1-2 Hegaappe guyyiyan, Iyyoobi ba doonaa dooyidi, ba yelettido gallassaa hagaadan yaagidi qanggiis; 3 “Taani shahaarettido qammainne taani yelettido gallassai coo xayona! 4 He gallassai xuma gido! Bolla Xoossai he gallassaa shenehoo go; a bollan poo7oikka poo7oppo. 5 Leelida xumainne ciggaarai a goozo; a shaarai kammo; a poo7uwaakka xumai gentto. 6 He gallassa qammaa sakkana xumai oiqqo. Laittaa giddon de7iya gallassatun i qoodettoppo; aginatu qoodankka geloppo. 7 He gallassa qammai maino; ufaissa ililssikka an siyettoppo. 8 Lewaataana giyo miimminttiyaa denttanau loohida shareechchoti he gallassaa qanggona. 9 He qammaayyo bakkaaliyaa xoolinttee poo7oppo; poo7uwaa naagidikka demmoppo; maallado xalqqeekka ayyo xalqqoppo. 10 He qammai taani ta aayee uluwan shahaarettennaadaaninne ha metuwaa be7ennaadan teqqibeenna gishshau, qanggettidaagaa gido.

11 “Taani ta aayee uluwan haatta kiyarkkinaashsha! Ta aayee uluwaappe yeletta wodhdhaanne haiqqarkkinaashsha! 12 Ta aayyiyaa tana aissi ba kiyuwan zaaradeeshsha? Ba xanttaakka tana aissi xanttadeeshsha? 13-15 He wode taani haiqqidabaa gidiyaakko, ha77i shemppada xiskkaas shin! Qolettida sohota banttau zaaretti keexxida sa7aa kawotuuranne eta zoriyaageetuura, worqqai de7iyoonne bantta keettan biraa kunttida halaqatuura issippe duufuwan zin77aas shin! 16 Woikko aayee uluwaappe boshettidi yelettida na7adan, woikko gallassa poo7uwaa ainne be7ibeenna yiiraadan, taani biitta giddon qosettaichcharkkinaashsha! 17 Duufuwan iitati bantta iita oosuwaa aggoosona; yan daafuranchchatikka shemppoosona. 18 He sohuwan qashuwaasatikka shemppidi ufaittoosona; oosuwaa ootissiyaageetu waasuwaa eti hegan siyokkona. 19 Guuttai gitaikka yan de7ees; ailleekka ba godaassi ailletiyoosaappe kiyees.

20 “Metuwan de7iyaageetuyyo poo7oi aissi imettidee? De7oi cammiyoogeetussi, 21 haiqoi yanddeeshsha giidi amottin, yeennan ixxiyoogeetussi, qotti wottido buquraa koyiyoogaappe aattidi, haiquwaa koyiyaageetussi, 22 duufuwaa biidi gakkiyo wode, ufaissaaninne ililssan poocammiyaageetussi de7oi aissi imettidee? 23 Ogee bayiichchido uraassi, Xoossai a yuushuwaa dirirggido uraassi poo7oi aissi imettidee? 24 Qumaa miyoogaa gishshaa oolais; ta oolee aggennan goggiya haattaa mala. 25 Taani yayyidobai ta bolli gakkiis; taani dagammidobaikka tanan haniis. 26 Taayyo metoppe attin, saroi, woppinne shemppoi baawa” yaagiis.

<- Iyyooba Maxaafaa 2Iyyooba Maxaafaa 4 ->