; hanqqettanau eesotiya uraarakka zuppetoppa. 25 Neeni a hanuwaa meezetikko, guyyeppe agganau danddayakka.

26 Asassi aco ta qanxxana gaada waase geloppa. 27 Neeni qanxxiyoobi xayikko, ne zin77iyo hiixai attennan, neessi de7iyaabai ubbai ekettana.

28 Ne maizza aawati tokkido beni zawaa shoddoppa.

29 Ba oosuwaa cinccatettan oottiya asa be7adii? I kawotussi ootteesippe attin, coo asatussi oottenna.

<- Leemiso Maxaafaa 21Leemiso Maxaafaa 23 ->