1 Hegaappe guyyiyan, Iyyoobi zaaridi, hagaadan yaagiis; 2 “Ee, hagee intte giyoogee tuma gidiyoogaa taani erais. SHin asi Xoossaa sinttan xillo gidanau waani danddayii? 3 Aara issi uri palamettanau koyikko, he urai i oichchiyo sha7u oishaappe issuwaanne zaaranau danddayenna. 4 Xoossai ba wozanan aadhdhida eranchcha; ba abbiyankka daro wolqqaama. Aara eqettanau danddayiya ooninne baawa. 5 Erennan de7ishin, xoqqa dereta i eta sohuwaappe diggees; ba hanqquwankka aatti yeggees. 6 I biittaa a sohuwan qaattees; biittaa tuuqetakka yaaqiyaaqissees. 7 Awai awaxxennaadaaninne xoolintteti poo7ennaadan azazanau danddayees. 8 I barkka salota micciis; abbaa beetaa bollikka hemettees. 9 Xoossai Wogga Beeriyaa giyo xoolinttetu citaa, Ooriyoona giyo xoolinttetu citaa, Piliyaadisa giyo xoolinttetu citaanne tohossa baggaara de7iya xoolinttetu citata medhdhidaagaa. 10 Gidduwaa pilggidi eranau danddayettenna gitabata, qoodi bainna oorattabata i oottees.

11 “Xoossai taakko shiiqiyaakkokka, taani a be7anau danddayikke; i ta lanqqeera kanttiyaakkokka, taani i hegan de7iyoogaa eranau danddayikke. 12 I ba koyidobaa ekkin, a ooninne digganau danddayenna. ‘Waatai?’ yaagidi a oichchana asi baawa. 13 Xoossai ba hanqquwaa teqqenna; Ra7aaba giyo miimminttiyaa maaddiya ba morkketa ba tohuwaappe garssau aattidi yedhdhees.

14 “Yaatin, taani a oishaa zaaranau lo77o qaalaa auppe demmanau danddayiyaanaa? 15 Taani xillo gidiyaakkokka, pirddiya Xoossai tana maaranaadan woossanaappe attin, taani a bolli zaarikke. 16 Taani a xeesin, i taayyo koyiyaakkokka, ‘Ta cenggurssaa siyiis’ gaada ammanikke. 17 I tana gotiyan mentterettees; gaasoi bainnan i ta masunttaa darissees. 18 Tana shemppuwaakka shemppissennan diggees; i ta de7uwaa camettees. 19 Wolqqaabaa haasayikko, i wolqqaama. Pirddaabaa haasayikko, a xeesidi, pirdda keetti shiishshana asi baawa. 20 Taani xillo gidiyaakkonne ta doonai tana mooranchcha kessees; taani boree bainna asa gidiyaakkonne, i tana geella kessees.

21 “Taani boree bainna asa. SHin ta de7uwaa wudikke; taani ta de7uwaa karais. 22 Dummatetti baawa; hegaa gishshau, taani, ‘I boree bainnaageetanne iitata naa77aakka issippe xaissees’ yaagais. 23 Bashshai xillo asata qoppennan woriyo wode, Xoossai qilliiccees. 24 Xoossai ha sa7aa iita asatuyyo aattidi immiis; pirddiyaageetu aifiyaakka gooziis. Hagaa ubbaa oottidai a gidanaappe attin, harai oonee?

25 “Ta de7o laittati wottaa woxxiya uraappekka aadhdhidi eesotoosona; eti lo77obaa be7ennan paallidi xayoosona. 26 Ta de7o laittati maqqaa wolwolotudan eesotoosona; argganttai bau miyoobaa oiqqanau saluwaappe duge paalliyoogaadan paalloosona. 27 Taani, ‘Ta zuuzunttaa dogana; ta som77uwaakka xumissiyoogaa aggada pashkkana’ yaagikko, 28 tana gakkana waaye ubbaassi taani yayyais; aissi giikko, neeni tana geeshsha geennaagaa taani erais. 29 Yaatin, taani mooranchcha gidaichchaappe attin, coo mela aissi daafuriyaanaa?

30 “Taani ta bollaa harai atto saamunan meecettiyaakkokka, 31 neeni tana urqqa ollan olana; olin ta maayoikka tana shenetana. 32 Taani ayyo zaaruwaa immana gaanau, Xoossai ta mala asa gidenna. Gididaakko nuuni naa77ai daanna sintti aadhdhana; 33 shin ba kushiyaa nu naa77aa bolli wottidi, nuna sigettiya asi nu giddon de7eerenneeshsha! 34 Abeet Xoossau, tana qaxxayiyoogaa agga; tana daganttiyoogaanne yashissiyoogaa agga. 35 Yaatikko, taani neeyyo yayyennan haasayana; shin ha77i danddayikke.

<- Iyyooba Maxaafaa 8Iyyooba Maxaafaa 10 ->