1 Kawuwaa wozanai GODAA kushiyaana; i a wozanaa goggiya haattaa zaariyoogaadan, ba koyidosaa zaarees.

2 Asi oottiyoobai ubbai aawussi likke milatees; shin GODAI a wozanaa qofaa paaccees.

3 Yarshshuwaa yarshshiyoogaappekka aattidi, xillobaanne suurebaa oottiyoogaa GODAI dosees.

4 Iitati otorettiyoogaaninne ayyiyoogan erettoosona; hegeekka nagara.

5 Mino oosanchchaa halchchoi dureyees; shin eesotiya ubbai hiyyeesana.

6 Worddotidi dagayido aqoi penttuwaa suuluwaadan xayees; hegaa koyiyaageeti haiquwaa koyoosona.

7 Iitati suurebaa oottanau ixxiyo gishshau, eta makkala oosoi eta ekkidi bees.

8 Mooranchchati geella ogiyan hemettoosona; shin geeshshati suurebaa oottoosona.

9 Ooyettiya machcheera issi keettan de7iyoogaappe he keettaa shakkuwan de7iyoogee keha.

10 Iitati iitabaa oottanau amottoosona; bantta shoorotussi qarettokkona.

11 Qilliicciyaagee qaxxayettido wode, wozani paccido urai aadhdhida eraa tamaarees; qassi wozannaama urai tamaaridi, eraa demmees.

12 Xillo Xoossai iitatu son oosettiyaabaa ubbaa be7ees; eta aatti yeggidi xaissees.

13 Hiyyeesaa waasuwaa siyanaappe giidi, ba haittaa tucciya uri, ikka waassana; waassin alliyaabai xayana.

14 Geeman immiyo imoi hanqquwaa doshissees. Afala giddoora immido mattaayee suulo hanqquwaa irxxissees.

15 Suure pirddai pirddettido wode, hegee xilluwaassi ufaissa; shin iitaa oottiyaageetussi dagama.

16 Akeeka ogiyaappe haddirida uraa haiqoi naagees.

17 Aaro injjiyan de7ana giya urai manqqees; woine eessanne zaite dosiya asi duretenna.

18 Issi issiton Xoossaasata ashshanau iita asati qaxxayettoosona; ammanettenna asatikka suure asatu gishshaa qaxxayettoosona.

19 Ooyettiyanne yiillotiya machcheera de7anaappe bazzon de7iyoogee keha.

20 Wozannaama uraa son mal77o qumainne oissai minjjettees; shin eeyya asi bau de7iyaabaa ubbaa mirggees.

21 Xillotettaanne aggenna siiquwaa koyiya uraa baree aduqqees; qassi he urai xillotettaanne bonchchuwaa demmees.

22 Wozannaama asi wolqqaama olanchchati de7iyo katamaa olidi oiqqees; oiqqidi eti ammanettido mino qatuwaakka laalees.

23 Ba doonaanne ba inxxarssaa naagiya asi bana metuwaappe naagees.

24 Otorettiyanne ayyiya asi qilliicciyaagaa geetettees; i otoranchcha gidido gishshau, asau qoppenna.

25 Azallaa amoi worees; aissi giikko, i oottanau koyenna. 26 Azallai gallassa kumettaa darobaa demmanau amottees; shin xilloi bau ashshennan immees.

27 GODAI iitatu yarshshuwaa shenetees; hegaappekka eti au iita qofan shiishshiyo yarshshuwaa aatti shenetees.

28 Worddo markkai xayana; shin qoppidi akeekan haasayiya uraa haasayai ehettana.

29 Iita asi taagaa xalaalai likke gees; shin suure asi yuushshi qoppees.

30 Asi ba aadhdhida eratettan, akeekaaninne zoriyan GODAARA eqettanau danddayenna.

31 Olaayyo paraa kooranau danddayettees; shin olaa xoonissiyaagee GODAA.