1 Hegaappe guyyiyan, SHuuha biittaappe yiida Bilddaadi zaaridi, hagaadan yaagiis; 2 “Neeni hagaa malabaa aude gakkanaassi haasayuutee? Ne doonaappe kiyiya qaalai wolqqaama gote mala. 3 Ubbaa Danddayiya Xoossai pirddaanne xillobaa geellayii? 4 Ne naati Xoossaa bolli nagaraa oottido gishshau, i eta etau bessiyaagaadan qaxxayiis. 5 SHin neeni Xoossaakko simmikko, Ubbaa Danddayiya Xoossaa woossikko, 6 neeni geeshshanne suure gidikko, i ne gishshau denddidi, nena maaddana; i kase ne de7uwau zaaridi woitana. 7 Ne doomettai guutta milatikkonne, ne wurssettai keehippe darana.

8 “Kase yeletaa ane oichcha; oichchada nu maizza aawati ai ai tamaaridaakko, qorada demma. 9 Aissi giikko, nuuni zino yelettidaageeta; nuuni aibanne erokko. Nuuni ha sa7an de7iyo laittai kuwaa mala. 10 Eti nena tamaarissona, neeyyo yootonanne bantta akeekidobaappe haasayona.

11 “Ceeccai caree bainnasan diccanau danddayenna; maqqaikka haatti bainnasan mokkanau danddayenna. 12 Biron dicciiddi, qanxxettennan de7iiddi, maataappekka eesuwan shullana. 13 Xoossaa dogiya asaa ubbaa wurssettai hegaa mala; Xoossai bainna uraa hidootaikka xayana. 14 I ammanettiyoobai meqqiichchiyaabaa; i ceeqettiyoobaikka shararootiyaa keettaa mala. 15 I ba shararoote keettan zemppees, shin eqqenna; i a oiqqana, shin a danddayenna. 16 I awan haattaa ushshido ataakilttiyaa mala; ataakilttiyaa sohuwaa pinni kiyana gakkanau daayees. 17 Keela shuchchaa yuushuwan ba xaphuwaa yeddees; shuchchatu giddonkka baayyo sohuwaa koyees. 18 SHin i ba sohuwaappe shodetti xayiyaakko, he sohoi a, ‘Taani nena be7abeikke’ yaagana. 19 Be7a, iita asatu ufaissai hagaa mala. Aissi giikko, hara asati yiidi, eta sohuwaa oiqqoosona.

20 “Xoossai tumaappe boree bainna asa oli aggenna; iitaa oottiyaageeta qassi maaddenna. 21 I zaaridi, nena miicissananne ililissana. 22 Nena ixxiyaageeti yeellaa maayana; iitatu keettai xayana” yaagiis.

<- Iyyooba Maxaafaa 7Iyyooba Maxaafaa 9 ->